Nombres 12 - Ma Zhiklè

Miriam a Aaron ta ga na ma a va Moise

¹ A Miriam a ntsu drengasl, ta a Aaron, a géɗ Moise, a géɗ ngwoz Ethiopie man a mco. Ngwoz nengaʼa, dem Ethiopie.

² Ta gada: Ndo nzi pèc pècèk a gada na Moise genè dè? Nga ba, a gada nga azɓi dè? A Ndo nzi pèc pècèk a ntsenaha.

³ Moise, ndo a ndav lüɓekwaʼa, a fena ndohi ngiɗè tʼherkeda tèlèba.

⁴ Tsam-tsam Ndo nzi pèc pècèk a ngaɗa ta nda Moise a Aaron a Miriam: Vo-do auda, kin makar tèlèba, a sam gi Zhiklè! To do auda, makar tèlèba.

⁵ A Ndo nzi pèc pècèk a mshkèhi te va vanai, a nzlatsa a ntamagi Zhiklè. Te deɓaʼa a mbaha ta nda Aaron a Miriam. Ta shkè auda cèw ba.

⁶ A ngaɗa: Va-tsena ma ga zuraʼa! Aman ndo nhadka ma a zhè te ndev kinè, iyè Ndo nzi pèc pècèk i gudoko na va a dai ara nshunè, i gada na te nshunè.

⁷ A sam Moise, ɓèl ga, az arsa ɓai. Nengaʼa nlèɓèslè a sam gi ga tèlèba.

⁸ I gèɗè a nengaʼa te ma kwakwaʼa, te nshunè ka ɓai, a njkedè ndo ka ɓai. A nengaʼa a rka Mèzhèɓ Ndo nzi pèc pècèk! Kos kin ga zlau ɓai a kin ga na ma a va Moise, ɓèl ga, èhèmè?

⁹ A Ndo nzi pèc pècèk a ngu ndav worworaʼa a géɗ tengaʼa aranta, a ndo na.

¹⁰ A vanai a nshkè auda a géɗ gai. Miriam, hutsoɗ a va, nslekaɗa kudèkudèa ara mèrwèc. Aaron a rka Miriam – na haha hutsoɗ a va.

¹¹ Aaron a ngaɗa na Moise: Kam kam bi ga, ka ga nga kita a gèɗ ɓai, nga gu ara ndohi nrzlaʼa, nga gu malai.

¹² Miriam da ga a ndo mʼmetsaʼa ɓai, ara kra man ta mön mʼmènè ka ɓai, man zluèɗ va nengaʼa a husl na ma!

¹³ Te deɓaʼa Moise a nkudi a sam Ndo nzi pèc pècèk, a ngaɗa: Zhiklè, i tsi ri a ka, suɗa na hutsoɗ auda a va!

¹⁴ Aman Ndo nzi pèc pècèk a ngaɗa na Moise: Aman bab nengaʼa a nzlro a sak, hori a dza na mʼmèn tsaraɗ azɓi dè? Da nza auda mʼmèn tsaraɗ, da nza a va ndohi ga bai, te deɓaʼa da shkè a deɓa a va kinè.

¹⁵ A ta pizlda Miriam auda mʼmèn tsaraɗ, a ndohi to do a ma ma ɓai, ha ta co Miriam a deɓa ma.

¹⁶ Te deɓaʼa ndohi ta slambaɗa te Hatséroth, a to do a ma ma, a ta nza tʼhèshèkèɗ Paran.