Nombres 14 - Ma Zhiklè

Ndohi Israel ta gi ndzoan a Zhiklè

¹ Te deɓaʼa mpi ndohi tèlèba ta kèldè moslokof te ma, ta goɗ a wuɗi a wuɗai. A vaɗ sa, ndohi ta gu wobau.

² A ndohi tèlèba ta ga ta ma a va a Moise a Aaron: Mpi ndohi tèlèba ta gada ta: Dara man agassa nga mets nga te Egypte! Man bai, tʼhèshèkèɗ haha!

³ Ndo nzi pèc pècèk a hel nga a kokwar ngata a ta da bazl nga a tsakwal, a ngwozi a wudahi nga ta da gi ɓèlè èhèmè? Dara nga minè a deɓa a kokwar Egypte mèn ɗè?

⁴ A ta goɗ a va ta: Ngo-ngotsokoy ndo nce nga ma, a ngo-dokoy a deɓa a kokwar Egypte!

⁵ A Moise a Aaron ta tseda medi ta a hai a sam di mpi ndohi Israel tèlèba.

⁶ Josuè, kra Nun, a Caleb, kra Jephunné, te va ndohi man ta zeɓkoɗi kokwar, ta kuratseda maslaka ta aussa.

⁷ Te deɓaʼa ta gada ta mpi ndohi Israel tèlèba aranta: Kokwar man nga beza a pa, a nga zeɓiaʼa, kokwar man amba, amba a vata ba.

⁸ Aman Ndo nzi pèc pècèk a woya aman a ga nga skwi man amba, a slaha a de nga a kokwar sa, a va nga kokwar man vongwom a wa a hi te pa.

⁹ Aman kam kam, kin Sala na va a gèɗ a Ndo nzi pèc pècèk bai, kin gu zlau ndohi kokwar sa bai – ta da gi a skwi nga. Skwi mɓer ta azbai, a nga, Ndo nzi pèc pècèk a zhè a nda nga. Kin gu zlau tengaʼa bai!

¹⁰ A mpi ndohi tèlèba ta woy a ta kal ta a kwa; te deɓaʼa nʼnjèl Ndo nzi pèc pècèk a ngudoko ta va a di a ndohi Israel tèlèba, te gi mɓicè-va.

¹¹ A Ndo nzi pèc pècèk a ngaɗa na Moise: Ndohi haha ta kwolyè, ta derɗyè, ta da ndikèda a ngèmè? Ko ta rka skwi tèlè man i gu a sam ta, ta da cè a ndav a ngèmè?

¹² I woy a i pra ta gidibèr a va, a i zede ta. Te deɓaʼa i woy a i gi verzi ngaya a mbiaʼa a fena tengaʼa, a wuɗi kinè a fena tengaʼa.

¹³ A Moise a ngaɗa na Ndo nzi pèc pècèk: Ndohi Egypte ta da tsenaʼa. Ta suna, a ta gada: ka helka ta ndohi ngaya auda te ndev tengaʼa a wuɗi ngaya.

¹⁴ A ndohi kokwar haha ba tèlèba ta suna, ka Ndo nzi pèc pècèk ka zhè a sam ndohi ngaya haha, ka gudoko ta va a dai, ka Ndo nzi pèc pècèk, man vani ngaya a nzi a sam ta, man ka dè a ma tengaʼa te va vanai a pats, a vaɗ te va vogwa.

¹⁵ Aman ka bazl ta ndohi haha tèlèba ara man ka keɗa ndo staɗ kè! Ndohi herkeda man ta da tsena labar ma ngaya ta da gada:

¹⁶ Ndo nzi pèc pècèk a slaha a nde ta ndohi haha a kokwar man a mbada ta a pa asaɓai, a mbazl ta tʼhèshèkèɗ mènè. Ehèmè?

¹⁷ Anai geda wuɗi ngaya mbiaʼa auda, bi ga, ara man ka gaɗdahai.

¹⁸ Ndo nzi pèc pècèk a zhèr skwi a ma ma, ndo a sia te va kumba, a prè mali a mphöme a ndohai, aman a pra ta ambali ka bai, sèi a gi kita a sam wudahai a géɗ mali bab ta, te verzi bab ta, te mamakaraʼa, te mafaɗaʼa.

¹⁹ Pra ta malai a ndohi haha, ara mwoyndo ngaya mbiaʼa, ara man ka hüno te Egypte, ha patsna.

Zhiklè a hodko ma kita

²⁰ A Ndo nzi pèc pècèk a ngaɗa: I pra ta mali ara man ka dzhoɗo.

²¹ Aman a vava ara man i zhè a nshèffè, a vava ara man herkeda nʼndha a nʼnjèl Ndo nzi pèc pècèk,

²² ndohi haha tèlèba man ta rka nʼnjèl ga, a nrkedi ga man i gau te kokwar Egypte, a ta tsena ma ga bai, a ta jkedyè sak kula kula ma, a ta fa na gèɗ a ma ga bai,

²³ sèi ta da rka kokwar man i mbada ta a babhi ta asaɓai. Tengaʼa tèlèba man ta derdyè, ta da rka asaɓai.

²⁴ Sèi Caleb, ɓèl ga, man mèzhèɓ tsaɗ a zhè te ndav nengaʼa, a nco ma ga tèlèba, njèkeda bai, i woy a i da a kokwar man a zeɓkodi sa, a ndohi te verzi nengaʼa, tengaʼa ta da ndi kokwaraʼa.

²⁵ Aman Amalec a ndohi Canaan ta nza te pa dai. Angoslèm va-mena a deɓa a civèɗ hèshèkèɗ, a civèɗ ndè a ma woyam mbiaʼa!

²⁶ Te deɓaʼa Ndo nzi pèc pècèk a ngaɗa ta nda Moise a Aaron aranta:

²⁷ I da prè mali a mpi ndohi ambaɓihiaʼa haha pèc pècèk ta ahngwa? Ma man ndohi Israel ta gay a va i tsenaʼa!

²⁸ Gaɗa ta: Ara man Ndo nzi pèc pècèk a zhè, Ndo nzi pèc pècèk a gada: I woy a i ga kinè ara man kin gaɗayè a zlembaɗ ga.

²⁹ Kin tèlèba man ta nger kinè, va kinè a huslè a hèshèkèɗ haha, a hinè te mvi 20 a ndè a ma ma, kin tèlèba man kin gay ma a va,

³⁰ kin dè a kokwar man i woy a i va kinè a sam nʼnzai, ara man i mbada kinè, asaɓai, sèi Caleb, kra Jephunné, a Josué, kra Nun.

³¹ Aman wudahi kinè, man kin gi zlau ta da gi ɓèlè, i woya man i de ta a kokwar man kin kwolaʼa, a ta da ndiaʼa.

³² Va kinè a da huslè na hèshèkèɗ haha.

³³ Wudahi kinè ta da nzi a hèshè-kèɗ ara mbororohai, mvi 40, a géɗ mali kinè, ha kin ndev kinè a hèshèkèɗ.

³⁴ Aman to do a ta zeɓi kokwar, mʼmèn 40, ta vi a hèshèkèɗ 40 te diaʼa; te di pats staɗ, mvi staɗ, a géɗ mali kinè; a kin da rkaʼa, man i woy kinè a deɓa azbai.

³⁵ Iyè, Ndo nzi pèc pècèk, i goɗa. I da ga ta matakwan a mpi ndohi ambaɓihiaʼa haha, man ta humday va a gèɗ aranta; sèi da ndev ta tʼhèshèkèɗ, da bazl ta a pa!

³⁶ A ndohi man Moise a zlinde ta, aman ta zeɓi kokwar, a ta shkè ngwai a ta poko ta gèɗ auda a mpi ndohai, a ta gi ndzoan ngodzongodzoʼa, a ta menda ta ma wuɗitpa tsaɗ tsaɗ a géɗ kokwar,

³⁷ ndohi man ta menda ta ma ambaɓiaʼa a géɗ kokwar sa, ta bazl ta a nasanasa a sam Ndo nzi pèc pècèk.

³⁸ Josué, kra Nun, a Caleb, kra Jephunné, te va ndohi man ta zeɓkoɗi kokwar, man ta nza a nshèffè genè.

³⁹ Te deɓaʼa Moise a mʼmenda ta ma haha tèlèba a ndohi Israel, a ndohi ta lèyè kumba.

⁴⁰ Te mangoslèmaʼa a prèk te gai ta slambaɗa, a to do a géɗ za, a ta gada: Nga a na ma! Nga woya nga dè a sam man Ndo nzi pèc pècèk a ngra nga, nga gu malai.

⁴¹ Aman Moise a ngaɗa: Kin woya kin tawaɗaha ma man Ndo nzi pèc pècèk a njè kinè a gèɗ èhèmè? Kin ndikè a kokwar azbai!

⁴² Kin do ɓai! Ndo nzi pèc pècèk az a sam kinè bai! Mayamhi kinè ta da bazl kinè.

⁴³ Ndohi Amalek a Canaan ta zhè a ma kinè, ta da bazl kinè a tsakwal, a géɗ man kin jèkeda Ndo nzi pèc pècèk. Te man Ndo nzi pèc pècèk a nzi a va kinè azbai.

⁴⁴ Aman ta gra gèɗ ta, a to do a géɗ za. Aman koti Ndo nzi pèc pècèk a Moise ta jèkeda a sam man ta mana a pa.

⁴⁵ A ndohi Amalek a ndohi Canaan man ta nza te za sa, ta shkè a ta bazl ta ndohai, a ta dzam ta, ha ndè Horma.