Nombres 2 - Ma Zhiklè

Sam man ta mana a pa

¹ A Ndo nzi pèc pècèk a ngaɗa na Moise a Aaron:

² Ndohi Israel, verzi staɗ staɗ tèlèba, da mana a sam lamba ta, ndohi gi ta, zuraʼa a ma gi mɓicè-va, a ta tèuda gi a pa.

³ Tengaʼa man ta mènè te civèɗ mvèng pats, a sam lamba ta, ndohi Juda, ndohi var ngidè a tsagi ndohi var ngidè. Nashon, kra Amminadab, nengaʼa tsuvom ndohi Juda.

⁴ Ndohi var nengaʼa man ta nger ta, 74.600.

⁵ Ndohi man ta mènè a tsagi nengaʼa, ndohi te verzi Issacar; Nethaneel, kra Tsuar, tsuvom ndohi Issacar.

⁶ Ndohi var nengaʼa man ta nger ta, 54.400.

⁷ Te deɓaʼa ndohi te verzi Zabulon. Eliab, kra Hélon, tsuvom ndohi Zabulon.

⁸ Ndohi var nengaʼa man ta nger ta, 57.400.

⁹ Ndohi Juda man ta nger ta tèlèba, a sam man ta mana a pa, 186.400, ara ndohi var ta, ara ndohi var ta. Tengaʼa ta slèmbèdè nshèlèkuraʼa, aman ta dè a ma ma.

¹⁰ Lamba ndohi Ruben, a sam man ta mana a pa, nte civèɗ te man a dukwad, ara ndohi var ta, ara ndohi var ta. Elitsur, kra Shedéur, tsuvom ndohi Ruben.

¹¹ Ndohi var nengaʼa man ta nger ta, 46.500.

¹² Ndohi te verzi Siméon ta da mènè a tsagi nengaʼa. Shelumiel, kra Tsurishaddai, tsuvom ndohi Siméon.

¹³ Ndohi var nengaʼa man ta nger ta, 59.300.

¹⁴ Te deɓaʼa ndohi te verzi Gad. Eliasaph, kra Déuel, tsuvom ndohi Gad.

¹⁵ Ndohi var nengaʼa man ta nger ta, 45.650.

¹⁶ Ndohi Ruben, man ta nger ta tèlèba, a sam man ta mana a pa, 151.450, ara ndohi var ta, ara ndohi var ta. Tengaʼa ta slèmbèɗè macecèwaʼa, aman ta dè a ma ma.

¹⁷ Te deɓaʼa ndohi Lévi ta slèmbèdè a sam man ta mana a pa, a gi mɓicè-va nkezlaʼa. Verzi staɗ staɗ tèlèba ta slèmbèdè a sam man ta mana a pa, a sam lamba ta, a ta dè.

¹⁸ Lamba ndohi Ephraim, a sam man ta mènè a pa, ara ndohi var ta, ara ndohi var ta, nte civèɗ nkèl pats. Elishama, kra Ammihud, tsuvom ndohi Ephraim.

¹⁹ Ndohi var nengaʼa man ta nger ta, 40.500.

²⁰ A tsagi nengaʼa, ndohi te verzi Manassé. Gamliel, kra Pedahtsur, tsuvom ndohi Manassé.

²¹ Ndohi var nengaʼa man ta nger ta, 32.200.

²² Te deɓaʼa ndohi te verzi Benjamin. Abidan, kra Guideoni, tsuvom ndohi Benjamin.

²³ Ndohi var nengaʼa man ta nger ta, 35.400.

²⁴ Ndohi Ephraim man ta nger ta tèlèba, a sam man ta mana a pa, 108.000, ara ndohi var ta, ara ndohi var ta. Tengaʼa ta slèmbèdè mamakaraʼa, aman ta dè a ma ma.

²⁵ Lamba ndohi Dan, a sam man ta mènè a pa, te civèɗ te man a géɗèʼa, ara ndohi var ta, ara ndohi var ta. Ahiézer, kra Ammishaddai, tsuvom ndohi Dan.

²⁶ Ndohi var nengaʼa man ta nger ta, 62.700.

²⁷ Ndohi te verzi Aser ta mènè a tsagi nengaʼa. Paguiel, kra Ocran, tsuvom ndohi te verzi Aser.

²⁸ Ndohi var nengaʼa, man ta nger ta, 41.500.

²⁹ Te deɓaʼa ndohi te verzi Nephthali. Ahira, kra Enan, tsuvom ndohi te verzi Nephthali.

³⁰ Ndohi var nengaʼa man ta nger ta, 53.400.

³¹ Ndohi te verzi Dan, man ta nger ta tèlèba, a sam man ta mana a pa, 157.600. Te va tengaʼa nfada sa, Dan a dè a deba man ta slèmbèdè a ta dè a ma ma, a sam lamba ta.

³² Nasa ndohi Israel man ta nger ta, ara ndohi gi ta, ara ndohi gi ta. Ndohi var tengaʼa tèlèba man ta nger ta a sam lamba ta, a sam man ta mana a pa: 603.550.

³³ Aman ndohi Lévi, ta nger ta a va ndohi Israel ɓai, ara man Ndo nzi pèc pè-cèk a njè na ma a gèɗ a Moise.

³⁴ A ndohi Israel ta gu skwi tèlèba man Ndo nzi pèc pècèk a njè na a gèɗ a Moise. A ta mana a pa a sam lamba ta, a ta slambaɗa arsa man ta dè a ma ma, staɗ staɗ a verzi ndohi na, a verzi ndohi na, a sam gwoli na, a sam gwoli na.