Nombres 16 - Ma Zhiklè

Ndohi Kehath ta slambaɗa na va a Moise

¹ Koré, kra Jitsehar, te verzi Kehath, kra Lévi, a nda Dathan a Abiram, kra Eliab, a nda On, kra Péleth – wudahi Ruben makar,

² ta slambaɗa na va a Moise, a nda ndohi mɓer ndohi Israel 250, man mpi ndohai ta pe ta a mizlinè, ndohi man nɗaɗav ta a zhè.

³ Ta humda ta va a gèɗ a nda Moise a Aaron, a ta gada ta: Anai tidè nga ma! Mpi ndohi tèlèba, ndohi nkezlaʼa tèlèba, man Ndo nzi pèc pècèk a zhè te ndev tengaʼa. Kin cèw kin woy a kin gi a mbibihiaʼa te va mpi ndohi Ndo nzi pèc pècèk èhèmè?

⁴ Aman Moise a ntsenaha, a ntseda medi a herkeda.

⁵ A ngaɗa na Koré a ndohi man ta humda na va a gèɗ tèlèba: Ango-slèm a prèk. Ndo nzi pèc pècèk a da pèrè ndohi nengaʼa auda, a da ngredè auda, ndo man nkezlaʼa, ndo man a slaha a nherda na va, tengaʼa man a mpar ta.

⁶ Koré a ndohi tèlèba man ta humda va a vna: Va-hul shiɗèf nʼndèr skwai!

⁷ Angoslèm va-peda vogwa a pa, va-ndor ɓurdi a sam Ndo nzi pèc pècèk! A ndo man Ndo nzi pèc pècèk a da ngècè auda, nengaʼa ndo nkezlaʼa. Anai tiɗè nga ma, wudahi Lévi!

⁸ A Moise a ngaɗa na Koré: Va-tsena, wudahi Lévi!

⁹ A slra kinè bi de? Ndo nzi pèc pècèk a mpar kinè auda te va mpi ndohi Israel, a kin herda na va, a kin gi mizlinè a sam gi nengaʼa, a kin takaha nga, mpi ndohi Israel, a mizlinè Zhiklè.

¹⁰ A mva kinè civèɗ, a kinè, a kramamhi ngaya tèlèba, kinè wudahi Lévi, a kin herda na va; anai kin jhèɗè mizlinè mvi skwi a Zhiklè a vaʼa.

¹¹ Kinè a ndohi ngaya, kin humda na va a gèɗ a Ndo nzi pèc pècèk ar haha. Aaron wa, aman kin gi ndzoanaʼa?

¹² A Moise a nzlündo ndo, a da baha ta Dathan a Abiram, wudahi Eliab. Aman ta gada: Nga dè azbai!

¹³ A slra bi ɗè? Ka helka nga auda te kokwar man wa a vongwom a hi te pa, a ka wushede nga a heshèkèɗ, aman nga da metsi nga te pa. A ka woy a ka gi bi a géɗ nga va za dè?

¹⁴ A vava ka de nga a kokwar man wa a vongwom a hi te pa asaɓai. Ka va nga gi dau ka ɓai, gi lak ka ɓai, ka woy a ka fe nga a ma nda zli dè? Nga dè azɓai!

¹⁵ A Moise a ngu ndav kumba a géɗ nengaʼa, a ngaɗa na Ndo nzi pèc pècèk: Ka co skwi man ta va ka ɓai! Ko kɗèh i cèma ta ɓai, ko ndo ngiɗè i lama ta ɓai.

¹⁶ Te debaʼa Moise a ngaɗa na Koré: Ka, a ndohi ngaya tèlèba, va-zlatsa a sam Ndo nzi pèc pècèk, kinè a Aaron, te mangoslèmaʼa.

¹⁷ Staɗ staɗ te ndev kinè da co shiɗèf na, a ɓurdi te pa, man ta ndara na Zhiklè. Staɗ staɗ te shiɗèf na, shiɗèfi 250. Kinè a Aaron, staɗ staɗ a shiɗèf na.

¹⁸ Staɗ staɗ a nco shiɗèf na, a ta peda ndazli vogwa, a ɓurdi a pa, a ta zlatsa a ntamagi Zhiklè, a nda Moise a Aaron.

¹⁹ Koré a mɓic ta mpi ndohi tèlèba, a mpoko ta gèɗ auda, a magi mɓicè-va; a nʼnjèl Ndo nzi pèc pècèk a ngudoko ta va a dai a mpi ndohi tèlèba.

²⁰ Te debaʼa Ndo nzi pèc pècèk a ngaɗa ta nda Moise a Aaron:

²¹ Va-bezla va kinè auda a sam mpi ndohi haha, a i da gedas ta a nasa nasa.

²² Aman ta kalahi a deɓ sak nengaʼa, a ta gada: Zhiklè! Zhiklè man ka vi nshèffè a ndo tèlèba. A géɗ man ndo staɗ a ngau malai, ka gi ndav a géɗ mpi ndohi tèlèba dè?

²³ A Ndo nzi pèc pècèk a ngaɗa na Moise:

²⁴ Gaɗa ta mpi ndohai ar haha: Va-kazla kinè auda a sam gi Koré, Dathan a Abiram!

²⁵ Te deɓaʼa Moise a nslambaɗa, a ndo a sam Dathan a Abiram. Ndohi nhalaʼa to do a verzi nengaʼa.

²⁶ A ngaɗa ta mpi ndohi ar haha: Va-kazla kinè auda a sam gi ndohi nderɗa Zhiklè haha, kin lama na skwi tengaʼa bai, ko kèshkata, man bai kin da zi kinè a géɗ mali tengaʼa tèlèba.

²⁷ A to do ta auda a sam gi Koré, Dathan a Abiram, tèlèba. A Dathan a Abiram ta shkè auda a ta zlatsa a ntamagi tengaʼa, a nda ngwozi ta, a nda wudahi ta, a nda wud wudahi ta.

²⁸ A Moise a ngaɗa: Te skwi haha sèi kin suna, Ndo nzi pèc pècèk a nzlindekayè, aman a i gi skwi haha tèlèba, iyè a ri ga kaɓai.

²⁹ Aman ndohi haha ta bazl ta ara ndohi ngiɗè genè, a ta ndev ta ara ndohi ngiɗè genè, ar Zhiklè a nzlindyè ɓai.

³⁰ Aman Ndo nzi pèc pècèk a gi nrkedi mbiaʼa, a herkeda a winè ma na, a gerɗ ta ma, tengaʼa a skwi tengaʼa tèlèba, a ta dè vèvèɗ a di tʼuda, kin da suna, ndohi haha ta durɗo Ndo nzi pèc pècèk a vava.

³¹ Njidè ngèd te ma, herkeda ncizl na a sam sak ta,

³² a herkeda a mwinè ma na, a ndohi gi ta, a ndohi man ta humda va a Koré, a skwi tengaʼa tèlèba, a ngerɗe ta ma.

³³ A ta kala vèvèɗ a di tʼuda, tengaʼa a ndohi tengaʼa tèlèba. Herkeda a mpizlè ta ma a pa, ta te va mpi ndohi asaɓai, klèng.

³⁴ A ndohi Israel tèlèba a samaʼa ta hu ta auda a sam lalau tengaʼa, a ta hur: dara nga hi nga, herkeda a da gerɗe nga ma!

³⁵ Te deɓaʼa vogwa a nshkè auda te Ndo nzi pèc pècèk, a nʼnde ta ndohi 250 man ta ndèr ɓurdi, a ma.

³⁶ A Ndo nzi pèc pècèk a ngaɗa na Moise:

³⁷ Gaɗa na Eléasar, kra Aaron, ndo mvi skwi a Zhiklè, da hulkoɗi shiɗèf auda a sam nʼndèr skwai, vogwa da kaldaussa, te man shiɗèf man ndohi haha ta zede nshèffè ta, a géɗ mali ta, skwi nkezlaʼa.

³⁸ Da vüdo a züdo man ta mbèda sam mvi skwi a Zhiklè a pa a vna, a géɗ man ta hulkoɗa a sam Ndo nzi pèc pècèk, sèi da peda a sam skwi nkezlaʼa. Da gu a skwi malwudai a sam ndohi Israel a ta hérè te pa.

³⁹ Eléazar, ndo mvi skwi a Zhiklè, a mhul shiɗèfi züdo, man ndohi man vogwa a nʼnda ta ma ta ndara na skwi a Zhiklè a vna a matsa, a ta vüdo a züdo a ta mbèda sam mvi skwi a Zhiklè a pa a vna.

⁴⁰ Nasa skwi malwudai aman ndohi Israel ta hérèʼa, aman ndo man ta fa a mizlinè ɓai, ndo man te verzi Aaron ka ɓai, da herda na va a Ndo nzi pèc pècèk ɓai, aman a da ndara na ɓurdi; man ɓai a da gi a sam ta lèmèlèmè ara a sam Koré a ndohi nengaʼa, ara man Ndo nzi pèc pècèk a gada na te ma Moise.

⁴¹ Te mangoslèmaʼa, mpi ndohi Israel tèlèba ta gu ma a géɗ Moise a Aaron, a ta gada: Kin bazl ta ndohi Ndo nzi pèc pècèk!

⁴² Aman mpi ndohi ta humda ta va a géɗ, Moise a Aaron ta ngwoda na ma a gi nkezlaʼa, a na haha vanai a nʼnjèl Ndo nzi pèc pècèk a ngudoko ta va a dai.

⁴³ A Moise a Aaron to do a ma gi nkezlaʼa.

⁴⁴ Ndo nzi pèc pècèk a ngaɗa na Moise:

⁴⁵ Va-bezla va kinè auda a sam mpi ndohi haha. I da gedas ta a nasa nasa. A ta kalahi a deɓ sak nengaʼa.

⁴⁶ Te deɓaʼa Moise a ngaɗa na Aaron: Co shiɗèf a ka peda ndazli vogwa a pa a géɗ sam mvi skwi a Zhiklè, a ɓurdi, a ka co a ka hu a ndev mpi ndohi mɓicaʼa, a ngi a skwi mpil gèɗ tengaʼa, a géɗ man Ndo nzi pèc pècèk a zhè ma, matakwan a hinè ma.

⁴⁷ A Aaron a mco, ara man Moise a gada na, a mhu a ndev mpi ndohai. A matakwan a hüno a sam ndohi ma. A nco ɓurdi a ngi a skwi mpil gèɗ ndohai.

⁴⁸ A nzlatsa te ndev ndohi mbazlaʼa, a ndohi man ta zhè a nshèffè dai, a matakwan a ndal na.

⁴⁹ Tengaʼa man ta bazl ta a matakwan sa, 14.700, ndohi Koré man ta mets ta a géɗ ta, ta te va bai.

⁵⁰ A Aaron a mshkè a deɓa a sam Moise, a ma gi nkezlaʼa. Matakwan klèng.