Nombres 15 - Ma Zhiklè

Skwi man ta da va na Zhiklè te Canaan

¹ A Ndo nzi pèc pècèk a ngaɗa na Moise aranta:

² Gaɗa ta ma haha a ndohi Israel: Aman kin da ndikè a kokwar man i woy a i va kinè a kin nzi a pa,

³ a kin ndara na skwi a Zhiklè, skwi man kin ndara na, a skwi man kin zlaha na, a géɗ ma ngiɗè man kin gaɗdahai, man bai a géɗ man kin hur te ndav kinè, man bai a géɗ ngolala, man bai a géɗ man agi ambaha Ndo nzi pèc pècèk, ko zlè, ko tambak,

⁴ ndo man a woya a nva na skwi a Ndo nzi pèc pècèk, da hul gufa dau agoda cèw, mbsoma a mbar koloba staɗ, a mva na Ndo nzi pèc pècèk a movar.

⁵ A géɗ skwi nsi man kin va na Ndo nzi pèc pècèk, ko man kin ndara na skwi a Zhiklè, ko kin zlaha na skwi a Zhiklè, a géɗ kra tambak staɗ staɗ tèlèba, koloba staɗ.

⁶ Aman drok, sèi ka hil gufa agoda faɗ, a mbar koloba staɗ a rètaʼa,

⁷ a skwi nsi koloba staɗ a rètaʼa, a ka va na Zhiklè, aman ambaha.

⁸ Aman ka va na kra zlè, a ka ndara na, man bai ka zlaha na, a géɗ man ka gadda ma a hai, man bai te nshid gèɗ a Ndo nzi pèc pècèk,

⁹ sèi ta vi gufa dau agoda 6, mbsomaʼa a mbar koloba cèw,

¹⁰ a ka va na skwi nsai, koloba cèw. Nasa skwi man ta va na Ndo nzi pèc pècèk, a ngi ambaha.

¹¹ Sèi ta gi arsa a sam kra zlè staɗ staɗ tèlèba, a sam drok staɗ staɗ tèlèba, lèmèlèmè a sam kra tambak, a kra ɓok.

¹² Lèmèlèmè ara skwi man kin zlahaʼa, kin livè movar a skwi nsi lèmèlèmè.

¹³ Ndo kokwar staɗ staɗ tèlèba da gu arsa, aman a va na skwi a Zhiklè, a ndara na skwi a Zhiklè, aman ambaha.

¹⁴ Aman ndo mbrok, man bai ndo ngiɗè man a nza a va kinè, a woya a nva na skwi a Zhiklè, aman ambaha, da gu lèmèlèmè ara kinè.

¹⁵ A sam kinè, a sam mbrokihi man ta zhè a sam kinè, ma nkwèr lèmèlèmè. Nasa ma nkwèr kinè a medèp, a ndè a ma ma a sam wuda kinè. Te mvi skwi a Zhiklè, ndo mbrok lèmèlèmè ara kinè.

¹⁶ Ma kita stadgenè, tsuf stadgenè, a sam kinè, a sam ndo mbrok man a nzi a sam kinè.

¹⁷ Te deɓaʼa Ndo nzi pèc pècèk a ngaɗa na Moise:

¹⁸ Gaɗa ta ndohi Israel ar haha: Aman kin da ndikè a kokwar man i woy a i de kinè a pa,

¹⁹ a kin da ndi skwi nʼndi te kokwaraʼa, sèi kin cè skwi auda a kin va na Ndo nzi pèc pècèk.

²⁰ Te va dau nshèlèkuraʼa, kin cè movar a kin va na, kin cè auda te va dau man a hedak. Nasa man kin cè auda.

²¹ Te vaskwi kinè nshèlèkuraʼa, vo-co auda a kin va na Ndo nzi pèc pècèk, arsa a mèdèp.

²² Aman te va ma nkwèr tèlèba man Ndo nzi pèc pècèk a ngaɗa na Moise, staɗ a nda pce na,

²³ te va skwi tèlèba man Ndo nzi pèc pècèk a njè kinè a gèɗ te ma Moise, a hünko te pats man a njèʼa, a ndè a ma ma te verzi wud wuda,

²⁴ aman nʼnga na a gèɗ, mpi ndohi tèlèba ta sun bai, sèi ta pil gèɗ a matsaraɗ marai, mpi ndohi tèlèba, a ta ndara na skwi a Ndo nzi pèc pècèk, aman ambaha, a movar a skwi nsai, ara ma nkwèr nengaʼa, a mazawal a geɗ malai.

²⁵ Aman mpi ndohi Israel ta ngots skwi mpil gèɗ a sam ndo mvi skwi a Zhiklè, mali tengaʼa mpra, a gèɗ man nʼnga ta a gèɗ, a ta va na skwi a Zhiklè, a ta ndara na skwi a Zhiklè, a ta ngots skwi mpil gèɗ a sam Ndo nzi pèc pècèk ma, a gèɗ man a yakede ta.

²⁶ A mali mpra a mpi ndohi Israel tèlèba, a ndo mbrok ba man a zhè a sam tengaʼa; aman a yakedama na gèɗ a ndo staɗ, mali mpi ndohi tèlèba.

²⁷ Aman ndo staɗ, a gi malai, te man a yakedama na gèɗ, a vi kra ɓok, mvi staɗ, a skwi mpil gèɗ.

²⁸ Ndo mvi skwi a Zhiklè a vi skwi mpil gèɗ a sam Ndo nzi pèc pècèk a gèɗ mali man a nʼnga na a gèɗ a ndo, aman a ngècè mpre malai: te deɓ nengaʼa mali mpra.

²⁹ Ko ndo Israel tas, ko mbrok, kin ngots ma kita staɗgenè, a gèɗ ndo man mali a nʼnga na a gèɗ.

³⁰ Aman ndo ngiɗè a sun a ngaɗa malai, ko ndo kokwar, ko ndo mbrok, a ndurɗo Ndo nzi pèc pècèk. Ta da kéɗèʼa te ndev ndohi na.

³¹ A gèɗ man a nkwola ma Ndo nzi pèc pècèk, a nfa na gèɗ a ma nkwèr nengaʼa bai, sèi ta keɗaʼa, mali a zhè a gèɗ na.

Ndo mpèr shàgwa a pats nshèk va

³² Aman ndohi Israel ta zhè tʼhèshèkèɗ dai, ta ngots ndo ngiɗè man a pèr shègwa a pats nshèk va.

³³ Ndohi man ta ngots a géɗèʼa, ta ckoɗa sam Moise a Aaron, a sam mpi ndohi tèlèba.

³⁴ A ta pizlda gai, ta sun kita man ta da bèzlè a géɗ nengaʼa di bai.

³⁵ A Ndo nzi pèc pècèk a ngaɗa na Moise: Sèi ta keɗa ndo aranta. Mpi ndohi tèlèba, sèi ta da auda a dal kokwar, a ta keɗaʼa a kwa.

³⁶ A mpi ndohi tèlèba ta da auda a dal kokwar, a ta keɗaʼa a kwa, a mʼmets na, lèmèlèmè ara man Ndo nzi pèc pècèk a njè na a gèɗ a Moise.

Dzadzaɓi a va maslaka

³⁷ Ndo nzi pèc pècèk a ngaɗa na Moise:

³⁸ Gaɗa ta ndohi Israel, gada ta aman ta ga na dzadzaɓi a ma maslaka tengaʼa, a ta mana na teɓa mʼmadzaʼa a va dzadzaɓi, tengaʼa a wud wudahi tengaʼa.

³⁹ Dzadzaɓi haha da hodko kinè ma nkwèr Zhiklè tèlèba a gèɗ, a kin dzodzora, a kin dzodzor skwi man ndav kinè a di kinè a aztétékè ɓai, a kin jkeda Zhiklè ɓai.

⁴⁰ A kin hér ma nkwèr ga tèlèba, a kin dzodzora, a kin gi a ndohi nkezlaʼa a sam Zhiklè kinè.

⁴¹ Iyè Ndo nzi pèc pècèk, Zhiklè kinè, man i helka kinè auda te kokwar Egypte, aman i gi a Zhiklè kinè. Iyè Ndo nzi pèc pècèk, Zhiklè kinè.