Néhémie 9 - Ma Zhiklè

Ara man ndohi ta su Zhiklè te va

¹ Ki haha, mʼmèn 24, ndohi Israel ta ɓica va, a ta jèkeda skwi nʼndai, a ta peda maslaka sam kuɗa a va, a ta peda hutsoɗ a gèɗ.

² A ndohi Israel ta ngulko va ta auda te va ndohi man verzi ta tsaɗ, a ta shkè a ta ngreda mali ta, a mali babhi ta.

³ Ta zlatsa a sam man ta a pa, a ta jongo te ɗèlèwèr ma kita Ndo nzi pèc pècèk, Zhiklè tengaʼa, a gi lʼheure makar. Lʼheure makar ngiɗè, ta ngreda mali ta, a ta gurɓahai a sam Ndo nzi pèc pècèk, Zhiklè tengaʼa.

⁴ A sam nzangalaʼa man a ndohi Lévi, Josué, Bani, Kadmiel, Shebania, Bunni, Shérébia, Bani a Kenani ta zlatsa a pa, a ta tsu ri a Ndo nzi pèc pècèk, Zhiklè tengaʼa. A ndohi Lévi: Josué, Kadmiel, Bani, Hashabnia, Shérébia, Hodija, Shebania a Pethachja, ta gaɗa:

⁵ Va-slambaɗa! Vo-slubordo Ndo nzi pèc pècèk, Zhiklè kinè, pèc pècèk a ndè a ma ma a mèdèp! A ta slubordo nzlembaɗ nengaʼa nʼnzalaʼa, man a fena mpshè ma a nʼnjèlè tèlèba.

⁶ Esdras a gaɗa: Ka staɗgenè, ka Ndo nzi pèc pècèk, Zhiklè. Ka, ka gu giɗfèk te zhiklè te géɗèʼa, a golahi Zhiklè tèlèba, a herkeda a skwi a géɗ nengaʼa tèlèba, a iyam a skwi ntʼhwaɗaʼa tèlèba. Ka vi nshèffè a skwi tèlèba, a golahi Zhiklè ta tsi ri a ka.

⁷ Ka Ndo nzi pèc pècèk Zhiklè, man ka ngotsko Abram auda, a ka da auda te kokwar Ur te Chaldée, a ka va na nzlembaɗ Abraham.

⁸ Ka ngots ndav nengaʼa nlèɓèslèʼa a sam ngaya, a ka derzla ma a nengaʼa. Ka woy a ka va na kokwar ndohi Canaan, Heth, Amor, Phérez, Jébus a Guirgas, a nengaʼa a ndohi te verzi nengaʼa. A ka gu ara man ka pasla na rai, a géɗ man ka nzuraʼa.

⁹ Ka rka matakwan babhi nga te Egypte, a ka tsena kuɗa tengaʼa a ma woyam nduzoʼa.

¹⁰ Ka ngreda skwi mbiaʼa auda, a ka gu nrkedai a sam Pharaon, a sam ndohi mizlinè nengaʼa, a sam ndohi kokwar nengaʼa tèlèba, te man ka suna, skwi man ta ga ta, ta gu a shèwa. A ka ga nzlembaɗ ngaya a mbiaʼa, ara man a zhè a patsna.

¹¹ Ka ngela iyam a ma tengaʼa, a ta beza a ndevaʼa, iyam az a pa ɓai. Ndohi man ta hu a verzi ta, ka zede ta a va iyam ara kwa te drav iyam.

¹² Te va nasa ka feda ta ma, a pats a vanai, a vaɗ a nèʼèn vogwa, a ka hela ta sam a civèɗ man ka woy a ta dè a pa.

¹³ Ka shkèhai a géɗ za Sinai, ka gaɗa ta te zhiklè, ka va ta ma kita nzuraʼa, ma nkwèr nlèɓeslèʼa, ma bai a ma man a de ta man amba.

¹⁴ Ka ngra ta pats nshèk va nkezlaʼa, ka va ta ma nkwèr ngaya, ma nde ta, a ma kita, a ka bezda na ma a ri a Moise, ɓèl ngaya.

¹⁵ Aman mi a nkeɗ ta, ka va ta movar te zhiklè; aman iyam a ndza ta, iyam a hakaɗauda te za. Ka ngra ta, aman ta dè a ta düm kokwar man ka pasla ta ri a hi a mʼmbèɗè.

¹⁶ Aman tengaʼa, babhi nga, ta gro gèɗ, ta Sala va ta, ta gu mèdègèɗ a sam ma nkwèr ngaya.

¹⁷ Ta woy a ta tsena ɓai, ta hur nrkedi man ka gu a sam ta ɓai. Ta Sala va ta, a ta woy tsuvom ta man a de ta a deɓa a kokwar Egypte. Aman ka, Zhiklè man a prè malai, man a vi pombai, man ndo a sia te va, a ka gi ndav tsam tsam, azɓai, man ka zhèr skwi a dai, ka jèke ta a pa ɓai.

¹⁸ Ko man ta gu mari guro, a ta gaɗa: Nasa Zhiklè nga man a nhelka nga auda te kokwar Egypte; ta derɗ ka kumba;

¹⁹ aman ka, a géɗ man ndo a se ka te va kumba, ka jèke ta tʼhèshèkèɗ ɓai. A pats vanai a mshkè auda a sam ta ɓai, a de ta a civèɗ; a vaɗ nèʼèn vogwa a zhè, a hela ta civèɗ man ta dè a pa.

²⁰ Ka va ta Mèzhèɓ ngaya man amba, man a senda ta skwai, ka va ta manna ngaya aman a ta ndiaʼa, a ka va ta iyam nsai.

²¹ Mvi 40 ka wara ta di tʼhèshèkèɗ, skwi man ta ngatsa te pa ɓi ba, azɓai. Maslaka tengaʼa nhal ɓai, sak tengaʼa nhezla ɓai.

²² Ka va ta kokwar-bihai, a ndohi herkeda, a ka kezla ta kokwar tengaʼa. Ta duma kokwar Sihon, bi Hesbon, a kokwar Og, bi Basan.

²³ Ka va ta wudahi kumba ara bantihai te giɗfèk, a ka de ta a kokwar man ka pasla ta ri a hi a babhi ta, aman ta da dè a pa a ta cèʼa.

²⁴ A wudahi to do a pa, a ta duma kokwar. Ka pe ta ndohi Canaan a ri a tengaʼa, a ta ge ta a ɓèlè; bihi tenga ba, a ndohi kokwar ba, a ta gi skwi a sam ta ara man ta woyaʼa.

²⁵ Ta duma kokwar mbiaʼa nʼngalaʼa, a herkeda mbelaʼa nduzoʼa. Ta duma gi a kolongwi te pa kumba, thal nraʼa klèng, gi lak, wof tsna, wof man a yiè kumba. Ta ndau skwai, ta ngeza, ta gra, ta wèl va, a ta wuffè a skwi ngaya man ka va ta kumba.

²⁶ Aman ta gu mèdègèɗ, a ta slambaɗa ka va. Ta kwola ma kita ngaya, ta bazl ta ndohi nhadka ma man ta bidka ta a deɓa, a ta derde ka kumba.

²⁷ Te deɓaʼa ka pe ta a ri a mayamhi tengaʼa man ta ga ta matakwan. Te va man ta si matakwan, ta kuɗi a sam ngaya, a ka, ka tsenaʼa te zhiklè te géɗèʼa. A géɗ man ta se ka te va, ka va ta ndohi ntakaha ta, aman ta mbel ta auda te ri mayamhi tengaʼa.

²⁸ Aman ta nzai ta ma, ta za gu skwi ambaɓiaʼa a sam ngaya zaʼa, a ka jèke ta a ri mayamhi ta man ta zumda ta gèɗ. Te deɓaʼa ta kuɗi a sam ngaya zaʼa, a ka, ka tsena te zhiklè te géɗèʼa. A géɗ man ta se ka te va, ka mbel ta sak kumba.

²⁹ Ka ngatsa ta maya, ka woy a ka helka ta a deɓa a sam ma kita ngaya. Aman tengaʼa ta gre gèɗ, ta tsena ma kita a ma nkwèr ngaya bai. Ta gu malai a sam ma man a va na nshèffè a ndo man a jèjèrèʼa. Ta gu ma, ta Sala va ta, a ta gu mèdègèɗ, ta woy a ta cinè ɓai.

³⁰ Mvi kumba ka zhèrè genè, ka zhèrè genè, ka ngatsa ta maya a Mèzhèɓ ngaya, te ma ndohi nhadka ma, aman ta tsena ɓai. Te deɓaʼa ka pe ta a ri ndohi herkeda ngiɗè.

³¹ A géɗ man ta se ka te va, ka va ta civèɗ a ta zi ta a mèdèp ɓai, te man ka Zhiklè man ndo a se ka te va, man pombi ngaya a zhè.

Ndohi ta ngreda mali ta

³² Anai Zhiklè nga, Zhiklè mbiaʼa, man wuɗi na zhè, wuɗitpa, man ka gi ara man ka derzla ma te pombai. Ka rka matakwan tèlèba man a ga nga, a bihi nga, a wud bihi nga, a ndohi mvi skwi a Zhiklè nga, a ndohi nhadka ma, babhi nga, a ndohi ngaya tèlèba, daga pats man bihi Assyrie ta zhè, ha patsna, ara skwi ambali genè ɓai.

³³ Skwi man ka ga nga tèlèba, ka gu zuraʼa, ka gu amba; aman nga, nga gu ambaɓai.

³⁴ Bihi nga, wud bihi nga, ndohi mvi skwi a Zhiklè nga, babhi nga, ta dzadzara ma kita ɓai, a ta fa gèɗ a ma nkwèr ngaya a ma man ka ngatsa ta maya a vna ɓai.

³⁵ Ta ga maya a sam ngaya bai te kokwar-bi tengaʼa, ko ta wal ta kumba a skwi man ka va ta. Ko ka va ta kokwar mbiaʼa nɗuzoʼa, ta ga mizlinè ngaya ɓai, a ta jèkeda skwi ambaɓiaʼa tengaʼa ɓai.

³⁶ Gar haha nga a patsna, nga ɓèlèlihai te kokwar man ka va ta babhi nga a ta ndi skwi te pa. Nga a kokwar nga, nga te ɓèlè.

³⁷ Skwi man nga ɓicè kumba, a bihai man ka pe ta a bai a géɗ nga. Nasa a géɗ mali nga. Ta gi bai a géɗ nga, a géɗ skwi nga, ara man ndav ta a woyaʼa, a nga si matakwan kumba.

Ndohi ta gèɗ ma a hai

³⁸ A géɗ skwi haha tèlèba, nga gèɗ ma a hai, a nga windeda ɗèlèwèr. A ɗèlèwèr man nga tkotseda pa, ta Windo nzlembaɗ bihi nga, ndohi Lévi nga a ndohi mvi skwi a Zhiklè nga a pa.