Néhémie 4 - Ma Zhiklè

Ta sassaya di ta a sam mayamhai

¹ Aman Sanballat a ntsenaʼa, nga rèm zlazlar zaʼa, a ngu ndav, ndav a ndza na, a ngwossaha ta ndohi Juif,

² a goɗ a sam di kramamhi na, a nhèyè-va sojè Samarie: Ndohi Juif ntawassahia haha ta gi mè? Ta woy a ta gi wujèɗ ɗè? Ta woy a ta zli skwi a Zhiklè te va man ta düdüɓè haha dè? ta woy a ta slambaɗda kwa a nkulama man vogwa a ndarda pa haha dè?

³ Tobija, ndo Ammon, man a nzlatsa a sam na, a ngaɗa: Da rom genè! Aman moba a da nzevi a pa, kwa zlazlar haha a da wurzleda aussa azɓi da!

⁴ Tsenaʼa, Zhiklè nga, ara man ta liv nga! Nʼngwèshè man ta ngwossaha nga, ngwoda ta a gèɗ a tengaʼa! Dum ta, a ka de ta a kokwar man ta nzi a ɓèlè!

⁵ Ka pra ta mali ɓai, jèka ta mali tengaʼa man ta gu a sam ngaya a gèɗ. Aman ta kuɗofama ta ndav a ndohi nrèm kokwar.

⁶ Aranta nga rom zlazlar a ma ma, ntèuda tèlè, nɗizlè rètaʼa. A ndohi ta fa na gèɗ a va mizlinè.

⁷ Aman Sanballat a Tobija a ndohi Arabe a ndohi Ammon a ndohi Asdod ta tsenaʼa, ara man nga til zlazlar Jérusalem a ma ma, sam mʼmbeɗaʼa, mʼmbeɗaʼa, civèɗ az a pa asaɓai, ta gu ndav holholaʼa.

⁸ Ta tèlèba ta vhè ta ma a gèɗ, aman ta da gi vara Jérusalem, a ta da géɗèshèʼa.

⁹ Aman nga tsu ri a Ndo nzi pèc pècèk nga, a nga Zlatseda ndohi mɓer kokwar, a ta ɓer nga a pats a vaɗ te ri ta.

¹⁰ Ndohi Juda ta gaɗa: Wuɗi ndohi nzhüɓ skwai a herdaha va na, nkulama dungufaʼa tʼhai kumba. Nga a géɗ nga, nga slaha nga rufa zlazlar azɓai.

¹¹ Mayamhi nga ta huro: Da senaha nga ɓai, da rka nga ɓai, ha nga kala ta va, ha nga bazl ta, a nga gedassa mizlinè tengaʼa aussa aranta.

¹² Aman ndohi Juif man gi ta a tsagi tengaʼa, ta shkè a ta ngra nga, a gi kula kula ba, ara man ta shkè te sam tè-lèba, a ta da kala nga a va,

¹³ i ɗah ta ndohi a hwaɗ zlazlar, a sam man nrufa di ɓai, a ta ngheda va, a ta pi va, a tsakwal a gwèsh a lèkèɗ te rai, verzi ndohi ngiɗè a sam ngiɗè, verzi ndohi ngiɗè a sam ngiɗè.

¹⁴ A i warkoɗi tèlèba, i slambaɗa, a i gaɗa ta mbibihiaʼa a ndohi mɓer kokwar, a njèkèɗi ndohai: Kin gu zlau tengaʼa ɓai! Va-hur Ndo nzi pèc pècèk mbiaʼa, man wuɗi na zhè, va-gu var a géɗ kramamhi kinè, a géɗ wudahi kinè a dalahi kinè a ngwozi kinè a gi kinè!

¹⁵ Aman mayamhi nga ta tsenaʼa, ntsenaha nga, a Zhiklè a ngedassa nʼvhè ma tengaʼa, nga tèlèba nga mena a deɓa a sam zlazlar, staɗ staɗ tèlèba a sam mizlinè na.

Ndohi ta zlatsa a tsakwal

¹⁶ A hüno a pats sa, sèi rèta ndohi ga ta gu mizlinè. Rèta ngiɗè ta zlatsa a tsakwal, a gambar, a gwèsh, a lèkèɗ, a sojèhi ta ɓer ndohi Juda tèlèba,

¹⁷ man ta gu mizlinè zlazlar. A ndohi nʼnderh skwai man ta gu mizlinè – a ri ngiɗè ta gu mizlinè – a ri ngiɗè ta gso skwi var.

¹⁸ Tengaʼa man ta rom zlazlar, staɗ staɗ tèlèba a gwèsh te zlazlar, a ta gu mizlinè arsa. Ndo ntsi tolom a nzlatsa a tsagi ga.

¹⁹ A i gaɗa ta mbibihiaʼa a ndohi mɓer kokwar, a njèkèɗi ndohai: Mizlinè mbiaʼa, zlazlar mbiaʼa, nga a géɗ zlazlar, nga vendaʼa, ngiɗè dra a ngiɗè.

²⁰ A sam man kin da tsena tolom, va-ɓicka nga va a tsagai. Zhiklè nga a da gi var te di man a nga.

²¹ Aranta nga gu mizlinè zlazlar, rèta ndohai a tsakwal te rai; nga hüno daga prèk, ha nday-nday bantai.

²² Te ndev nasa i gaɗa ta ndohai: Staɗ staɗ tèlèba da mana a sam ndohi na te Jérusalem, amari a vaɗ ta ɓer nga, a pats ta wush? a va mizlinè.

²³ Ko iyè, ko kramamhi ga, ko ndohi mizlinè ga, ko ndohi mɓer nga, nga suɗa maslaka a hi a va ɓai. Staɗ staɗ tèlèba a gwèsh te zlazlar.