Néhémie 2 - Ma Zhiklè

Néhémie a dè Jérusalem

¹ A ki Nisan, aman Artaherhes bi te mvi 20aʼa, i ɓala na zom a bai. Di ga beswutaʼa.

² A bai a ngaɗayè: Di ngaya beswutaʼa, skwa a dza ka dè? Ani sa, skwi ngiɗè man a dza ka a ndav a zhè. A i gi zlau a vata,

³ a i gaɗa na bai: Bi da zhè a nshèffè! Di ga a gi beswutaʼa azɓi èhèmè? Kokwar man ta rda babhi ga a pa, ngedas na, vogwa a nʼndeda ntamagi kokwar a ma.

⁴ Bai a ngaɗayè: Kos ka war mè? A i tsu ri a Zhiklè te zhiklè te géɗèʼa,

⁵ a i gaɗa na bai: Aman ambaha bai, aman iyè ɓèl ngaya, ambaha ka, zlindyè a kokwar Juda, a i da rèm kokwar man ta rda babhi ga a pa zaʼa.

⁶ A bai a ngaɗayè – ngwoz bai a nʼnza a tsagi na: Ka da nzaka kumba dè? Ka da shkè a deɓa a ngèmè? A bai a nco, aman a zlindyè, te deɓ man i ngra na pats man i da shkè a deɓa.

⁷ A i gaɗa na bai: Aman ambaha bai, da vay ɗèlèwèr a ngomnahi te wud woyam te civèɗ mvèng pats, a ta vay civèɗ a i ndikè a kokwar Juda;

⁸ a ɗèlèwèr a Asaph, ndo mɓer sam nhèyè wofhai, a mvay wof a nga gi ntamagi gi ndakmaʼa a sam gi Zhiklè a vna, a ntamagi zlazlar kokwar, a ntamagi gi ga man i da nzi a pa. A bai a mvayè, a géɗ man Zhiklè a ntakahayè a ri nenga a man amba.

⁹ A i ndika a sam ngomnahai te wud woyam, a i va ta ɗèlèwèr bai. Bi a mpay bihi sojè a ndohi plèsh a verzai.

¹⁰ Aman Sanballat, ndo Horon, a Tobija, ndo mizlinè Ammon, ta tsenaʼa, ndo a mshkè, a woya a ntakaha ta ndohi Israel, ta gu ndav a vata.

Néhémie a wèr zlazlar

¹¹ Aman i ndika a kokwar Jérusalem, i mana a pa makar.

¹² Te deɓaʼa i slambaɗa, a vaɗ, nga a ndohi ngiɗè kètè. Skwi man Zhiklè a ngaɗayè te ndav ga, man i da gi a géɗ kokwar Jérusalem, i ngra na ndo ɓai. Plèsh ngiɗè az a sam ga bai, sèi di man i nza a deɓaʼa.

¹³ A i do a vaɗ a deɓ plèsh, a i beza a ntamagi ‘slrats’, a civèɗ ndè a ntamagi thal ‘kedam’, a ntamagi ‘ndaderɗa’, a i wor zlazlar Jérusalem, a sam mʼmbeɗaʼa, a ntamagi nengaʼa man vogwa a ndeda ma.

¹⁴ Te debaʼa i do a sam ntamagi ‘nlèlè iyam’, a sam nhèyè-va iyam bai, a civèɗ man plèsh ga a bizhè a pa azɓai.

¹⁵ A i do a sak, a vaɗ, a i teva a pa, a i rka zlazlar, a i shkè a deɓa, a i do ngwai, a i beza a ntamagi ‘slrats’.

¹⁶ Ndohi mɓer kokwar ta sun sam man i shkè te pa, a skwi man i gu ɓai. Ha pats sa, i ngra ta ndohi Juif a ndohi mvi skwi a Zhiklè, a mbibihiaʼa, a ndohi mɓer kokwar, a ndohi ngiɗè man mizlinè te ri tengaʼa, ɓai.

Ta rèmè zaʼa

¹⁷ Te deɓaʼa i gaɗa ta: Kin rka skwi mwuɗitpa man a ga nga, ara man Jérusalem ngedas na, a vogwa a nʼndeda ntamagi nengaʼa a ma. Vo-washkè, ngo-romokoy zlazlar Jérusalem zaʼa, a ngo-cokoy hori auda a di nga!

¹⁸ I gaɗa ta, aman Zhiklè ga, a ntakahayè a ri nengaʼa man amba, a ma man bi a ngaɗayè. Te deɓaʼa ta gaɗa: Nga woy a nga slèmbèɗè a nga rèmèʼa! Aranta ta hüno mizlinè man amba.

¹⁹ Sanballat, ndo Horon, Tobija, ndo mizlinè Ammon, a Guéshem, ndo Arabe, ta tsenaʼa, a ta ngwossaha nga, a ta derde nga, a ta gaɗa: Skwi mè man kin woy a kin giaʼa? Kin woy a kin Sala na va a gèɗ a bi ɗè?

²⁰ A i mbeɗa ta a ma: Zhiklè te zhiklè te géɗèʼa a da takaha nga, a nga da ndikeda. Gar haha nga, ɓèlèlihi na, nga hinè mizlinè a nga rèmèʼa. Aman kine, Jérusalem a kinè ka ɓai, ma kinè ka ɓai; ta sen kinè te Jérusalem ɓai.