Nombres 20 - Ma Zhiklè

Iyam a hakaɗauda te za

¹ A mpi ndohi Israel tèlèba ta shkè a hèshèkèɗ Tsin, te ki nshèlèkuraʼa, a ndohi ta nza te Kades. Te pa Miriam a mʼmets na, a ta rda a vèvèɗ.

² A mpi ndohi ta ngatsa iyam ɓai, a ta humda ta va a gèɗ a nda Moise a Aaron.

³ Ndohi ta ga na ndzoan a Moise, a ta gaɗa na: Dara nga da mets nga ara kramamhi nga man ta mets ta a sam Ndo nzi pèc pècèk!

⁴ Kin helka ta mpi ndohi Ndo nzi pèc pècèk a hèshèkèɗ haha, a nga metsi nga, a nda skwi nga èhèmè?

⁵ Kin helka nga auda te kokwar Egypte, a sam ambaɓiaʼa haha èhèmè? Nga zleki skwi azɓai, kslor, nyi wof, hawan, ko iyam nsi ba azɓai.

⁶ A Moise a Aaron ta jèkeda mpi ndohi a pa, a ta shkè a ntamagi gi nkezlaʼa, a ta kalahi a deɓ sak ta. Te deɓaʼa nʼnjèl Ndo nzi pèc pècèk a ngudoko ta va a dai.

⁷ Ndo nzi pèc pècèk a ngaɗa na Moise:

⁸ Kinè a Aaron, kramam ngaya, vo-co gada a kin ɓic ta mpi ndohai! A kin gada na za, a sam di tengaʼa: Va-ka nga iyam! Gau aman iyam a hakaɗauda te za, a mpi ndohai a skwi tengaʼa da sau!

⁹ A Moise a nco gada a sam di Ndo nzi pèc pècèk, ara man a gada ta.

¹⁰ Te deɓaʼa Moise a Aaron ta ɓic ta mpi ndohai a sam za. A nengaʼa a ngaɗa ta: Kinè ndohi man kin tsena gèɗ ɓai, va-tsenaʼa! Nga slaha nga gi a iyam a hakaɗauda te za aman kin sia ɗè?

¹¹ A Moise a ntsau za a gada, sak cèw. A iyam a ndzurvkaɗauda a vata, a mpi ndohai ta siaʼa, a skwi ta ta siaʼa.

¹² Ndo nzi pèc pècèk a ngaɗa na Moise a Aaron: A géɗ man kin fu gèɗ a ma ga ɓai, a kin slebardyè a sam di ndohi Israel a vna ɓai, kin da ndikèda ta ndohi haha a kokwar man i va ta azɓai.

¹³ Nasa iyam Meriba, sam man ndohi Israel ta ga na ma a va Ndo nzi pèc pècèk, sam man Ndo nzi pèc pècèk a ngreda ta: i kezla.

Ndohi Edom ta va ta civèɗ a ndohi Israel ɓai

¹⁴ Moise a nzlinde ta ndohi sak te Kades a sam bi Edom: Israel, kramam ngaya, a gada ka: Ka sun skwi mwuɗitpa tèlèba man a ga nga.

¹⁵ Babhi nga to do a kokwar Egpte, a nga nza te kokwar Egypte nʼnzi a zhè kumba. Te deɓaʼa ndohi Egypte ta gu skwi man ambaɓai a sam nga, a sam babhi nga.

¹⁶ A nga kuɗau a sam Ndo nzi pèc pècèk, a nengaʼa a ntsena ma nga, a nzlündo gol nengaʼa, a nhelka nga auda te kokwar Egypte. Ani haha nga te Kades, kokwar a ma kuma kokwar ngaya.

¹⁷ Va-nga civèɗ aman nga bizhè a ndev kokwar ngaya! Nga da bizhè a ndev gi dau ka ɓai, a ndev gi lak ka ɓai, nga da si iyam te thal ka ɓai, nga bizhè zuraʼa bual bual. Nga da bizhè zlawa azbai, ko a civèɗ ri mandai, ko a civèɗ ri gula, ha nga jèkeda kokwar ngaya a deɓa ma.

¹⁸ Aman Edom a ngaɗa na: Ka bizhè a haha azbai, man ɓai ngo-dogokoy var a tsakwal!

¹⁹ A ndohi Israel ta gada: Nga da bizhè bual bual. Aman nga a skwihi nga, nga da si iyam ngaya, nga da pilèʼa. Nga jhèɗè skwi ngiɗè azbai, sèi nga bizhè a ndev kokwar-bi ngaya.

²⁰ Aman nengaʼa a ngaɗa: I va ka civèɗ azbai! A ndohi Edom ta shkè, ndohi var nengaʼa kumba, a wuɗi mbiaʼa.

²¹ A mva ta civèɗ a Israel aman ta bizhè a ndev kokwar nengaʼa ɓai. A ndohi Israel ta ngalda ma ta a civèɗ ngiɗè, a ta jèkeda a pa.

Mʼmetsi Aaron

²² A mpi ndohi Israel tèlèba ta slambaɗa te Kades, a ta ndika a sam za Hor.

²³ A Ndo nzi pèc pècèk a ngaɗa na Moise a Aaron; te za Hor, a ma kuma kokwar Edom.

²⁴ Aaron a dè a va babhi na; nengaʼa do do a kokwar man i da va ta ndohi Israel ɓai, a gèɗ man kin gu mèdègèɗ a sam ga, a sam iyam Meriba.

²⁵ Co Aaron a Eléazar, kra nengaʼa, a ka de ta a géɗ za Hor.

²⁶ Suɗama na maslaka auda a va Aaron, a ka va na a va Eléazar, kra nengaʼa. A Aaron a dè a va gwoli na, a da metsi na a pa.

²⁷ A Moise a ngau ara man Ndo nzi pèc pècèk a njè na a gèɗ: to do a géɗ za Hor, a sam di mpi ndohi tèlèba.

²⁸ A Moise a nsuɗama na maslaka auda a va Aaron, a mva na a va Eléazar, kra na. A Aaron a mʼmets na a pa, a géɗ za. Te deɓaʼa Moise a Eléazar ta shkèhai te za.

²⁹ Mpi ndohi tèlèba ta rkaʼa, Aaron a mʼmets na ma, a ndohi Israel tèlèba ta kuɗiaʼa, mʼmèn 30.