Nombres 13 - Ma Zhiklè

Ndohi nzeɓi kokwar Canaan

¹ A Ndo nzi pèc pècèk a ngaɗa na Moise aranta:

² Zlinde ta ndohi ngaya, aman ta dè a ta zeɓkodi kokwar Canaan, man i woy a i va ta ndohi Israel. Zlündo ndo staɗ staɗ, te verzi ndohi staɗ staɗ tèlèba, tsuvomhi tengaʼa.

³ A Moise a nzlinde ta, man ta tʼhèshèkèɗ Paran, ara man Ndo nzi pèc pècèk a dzhoɗo. Tèlèba tsuvomhi ndohi Israel.

⁴ Nzlembaɗ tengaʼa ta a haha: Shammua, kra Zaccur, te verzi Ruben.

⁵ Shaphath, kra Hori, te verzi Siméon.

⁶ Caleb, kra Jephunné, te verzi Juda.

⁷ Jigual, kra Joseph, te verzi Issacar.

⁸ Hosée, kra Nun, te verzi Ephraim.

⁹ Palthi, kra Raphu, te verzi Benjamin.

¹⁰ Gaddiel, kra Sodi, te verzi Zabulon.

¹¹ Gaddi, kra Susi, te verzi Joseph a Manassé.

¹² Ammiel, kra Guemalli te verzi Dan.

¹³ Sethur, kra Micael, te verzi Aser.

¹⁴ Nachbi, kra Vophsi, te verzi Nephthali.

¹⁵ Guéuel, kra Maki, te verzi Gad.

¹⁶ Nasa nzlembaɗ ndohi tèlèba, man Moise a nzlinde ta, aman ta zeɓkodi kokwar. A Moise a mbaha na Hosée, kra Nun, a nzlembaɗ Josué.

¹⁷ Aman Moise a nzlinde ta a ta zeɓkodi kokwar, a ngaɗa ta: Va-beza a civèɗ man a da a za haha,

¹⁸ va-da workoɗai: kokwar a gu kè, ndohi te pa tèkè, wuɗi ta a zhi ɗè, wuɗi ta azɓi dè, ta a vata dè, ta az a vata ɓi dè?

¹⁹ Herkeda man ta te pa, sam mbelaʼa dè, sam ambaɓiaʼa dè? Kokwar man ta te pa, kokwar nʼngalɓiaʼa dè, dè nʼngalaʼa dè?

²⁰ Herkeda nɗuzo dè, nɗuza ka ɓi dè? Wof ngra te pa dè, azɓi dè? Vo-do a slagama, a kin da ngulko nyi skwi te kokwar sa! Te ndev nasa nyi wof staɗ staɗ a zhè ma.

²¹ A to do aman ta zeɓi kokwar, a hinè tʼhèshèkèɗ Tsin, ha ndè Rehob, a civèɗ ndè Hamath.

²² Ta beza a civèɗ te man a dukwad, a ta ndikè a Hébron, man Ahiman, Seshai a Talmai, te verzi Anak, te pa. Hébron a mvu 7 ma, ga ta hün nrèm kokwar Tsoan te kokwar Egypte.

²³ Te deɓaʼa ta ndikè a sam slrats Eshcol. Te pa ta ngulkoɗi ri wof a nyi nengaʼa dikciɓaʼa, ta kelawda a gada, a ndohi cèw ta zhüɓèʼa, a wondar, a kslor.

²⁴ A ta baha na samaʼa slrats Eshcol, a géɗ nyi wof man ndohi Israel ta ngulkoɗi te pa.

²⁵ Te deɓ mʼmèn 40 ta menkaɗ ta a deɓa a ngwai, te deɓ man ta zeɓa kokwar ma.

²⁶ A ta dè a ta dè a ta ndikè a sam Moise a Aaron a mpi ndohi Israel tèlèba tʼhèshèkèd Paran, te Kadès. A ta menda ta ma a mpi ndohi tèlèba, a ta ngreda ta nyi wof kokwar.

²⁷ A ta njè na Moise a ta gada na: Nga ndikè a kokwar man ka zlinde nga a pa. A vava, kokwar man wa a vongwom a hi te pa. Na haha nyi wof man nga ngulko te pa.

²⁸ Aman ndohi te pa, wuɗitpa, kokwar mbiaʼa, nʼngala te pa, nga rka wudahi Anak ba te pa.

²⁹ Ndohi Amalec ta nza te kokwar Négeb. Ndohi Heth a Jébus, a Amor, ta nza te za. Ndohi Canaan ta nza a ma woyam mbiaʼa, a ma woyam Jourdain ba.

³⁰ A Caleb a mbatsa maʼa man ndohi ta gi a sam Moise, a ngaɗa: Ngo-dokoya genè, ngo-do-dumokoy kokwar genè! Nga da fen ta!

³¹ Aman ndohi man to do a vna, ta gada: Nga slaha ndohi kokwar sa ɓai, wuɗi tengaʼa a zhè kumba, a fena wuɗi nga.

³² A ta pa ta zlau a gèɗ a ndohi Israel, a ta njè ta skwi mwuɗitpa tsaɗ tsaɗ a géɗ kokwar man ta zebkoɗai: Kokwar man nga beza a pa, a nga zebkoɗai, ta ndi ndo te pa, ndohi te pa tèlèba ngur-gurèa.

³³ Nga rka ndohi Anak te pa, verzi tengaʼa ngur-gurèa. Nga a tsagi ta ara dzuwai, a tengaʼa ba ta rka nga arsa, nga slra ta a di bai.