Nombres 18 - Ma Zhiklè

Ndohi mvi skwi a Zhiklè, a ndohi Lévi

¹ A Ndo nzi pèc pècèk a ngaɗa na Aaron: Kinè a wudahi ngaya, a ndohi gi bab ngaya, mali man ndo a gi a sam nkezlaʼa, ma kinè. Man ndo a gi malai asam mizlinè kinè, te mvi skwi a Zhiklè, ma kinè.

² Aman kramamhi ngaya, te verzi Lévi, verzi bab ngaya ba, da humda va a ka, da takaha ka, aman ka dè a ka gi mizlinè a sam gi man ma kita te pa.

³ A tawèrdi mizlinèasam ngaya, a sam gi tèlèba; aman da herdeka na va a kolongwi nkezlaʼa bai, ko sam mvi skwi a Zhiklè; man bai kin metsi kinè a nda tengaʼa.

⁴ Sèi ta humda va a ka, a ta takaha ka a sam mizlinè gi Zhiklè. Ndo ngiɗè, man ta fa a mizlinè ɓai, da herdeka kinè va bai!

⁵ Va-wara na di a mizlinè a sam nkezlaʼa, a sam mvi skwi a Zhiklè ba, a ndohi Israel ta ngècè ndzoan Zhiklè te deɓaʼa asaɓai.

⁶ Iyè, i hel ta ndohi Lévi, kramamhi kinè, auda te ndev ndohi Israel, a i va kine, aman ta gi mizlinè te gi nkezlaʼa.

⁷ Kinè a wudahi ngaya, kin nzi a sam mizlinè mvi skwi a Zhiklè kinè. Mizlinè a sam mvi skwi a Zhiklè, a mizlinè tʼhwaɗaʼa, te gi nkezli nkezlaʼa, kinè, kin giaʼa. I va kinè mizlinè mvi skwi a Zhiklè a rai. Aman ndo ngiɗè man i fa a mizlinè ɓai, a da herda na va, sèi ta keɗaʼa.

⁸ Te deɓaʼa Ndo nzi pèc pècèk a ngaɗa na Aaron: Ka ɓer skwi man ta co auda a ta vayè, skwi nkezlaʼa tèlèba, man ndohi Israel ta vayè. Kinè a wudahi ngaya kin ngècè a skwi kinè, na haha ma nkwèr ga a mèdèp.

⁹ Te va skwi nkezli nkezlaʼa, man ta ndara bai: Movar man ta viaʼa, skwi man ta zloho a géɗ malai a mphömè, skwi man ta vayè te diaʼa, skwi haha a ngaya. Skwi haha kinè a wudahi ngaya kin ngècèʼa a skwi nkezlaʼa.

¹⁰ Ka da ndiaʼa te gi nkezli nkezlaʼa, ngurhi ngurhi ta ndi nengaʼa. Da gau a skwi nkezlaʼa a sam ngaya.

¹¹ A skwi haha ba a ngaya: Skwi man ta co auda te va skwi man ta va na Zhiklè, skwi man ta co auda tèlèba te va skwi man ndohi Israel ta va na a ta geda a sam Zhiklè. I va ka, kinè a wudahi ngaya a dalahi ngaya. Nasa ma nkwèr ga a mèdèp. Ko wawa te gi ngaya man ndav na nlizhɓai, a ndiaʼa.

¹² Mbar mbelaʼa tèlèba, nyi wof a dau mbelaʼa, skwi nshèlèkuraʼa haha tèlèba, man ta da va na Ndo nzi pèc pècèk, i va ka.

¹³ Nengaʼa nshèlèkur skwi gi dau ta tèlèba, man ta va na Zhiklè. A ngaya. Ko wawa man te gi ngaya, man a nlizha ndav bai, a ndiaʼa.

¹⁴ Skwi man ta dumkodai te Israel man Zhiklè a gaɗa na Israel: ka lama na ɓai, a ngaya.

¹⁵ Tsuvom tèlèba man ta va na Zhiklè, ko ndo, ko skwi ndzham, a ngaya. Aman tsuvom ndohai, a tsuvom skwi ndzham man Zhiklè a sla na nlizhèa, sèi ka humbaɗda.

¹⁶ Ka humbaɗ ta, a hün daga man ki staɗ, a ndè a ma ma, a gurso 20, ara skwi nlivè nkezlaʼa.

¹⁷ Aman tsuvom zlè, a tambak, a ɓok, ka humbaɗa bai. Tengaʼa skwi nkezlaʼa. Ka guceda Pombaz tengaʼa a sam mvi skwi a Zhiklè; mbeza a ka fa na vogwa, a vodzok a zhkè-ha a Ndo nzi pèc pècèk, ambaha.

¹⁸ Zluèɗ tengaʼa, a ngaya, a nda ndavaʼa, man ta geda a sam Zhiklè, a nda ɗuar nte civèɗ ri mandai.

¹⁹ Skwi man ndohi Israel ta cè auda te va skwi nkezlaʼa a ta va na Zhiklè tèlèba, a ngaya, a wudahi a dalahi ngaya. Na haha ma nkwèr ga a mèdèp. Nasa nderzlè-ma a mèdèp, man a wèlè a deba azbai, a sam Ndo nzi pèc pècèk, a géɗ ngaya, a géɗ ndohi te verzi ngaya.

²⁰ Te deɓaʼa Ndo nzi pèc pècèk a ngaɗa na Aaron: Ka ngècè skwi nʼndi gi te kokwar haha azbai; skwi ngaya a te ndev tengaʼa bai. Iyè skwi ngaya; iyè skwi nʼndi gi ngaya te va ndohi Israel.

²¹ Aman ndohi Lévi, i va ta skwi nkezlaʼa staɗ te va kula te Israel, a ta cè a géɗ mizlinè man ta giaʼa te gi nkezlaʼa.

²² A ndohi Israel ta herda na va a gi nkezlaʼa ani asaɓai, man bai ta gi mali a ta bazl ta.

²³ Sèi ndohi Lévi man ta gi mizlinè te gi nkezlaʼa, a mali man ta gi asam gi nkezlaʼa, ma tengaʼa. Nasa ma nkwèr a sam kinè a ndohi te verzi kinè a mèdèp. Gar haha skwi nʼndi gi tengaʼa azbai a sam ndohi Israel.

²⁴ Aman skwi nkezlaʼa staɗ te va 10, man ndohi Israel ta va na Zhiklè, i va ta ndohi Lévi a skwi nʼndi gi ta. A géɗ nengaʼa man i gada ta: ta ngècè skwi nʼndi gi a sam ndohi Israel azbai.

²⁵ Te deɓaʼa Ndo nzi pèc pècèk a ngaɗa na Moise.

²⁶ Gaɗa ta ndohi Lévi aranta: Aman kin cè skwi nkezlaʼa staɗ te va kula te ri ndohi Israel, man i va kinè, a skwi nʼndi gi kinè, sèi kin cè skwi kula matsa auda a kin va na Ndo nzi pèc pècèk.

²⁷ A skwi man kin cè auda, a gi a dau man ta vi a hedak, a nyi wof te klok.

²⁸ Aranta kinè ba kin cè skwi staɗ auda a kin va na Zhiklè, te va skwi kula tèlèba man kin ngècè te ri ndohi Israel, a kin va na Aaron, ndo mvi skwi a Zhiklè, a skwi man kin co auda a kin va na Ndo nzi pèc pècèk.

²⁹ Te skwi tèlèba man kin ngè-cèʼa, sèi kin cè skwi auda a kin va na Ndo nzi pèc pècèk, kin cè te va skwi mbelaʼa te man nengaʼa skwi nkezlaʼa.

³⁰ A ka gada ta a vaʼa: Aman kin do co skwi mbelaʼa auda ma, a gi a sam ndohi Lévi ara skwi man a hedak a skwi nte klok.

³¹ Kin ndiaʼa ko tema, kinè a ndohi gi kinè; nengaʼa skwi ntul kinè a géɗ mizlinè man kin gia te gi nkezlaʼa.

³² Aman kin cè skwi mbelaʼa auda, mali ka ɓai, a kin derɗa skwi nkezlaʼa ndohi Israel ɓai, a kin metsi kinè te pa azɓai.