Nombres 11 - Ma Zhiklè

Ndohi ta kuɗì a gèɗ zluèɗ

¹ A ndohi ta gu ma a sam Ndo nzi pèc pècèk. A Ndo nzi pèc pècèk a ntsenaha, a ndza na a ndav, a vogwa Ndo nzi pèc pècèk a nslambaɗa a tsagi sam man ta nza a pa, a nʼnde ta ndohi tèlèba a ma.

² Te deɓaʼa ndohi ta tsu lalau a sam Moise, a Moise a ntsu ri a Ndo nzi pèc pècèk, a vogwa a mbats na.

³ A ta baha na samaʼa Tabéra, a gèɗ man vogwa Ndo nzi pèc pècèk a nslambaɗa ta va a pa.

⁴ A ndohi ndzodzor Israel te deɓa, ta tétékè skwai, a ndohi Israel ba ta kuɗi zaʼa, a ta gada: Nda va nga zluèɗ aman a nga ndia wa?

⁵ Nga hér klèf man nga ngots te kokwar Egypte ambalai, a vai, a mbrom, a gogwom, a tèmè.

⁶ Aman anai nga her-tè nga, nga rka skwi ngiɗè ɓai, sèi manne man nga ndia genè.

⁷ Manne ara tser dau, a di ndo nara kuɗ golom.

⁸ A ndohi to do aman ta ɓicèʼa, a ta ɓertsaʼa, man ɓai ta kalaʼa, a ta taʼa te shiɗèf, man ɓai ta gu mɓelaslasla a vna. A jén ara matawai.

⁹ Aman minmèn a shkèhai a gèɗ herkeda, a sam man ndohi a pa, manne ba a shkè.

¹⁰ A Moise a ntsena ara man ndohi ta kuɗi te gi staɗ staɗ tèlèba, staɗ staɗ tèlèba a magi nengaʼa. A Ndo nzi pèc pècèk a ngu ndav kumba. Ambaha Moise ɓai.

¹¹ A Moise a ngaɗa na Ndo nzi pèc pècèk: Ka gi skwi ambaɓiaʼa a sam ɓèl ngaya èhèmè, a i ngatsa pombi a sam di ngaya ɓi èhèmè, a ka gay matakwan a ndohi haha èhèmè?

¹² Ndohi ga dè, iyè a nye ta tèlè dè, aman ka gadayè: Pe ta a ndav ngaya, ara ngwoz man a fi kra na a ndav, a kin do kinè a kokwar man ka mbada ta a hai a babhi tengaʼa!

¹³ I ngècè zluèɗ man i va ta ndohi haha tèlèba tema? Aman ta kuɗi a sam ga, a ta gada: Va-nga zluèɗ aman nga ndiaʼa!

¹⁴ I slaha ta ndohi haha a géɗ ga ɓai, ta fenyè!

¹⁵ Aman ka gu aranta a sam ga, dara ka keɗyè a i ngots pombi a sam ngaya, a i si matakwan haha asaɓai!

¹⁶ A Ndo nzi pèc pècèk a ngaɗa na Moise: ɓic ta ndohi nhalaʼa 70 a sam ga, man ka sen ta ara tsuvom ndohai, a ta zlècè a tsagi ngaya, a ma gi Zhiklè.

¹⁷ Te debaʼa i da shkè hai, a i da gada ka a pa. A i ce te va mèzhèɓ man a zhè a géɗ ngaya, a i va ta a géɗ a tengaʼa, a ta zhüɓ skwi mwuɗit pa a sam ndohai a nda ka, ka a géɗ ngaya ka bai.

¹⁸ A ka gada ta ndohai: Va-tila va kinè, angoslèm kin da ngècè zluèɗ, te man kin kuɗi a sam Ndo nzi pèc pècèk a kin gaɗa: Nda va nga zluèɗ aman a nga ndia wa? Te kokwar Egypte nga nza amba amba! Ndo nzi pèc pècèk a da va kinè zluèɗ a kin ndiaʼa.

¹⁹ Kin da ndiaʼa lèk lèk, pats staɗgenè ka bai, cèw, zlam ka bai, kula, kulkulcèw ka bai,

²⁰ aman ki staɗ, ha a zhkèha kinè tʼhtsan, ha a ngezla kinè a gèɗ, a géɗ man kin durɗo Ndo nzi pèc pècèk man a zhè te ndev kinè, a kin kuɗi a sam nengaʼa, a kin gada: Nga shkè auda te kokwar Egypte èhèmè?

²¹ A Moise a ngaɗa: Ndohi man i zhè a sam ta, ndohi nde a sak 600.000, a ka gada: i da va ta zluèɗ a ta ndiaʼa ki staɗ.

²² Ko tambakihi a zlèhi man nga zlaha ta, a dèʼa ta de?

²³ A Ndo nzi pèc pècèk a ngaɗa na Moise: Ri Ndo nzi pèc pècèk tüsl kata genè ɗè? Ka da rkaʼa: ma ga zuraʼa de, dè zuraʼa ka bi dè?

Ndohi nhalaʼa 70

²⁴ Te debaʼa Moise a mdo auda, a njè ta ma Ndo nzi pèc pècèk a ndohai. A mɓic ta ndohi nhalaʼa 70, a ta zlatsa a sam na, a ta tèuda gi Zhiklè a pa.

²⁵ A Ndo nzi pèc pècèk a mshkèhi te va vanai, a ngaɗa na: A mco te va mèzhèɓ a gèɗ Moise auda, a mpa ta a gèɗ ndohi 70, ndohi nhalaʼa. Aman mèzhèɓ a zhè a gèɗ tengaʼa ma, ta hüno a ta hodko ma: aman to do a ma ma a vna bai.

²⁶ Ndohi ngiɗè cèw ta nza te deba te gi ta; ngiɗè nzlembaɗ na Eldad, ngiɗè nzlembaɗ na Médad. A Mèzhèɓ a nshkè a géɗ tengaʼa, te man ta te va ndohi man ta Windo nzlembaɗ ta, aman to do a ma gi Zhiklè bai. A ta hodko ma te gi ta.

²⁷ A gol ngiɗè a mhu auda a nʼngra na Moise, a ngaɗa: Eldad a Médad ta hodko ma te gi ta!

²⁸ A Josué, kra Nun, ndo ntakaha Moise te gola, a hüno a ngaɗa: Moise, bi ga, ka va ta civèɗ bai!

²⁹ Aman Moise a ngaɗa na: Ka gi srak te di man a ga dè? Aman Zhiklè a ga ta ndohi tèlèba a ndohi nhadka ma, a Ndo nzi pèc pècèk a mva ta mèzhèɓ a géɗ tengaʼa, ambaɓi dè?

³⁰ Te deɓaʼa Moise a ndohi nhalaʼa to do a deɓa a sam man ndohi ta nza a pa.

Nkuɗhom te zhiklè

³¹ A Ndo nzi pèc pècèk a nzlünda kozlar, a nhulkoɗi nkuɗhomhai te civèɗ man a iyam mbiaʼa, a mwusheda ta a tsagi ndohai, a sama tèlèba. Aman ka wur a prèk, ha pats a kèlè, nkuɗhom a zhè genè, ndzegara tʼhai, a tsi ri cèw.

³² A ndohi ta slambaɗa a pats sa, a ta pèr nkuɗhomhai, a pats a vaɗ, ha te mangoslèmaʼa zaʼa. Ndo man a mpara a vata bai, a mpara a gi bho 20. A ta wuzheda a ma gi ta, a ta gwèrèʼa.

³³ Aman zluèɗ te ma dai, ga ta dè a hwaɗ, Ndo nzi pèc pècèk a gi ndav a géɗ ndohi Israel zaʼa, a nkalda ta a hai a matakwan mbiaʼa.

³⁴ A ta baha na samaʼa Kibroth-Hattava, a géɗ man ta re ta ndohi ntétékè a pa.

³⁵ A ndohi ta slambaɗa a samaʼa, a to do a ma ma a Hatséroth.