Nombres 19 - Ma Zhiklè

Mpèn malai

¹ Ndo nzi pèc pècèk a ngaɗa ta nda Moise a Aaron:

² Nasa ma kita man Ndo nzi pèc pècèk a mvau, a gaɗa: Gaɗa ta ndohi Israel, aman ta woyko zlè nsuɗekɗekaʼa, ntevaʼa, va nengaʼa ndzwoɗaɗaʼa, man ta va na wof a daʼai di ɓai.

³ Kin va na Eléazar, ndo mvi skwi a Zhiklè; nengaʼa a daʼa auda a dal kokwar, a ta zlaha a pa a sam di na.

⁴ Eléazar, ndo mvi skwi a Zhiklè da natsede ri na a pombazaʼa, da guceda a civèɗ gi Zhiklè, sak tsaraɗ.

⁵ Te deɓaʼa da fa na vogwa a zlè a sam di na, a bkwi ba a zluèɗèʼa ba a Pombaz a zia tèlèba, sèi ta fa na vogwa.

⁶ Te deɓaʼa ndo mvi skwi a Zhiklè da co wof ɗawai, a hysope a hezemai, da peda a vogwa man a ndèr zlè a vna.

⁷ Te deɓaʼa ndo mvi skwi a Zhiklè da pana maslaka na, a va na, a iyam. Te deɓaʼa a slaha a ndè a deɓa a va ndohi zaʼa. Aman sèi ta rkaʼa ara ndo nlizhèa ha dakwaɗ.

⁸ A ndo man a ndar zlè, da pana maslaka nengaʼa a iyam, da pana va na a iyam. A ta rkaʼa ara ndo nlizhèa, ha dakwad.

⁹ A ndo man nlizhɓai, da ɓica mèrwèc zlèʼa, da feda a dal kokwar, a sam man nlizhɓai. A gi a skwi mpèn malai a sam mpi ndohi Israel, nara skwi mpil gèɗ.

¹⁰ Te deɓaʼa nengaʼa man a ɓica mèrwèc, da pana maslaka na. A ta rkaʼa ara ndo nlizhèa ha dakwaɗ. Nasa ma nkwèr a mèdèp a sam ndohi Israel, a sam ndo mbrok ba man a nzi te ndev tengaʼa.

¹¹ Ko wawa man a lama na nckondo wawa, nengaʼa nlizhèa mʼmèn tsaraɗ.

¹² Da pana va na te mʼmèn mamakaraʼa, a vaʼa te mʼmèn matsaraɗaʼa. Te deɓaʼa mpana zaʼa. Aman a pènè va na te mʼmèn mamakaraʼa, te mʼmèn matsaraɗaʼa ka bai, va na nlizhèa genè.

¹³ Ko wawa man a lama na nckondo wawa, a pènè va na azɓai, a lizhè gi Ndo nzi pèc pècèk. Ta da zede nshèffè ndo matsa te va ndohi Israel. A gèɗ man ta guca iyam mpèn malai a va nengaʼa ɓai, a nzi ara ndo nlizhèa, a skwi nlizhèa a zhè a va nengaʼa dai.

¹⁴ Na haha ma kita: aman ndo ngiɗè a mʼmets na a gai, ko wawa man a dè a gai a skwi tèlèba man a zhè te gai, nlizhèa mʼmèn tsaraɗ.

¹⁵ Kokwi a shiɗèf mèmè man skwi mpizlè ma na azɓai, nlizhèa.

¹⁶ A ndo man te dak a nlama na ndo man ta keɗa te dak a tsakwal, man bai ndo man a mets na a dala, man ɓai vatasl nckondo, man ɓai gi dzavai, nengaʼa nlizhèa mʼmèn tsaraɗ.

¹⁷ Sèi ta hil mèrwèc zlè man ta ndaraʼa a géɗ malai, a iyam man ta ɓudzkoɗi te nlèlè, a ta bada na iyam sa a gèɗ a mèrwèc te shiɗèf.

¹⁸ Te deɓaʼa ndo man nlizhɓai da co hysope, da natseda a iyam, da guceda a gai, a kolongwai, a ndohi tèlèba a pa, a ndo man a lama na vatasl nckondo, man ɓai ndo man a mets na, man ɓai gi dzavai.

¹⁹ Ndo man nlizhɓai da guceda a va ndo nlizhèa te mʼmèn mamakraʼa, te mʼmèn matsaradaʼa. Te mʼmèn matsaraɗaʼa, mali nengaʼa mpana. A nengaʼa a pènè maslaka nengaʼa, a pènè va nengaʼa te iyam. A dakwad, nlizhè asaɓai.

²⁰ Aman ndo man nlizhèa, a pènè mali nengaʼa azɓai, sèi ta zede nshèffè nengaʼa auda te va mpi ndohai, te man a lizhè sam nkezlaʼa a Ndo nzi pèc pècèk; ta guceda iyam mpèn malai a va nengaʼa ɓai.

²¹ Nasa ma nkwèr tengaʼa a mèdèp. Ndo man a gucèdè iyam mpèn malai, a pènè maslaka nengaʼa, a ndo man a lama na iyam mpèn malai, nengaʼa nlizhèa, ha dakwaɗ.

²² Skwi mèmè man a lama na ndo nlizhèa, nlizhèa, a ndo man a lama na, nlizhèa, ha dakwaɗ.