Néhémie 6 - Ma Zhiklè

Sanballat a gi wuɗi za a

¹ Aman Sanballat, a Tobija, a Guéshem, ndo Arabe, a njèkèɗi mayamhi nga, ta tsenaʼa, ara man i rèm zlazlar a ma ma, a sam mʼmbeɗaʼa mʼmbeɗaʼa civèɗ az a pa asaɓai – ko i pa ntamagi a pa di bai –

² Sanballat a Guéshem ta zlündo ndo a ta gaɗayè: Washke, nga da zli gèɗ te Kephirim, te nkulgodok Ono! Ta hur a ta woy a ta gay skwi man ambaɓai.

³ A i zlündo ndo sak a sam ta, a i gaɗa ta: I zhè a mizlinè mbiaʼa, i slaha a i dè azɓai. Mè? I jèkeda mizlinè, a i dè a sam kinè, a mizlinè a ndè a ma ma azɓi dè?

⁴ A ta zlündokoy ndo arsa a gi sak fad, a i menda ta ma lèmèlèmè.

⁵ A Sanballat a nzlündo mazlamaʼa, a ɓèl na a ncko ɗèlèwèr, a ngsa te ri ambalai.

⁶ A mwinda a pa: Ndohi ta gaɗa, Gashmu ba a gèɗèʼa: kinè a ndohi Juif kin woy a kin slambaɗa na va a bai. A gèɗ nengaʼa ka rèm zlazlar, a ka, ka da gi bi tengaʼa; i tsena aranta.

⁷ A ka ngots ndohi nhodko ma a gèɗ ngaya te Jérusalem: Nengaʼa bi Juda! Anai, ma haha a da tsenaha bai. Sèi ka shkè, a nga da cèmma!

⁸ A i zlündo ndo a sam na, a i gaɗa na: Nga gaɗa ara man ka goɗ a haha bai, ka ngul te gèɗ ngaya genè kla!

⁹ Tèlèba ta woy a ta pa nga zlau a gèɗ, a ta gaɗa: Ta hur nga da jèkeda mizlinè, a da ndivè azɓai. Aman i wosla va a mizlinè holholaʼa.

¹⁰ I do a gi Shemaeja, kra Delaja, kra Méhétabeel. Nengaʼa a nʼnza te ngwai, a gèɗ man a slaha a mshkè ɓai. A nengaʼa a ngaɗa: Ngo-do a gi Zhiklè a hwaɗaʼa, a sam nkezlaʼa, a nga pizlè ntamagai sam nkezlaʼa. Ta da shkè, ta keɗ ka. Ta da shkè a vaɗ a ta keɗ ka.

¹¹ I gaɗa: I ngur ndo ka, a i hi dè? I ndo ambalai, i slaha a i dè a gi Zhiklè, a sam nkezlaʼa, a i nzi a nshèffè dè? I dè azɓai.

¹² I suna, Zhiklè a nzlündokoda a sam ga ka bai. Nengaʼa a nhodko ma a gèɗ ga, aman Tobija a Sanballat ta tsaka na skwi aman a ngiaʼa.

¹³ Ta va na skwi èhèmè? Ta woy a ta pray zlau a va, aman i dè a i gi skwi man a gaɗayè, a i gi malai; a ndohi ta ngryè a ta derdyè te deɓaʼa.

¹⁴ Zhiklè ga, hur skwi man Tobija a Sanballat ta gau, a Noadia, ngwoz nhadka ma, a ndohi nhadka ma ngiɗè man ta wov a ta pray zlau a va!

Zlazlar nrufaʼa

¹⁵ Zlazlar nrufa ma, a ki Elul, mʼmèn 25, te deɓ mʼmèn 52.

¹⁶ Aman mayamhi nga tèlèba ta tsenaʼa, ndohi nte deɓa man ta zhè a tsagi nga tèlèba ta gi zlau, hori a keɗ ta. Ta suna, nga rufa mizlinè nga, a gèɗ man Zhiklè nga a takaha nga.

¹⁷ Te ndev nasa, aman mbibihiaʼa te Juda ta zlündo ɗèlèwèr ta kumba a sam Tobija, a dèlèwèr Tobija ba a dè a deɓa a sam ta.

¹⁸ Ndohi te Juda kumba ta derzla ma a nengaʼa te mʼmbèdè, a gèɗ man mèsh Shecania, kra Arach. Jochanan, kra na, a nco dem Meshullam, kra Bérékia, a ngwoz.

¹⁹ Ta gèɗè ma mbelaʼa a géɗ nengaʼa a di a iyè, a ta da ngryè a sam na. A Tobija a nzlündokoy ɗèlèwèr, a woya a mpray zlau a va.