Nombres 21 - Ma Zhiklè

Ndohi Canaan ta kala ta va a ndohi Israel

¹ Aman bi Arad, ndo Canaan, man a nza te Négeb, a ntsenaha, ndohi Israel ta shkè a civèɗ Atharim, a nkala ta va a ndohi Israel, a mparka ta a ɓèlè.

² A Israel a ngaɗda ma a hi a Ndo nzi pèc pècèk: Aman ka da va nga ndohi haha a ri nga, nga da gedassa kokwar tengaʼa a mèdèp.

³ A Ndo nzi pèc pècèk a ntsena ma ndohi Israel, a mpe ta ndohi Canaan a ri tengaʼa. A ta gedas ta, tengaʼa a kokwar tengaʼa, a mèdèp. A ta baha na samaʼa Horma.

Zhüzhokihai

⁴ A ta jèkeda za Hor, a to do a civèɗ ndè woyam mbiaʼa nduzoa, aman ta beza auda a tsagi kokwar Edom. A civèɗ, lak a slra ta a di ndohi ɓai.

⁵ A ndohi ta ga na ma a va Bi Zhiklè a Moise: Kin helka nga auda te kokwar Egypte, a nga metsi nga tʼhèshèkèɗ èhèmè? Movar azɓai, iyam azbai, skwi nʼndi hèmnèk-hèmnèk haha a ngezla nga a gèɗ.

⁶ A Ndo nzi pèc pècèk a nzlinde ta mtümsho a va ndohai, a ta je ta ndohai. A ndohi Israel kumba ta bazl ta.

⁷ A ndohi ta shkè a sam Moise a ta gada na: Nga gu malai, nga ga ka ma a va, nga ga na ma a va Ndo nzi pèc pècèk. Tsu ri a Ndo nzi pèc pècèk, a nhela nga zhü-zhok auda a tsagai. A Moise a ntsu rai a géɗ ndohai.

⁸ A Ndo nzi pèc pècèk a ngaɗa na Moise: Vüɗo mtümsho, a ka Zlatseda a gada; ko wawa man zhüzhok a mjo, a mpi di a nengaʼa, a nzi a nshèffè.

⁹ A Moise a ngau zhüzhok züdo, a nzlatseda a gada. Aman zhüzhok staɗ a mjo ndo, a ndo sa a mpu di a zhüzhok züdo, a nʼnza a nshèffè.

A dal Moab

¹⁰ A ndohi Israel to do a ma, a ta nza te Oboth.

¹¹ Te deɓaʼa ta jèkeda Oboth, a ta nza te Abarim, a dal Moab, te civèɗ mvèng pats.

¹² To do a ma ma te pa, a ta nza te Zéred.

¹³ Ta jèkeda Zéred, a ta nza te wud woyam Arnon, tʼhèshèkèɗ, man a hünko te kokwar Amor. Arnon a pi kuma te ndev Moab a kokwar Amor.

¹⁴ A géɗ nengaʼa ta goɗ te ɗèlèwèr ndohi var Ndo nzi pèc pècèk: Vaheb te Supha,

¹⁵ a slrats ndè a ma woyam Amon, a nsurpoloh a ma slratshai man ta hinè te Ar, ha ndè a ma kokwar Moab.

¹⁶ To do a ma ma, a ta ndika a Beer. Nasa thal man Ndo nzi pèc pècèk a gada na Moise a géɗ nengaʼa: ɓic ta ndohai, i woy a i va ta iyam.

¹⁷ A pats nasa ndohi Israel ta slu dimèsh haha: Thal, hodko iyam auda! Va-sla na dimèsh a thal.

¹⁸ Thal, man bihi ta raʼa, man mbibihiaʼa te ndev ndohai ta kala a gada bi ta, a gada nshèwèlè ta! Te Beer to do a ma ma a Matthana.

¹⁹ Te Matthana a Nahaliel; te Nahaliel a Bamoth;

²⁰ te Bamoth, a dal Moab, a der za Pisga, a ma hèshèkèɗ.

Israel a gi a ngul Sihon

²¹ A ndohi Israel ta zlinde ta ndohi sak a sam Sihon, bi ndohi Amor, aman ta gada na:

²² Va-nga civèɗ, a nga bizhè a ndev kokwar ngaya! Nga bizhè a ndev gi dau ka bai, a ndev gi lak ka bai, nga da si iyam te thal azɓai, nga da bizhè zuraʼa bual bual, ha nga tawaɗa kokwar ngaya ma.

²³ Aman Sihon a mva ta civèɗ a ndohi Israel aman ta tawaɗa kokwar nengaʼa ɓai. Sihon a mɓic ta ndohi nengaʼa tèlèba, a to do aman ta zli gèɗ a ndohi Israel tʼhèshèkèɗ. A ta ndikè a Jahats, a ta gu var a Israel.

²⁴ A Israel a mbazl ta a tsakwal, a nduma kokwar tengaʼa, a hinè te Arnon, ha ndè a ma Jabbok, ha ndè a ma kuma ndohi Ammon. Kokwar ndohi Ammon nʼngalda pa.

²⁵ A Israel a nduma kokwarhi haha tèlèba, a ta nza te kokwar ndohi Amor tèlèba, te Hesbon, a kokwar man a tsagiaʼa tèlèba,

²⁶ Hesbon, kokwar bi Sihon, bi ndohi Amor, man te va nasa a gu var a bi Moab, a ncèma na kokwar nengaʼa tèlèba, ha ndè a ma woyam Amon.

²⁷ Gar haha ta dérɗèʼa te dimèsh: Vo-washkè a kokwar Hesbon, aman nga rèm a nga ɗèɗèy kokwar Sihon a pa!

²⁸ Aman pats ngiɗè, vogwa a mshkè auda te Hesbon, nèʼèn vogwa a nsiambaɗa te kokwar Sihon, a nʼndeda Ar-Moab a ma, a Baalhi a gèɗ za a ma woyam Arnon.

²⁹ Wobau, ka, Moab, ndohi Kemosh, kin za! Wudahi nengaʼa man ta hu ta, a dalahi nengaʼa a mpa ta a ɓèlè a Sihon, bi ndohi Amor.

³⁰ Nga bazla Moab a tsakwal ma, a hinè te Hesbon, ha ndè Dibon. Nga fa na vogwa, ha ndè Nophach, ha ndè Medeba.

³¹ Aranta ndohi Israel ta nza te kokwar Amor.

Israel a gi a ngul Og

³² A Moise a nzlinde ta ndohi nzeɓi kokwar Jaezer. A ta dumaʼa, a kokwar man a tsagiaʼa, a ta dzam ta ndohi Amor man ta nza a pa.

³³ A ta shkè a deɓa, a ta gs civèɗ ndè Basan. Og, bi Basan, a mshkè aman a ngi var a nda tengaʼa. Nengaʼa a ndohi nengaʼa tèlèba, ta te Edrei.

³⁴ Aman Ndo nzi pèc pècèk a ngaɗa na Moise: Ka gu zlau nengaʼa bai, i va ka a ri a ka, a ndohi nengaʼa tèlèba, a kokwar nengaʼa tèlèba: Ka da gi a sam nengaʼa lèmèlèmè ara man ka gu a sam Sihon, bi ndohi Amor, mana nʼnza a Hesbon.

³⁵ A ta bazl ta, nengaʼa a wudahi nengaʼa, a ndohi nengaʼa tèlèba, ko staɗ ta jèka na nshèffè ɓai, a ta ceda kokwar nengaʼa a ma.