Néhémie 3 - Ma Zhiklè

Ntil mizlinè

¹ Eliashib, bi ndohi mvi skwi a Zhiklè, a nslambada a nda ndohi mvi skwi a Zhiklè, kramamhi na, a ta gu ntamagi ‘tambak’. Tengaʼa man ta vu ntatakaʼa, a ta derzla ntamagai. A ta rom a ma ma, ha ndè a sam ntamagi ‘tèmère’, ha ndè a gi ngurèa Hananel.

² A tsagi nengaʼa, ndohi Jéricho ta roma, a Zaccur ba, kra Imri.

³ Ndohi Senaa ta gu ntamagi ‘klèf’. Tenga a bozlo wofaʼa, a ta pizlè ntamagai a skwi mɓèr ntamagai.

⁴ A tsagi tengaʼa, Merémoth, kra Urie, kra Hakkots, a ngu mizlinè. A tsagi tengaʼa Meshullam, kra Bérékia, kra Meshézabeel, a ngu mizlinè. A tsagi tengaʼa Tsadok, kra Baana, a ngu mizlinè.

⁵ A tsagi tengaʼa ndohi Tekoa, ta gu mizlinè. Aman mbibihia tengaʼa ta woy a ta fi ri a mizlinè bi ɓai.

⁶ Jojada, kra Paséach, a Meshullam, kra Besodia, ta gu mizlinè a ntamagi nhalaʼa. Ta bozlo wofaʼa, a ta pizlè ntamagai a skwi mɓèr ntamagai.

⁷ A tsagi tengaʼa Melatia, ndo Gabaon, a Jadon, ndo Méronoth, a ndohi Gabaon a Mitspa, man ngomna te wud woyam te civèɗ mvèng pats a bèzlè kita a sam ta, ta gu mizlinè.

⁸ A tsagi tengaʼa Uzziel, kra Harhaja, te va ndohi mviɗè guro, a ngu mizlinè. A tsagi tengaʼa Hanania, te va ndohi ncèkè-slè mbar, a ngu mizlinè. A ta rufa kokwar Jérusalem, ha ndè a ma zlazlar mbiaʼa.

⁹ A tsagi tengaʼa Rephaja, kra Hur, bi a géɗ kokwar Jérusalem rètaʼa, a ngu mizlinè.

¹⁰ A tsagi tengaʼa Jedaja, kra Harumaph, a ngu mizlinè, zuraʼa a ma gi nengaʼa. A tsagi nengaʼa Hattush, kra Hashabnia, a ngu mizlinè.

¹¹ Malkija, kra Harim, a Hashub, kra Pachath-Moab, ta gu mizlinè a sam ngiɗè, a ta ndika a gi ngurèʼa ‘gezla’.

¹² A tsagi tengaʼa Shallum, kra Hallochesh, bi a géɗ kokwar Jérusalem rètaʼa, a ngu mizlinè, a dalahi nengaʼa.

¹³ Hanun a ndohi kokwar Zanoach ta gu mizlinè a ntamagi ‘slrats’. Tengaʼa ta bozlo wofaʼa, ta pizlè ntamagai a skwi mɓèr ntamagai. Zlazlar a tsi ri 1.000, ha ndè a ntamagi ‘ndaderɗa’.

¹⁴ Malkija, kra Récab, bi a géɗ sam kokwar Beth-Hakkérem, a ngu mizlinè a ntamagi ‘ndaderɗa’. Nengaʼa a mbozlo wofaʼa, a mpizlè ntamagai, a skwi mɓèr ntamagai.

¹⁵ Shallum, kra Col-Hozé, bi a géɗ sam kokwar Mitspa, a ngu mizlinè a ntamagi ‘nlèlè’. Nengaʼa a mbozlo wofaʼa, a ngeda mozodo a géɗèʼa, a mpizlè ntamagai a skwi mɓer ntamagai, a zlazlar a sam nhèyè iyam a gi lak bai, ha nde a sam ntiv-ntivè a gihi David.

¹⁶ Te deɓaʼa Néhémie, kra Azbuk, bi a géɗ sam kokwar Beth-Tsur, a ngu mizlinè, zuraʼa a ma gidzavi David, ha nde a sam nhèyè iyam, ha ndè a sam gi ndohi var.

¹⁷ Te deɓ nengaʼa ndohi Lévi ta gu mizlinè, a verzi Rehum, kra Bani. A tsagi nengaʼa Hashabia, bi a géɗ rèta Keila, a ngu mizlinè te di man a tengaʼa.

¹⁸ Te deɓ nengaʼa kramamhi tengaʼa ta gu mizlinè: Bavvai, kra Hènadad, bi a géɗ rèta Keila.

¹⁹ A tsagi nengaʼa Ezer, kra Josuè, bi Mitspa, a ngu mizlinè, a ntila zlazlar zuraʼa a sam ntiv-ntivè a gi kolongwi var, a sam nʼngèldè zlazlar.

²⁰ A tsagi nengaʼa Baruc, kra Zabbai, a nhera na gèɗ a va mizlinè. A hüno a sam ndérzlè zlazlar, ha a nde a ntamagi Eliashib, bi ndohi mvi skwi a Zhiklè.

²¹ A tsagi nengaʼa Merémoth, kra Urie, kra Hakkots, a ngu mizlinè, a hüno a ntamagi Eliashib, ha ndè a daɓagi Eliashib.

²² A sam ngiɗè, ndohi mvi skwi a Zhiklè ta gu mizinè, man ta nza a kokwar man a tsagiaʼa.

²³ A tsagi tengaʼa Benjamin a Hashub, zuraʼa a ma gi tengaʼa. Te deɓaʼa Azaria, kra Maaséja, kra Anania, a ngu mizlinè, a tsagi gi na.

²⁴ A tsagi nengaʼa Binnui, kra Henadad, a ngu mizlinè, a hüno te gi Azaria, ha ndè a sam nʼngèldè zlazlar, a sam ndérzlè zlazlar.

²⁵ Palal, kra Uzai, a ngu mizlinè zuraʼa a sam ndérzlè zlazlar, zuraʼa a ma gi ngurèa te man a géɗèʼa, man a tsi gèɗ auda a sam gi bai, a dal mɓer gi bai. A tsagi nengaʼa Pedaja, kra Pareosh, a ngu mizlinè,

²⁶ ha ndè zuraʼa a ma ntamagi ‘iyam’, te civèɗ mvèng pats, a gi ngurèʼa man a tsi gèɗ auda.

²⁷ A tsagi tengaʼa ndohi Tekoa ta gu mizlinè, zuraʼa a ma gi ngurèʼa man a tsi gèɗ auda, ha ndè a ma zlazlar Ophel.

²⁸ A ntamagi ‘plèsh’, te man a géɗèʼa, ndohi mvi skwi a Zhiklè ta gu mizlinè, staɗ staɗ tèlèba zuraʼa a ma gi nengaʼa.

²⁹ A tsagi tengaʼa Tsadok, kra Immer, a ngu mizlinè zuraʼa a ma gi nengaʼa. A tsagi nengaʼa Shemaeja, kra Shecania, ndo mɓer ntamagai te civèɗ mvèng pats, a ngu mizlinè.

³⁰ A tsagi tengaʼa Hanania, kra Shélémia a Hanun, kra Tsalaph mamokwaʼa, ta gu mizlinè zlazlar. A tsagi tengaʼa Meshullam, kra Bérékia, a ngu mizlinè, zuraʼa a magi na.

³¹ A tsagi nengaʼa Malkija, te va ndohi mviɗè guro, a ngu mizlinè, ha ndè a ma gi ndohi nderh iyam, a ndohi ganai, zuraʼa a ntamagi ‘mɓer kokwar’, ha ndè a gi nte géɗèʼa, a sam nʼngèldè zlazlar.

³² Te ndev gi nte géɗèʼa, a sam nʼngèldè zlazlar, a ntamagi ‘tambak’, ndohi mviɗè guro a ndohi ganai ta gu mizlinè a pa.