Néhémie 13 - Ma Zhiklè

Néhémie a til skwai

¹ Te ndev nasa, ta jongo te ɗèlèwèr Moise, a sam di ndohai, a ta ngotso: ndo Ammon a ndo Moab ta slaha ta humdè va a va mpi ndohi Zhiklè azɓai,

² a géɗ man ta lamaha ta ndohi Israel a movar a iyam ɓai, a ta baha na Baalam, da phomda Israel; aman Zhiklè a ngwoda ma mphomdaʼa a ma mpshè ma.

³ Aman ta tsena ma kita haha, ta porkoɗi ndohi man verzi ngiɗè auda te va ndohi Israel tèlèba.

Néhémie a ga na ndzoan a Eliashib

⁴ Ga ta giaʼa, Eliashib, ndo mvi skwi a Zhiklè, man a gu mizlinè te gi Zhiklè nga tʼhwaɗaʼa, gwoli Tobija,

⁵ a ntila gi mbiaʼa a Tobija, man zlèzlèʼa ta feda skwi man ta va na Zhiklè a pa, a ɓurdi, a kolongwai, a dau a marorai a mbar, skwi staɗ staɗ te va 10, man ta goɗ a géɗ ndohi Lévi, ndohi nfi dimèsh a ndohi mɓer ntamagai, a skwi man ndohi mvi skwi a Zhiklè ta ngotso.

⁶ Te va man ta gu skwi haha, iyè a te Jérusalem ɓai, te man a vi man Artaherhes bi Babylone, te mvi 32, i do a deɓa a sam bai. Te deɓ kètè bi a mvay civèɗ,

⁷ a i shkè a deɓa a kokwar Jérusalem, a i rka skwi man ambaɓai man Eliashib a gau, aman a ntila na gi a Tobija tʼhwaɗ gi Zhiklè.

⁸ I gu ndav kumba, a i wusheda kolongwi Tobija auda te gi Zhiklè.

⁹ Te deɓaʼa i goɗ aman ta til gai, a i feda kolongwi gi Zhiklè, skwi man nga va na Zhiklè, a ɓurdi, a deɓa.

A géɗ ndohi Lévi

¹⁰ I tsenaʼa a vaʼa, ara man ndohi ta va ta skwi a ndohi Lévi ɓai. A ndohi Lévi a ndohi nfi dimèsh man ta gu mizlinè to do ta a deɓa, staɗ staɗ tèlèba, a gi dau na.

¹¹ A i ga ta ndzoan a ndohi mɓer kokwar, a i gaɗa ta: Ta jèkeda nwèr di gi Zhiklè èhèmè? A i ɓic ta, a i pe ta a deɓa a sam mizlinè ta.

¹² Juda tèlèba a nhulkoɗi dau, marori, mbar, skwi staɗ te va 10, a gi mɓicè skwai.

¹³ A i ga Shélémia, ndo mvi skwi a Zhiklè, a Tsadok, ndo ɗèlèwèr, a Pedaja, te va ndohi Lévi, a nda Hanan, kra Zaccur, te verzi Matthania, a ndo mɓer gi mɓicè skwai. A vava tengaʼa ta rka ta ara ndohi nlèɓèslèʼa. Mizlinè tengaʼa, aman ta kezla ta skwi a kramamhi ta.

¹⁴ Zhiklè ga, heryè, a géɗ skwi haha, a skwi man i gau a géɗ man i woya gi Zhiklè ga, a mizlinè nengaʼa. Da pca ka a gèɗ ɓai!

A géɗ pats nshèk va

¹⁵ Te ndev nasa i rka ndohi Juda, man ta kèl skwi te klok a pats nshèk va Zhiklè, man ta nderhè dau a ngwai a deɓ kdèh, a iyam nyi wof, nyi wof, kslor, a skwi tsaɗ tsaɗ, a ta hulkoda a kokwar Jérusalem a pats nshèk va. A i ga ta ndzoan, a pats man ta prè skwi nʼndai.

¹⁶ Ndohi Tyr ta shkè a ta nza a Jérusalem, ta hulkoɗi klèf a skwi gani tsaɗ tsaɗ, a ta prèʼa a pats nshhèk va a ndohi Juda ba a ndohi te kokwar Jérusalem ba.

¹⁷ A i ga ta ndzoan a mbibihiaʼa te Juda, a i gaɗa ta: Kin hér mè a géɗ skwi ambaɓiaʼa man kin gi a haha, a kin dérɗè pats nshèk va èhèmè?

¹⁸ Babhi nga ta ga arsa ɓi dè? A Zhiklè nga a nkalde nga, a kokwar nga, a matakwan haha tèlèba ka ɓi dè? Kin poko na gèɗ ndav auda zaʼa, a Zhiklè a gi ndav holholaʼa a géɗ Israel, a géɗ man kin durɗo pats nshèk va.

¹⁹ A pats man te mangoslèmaʼa pats nshèk va, ga sam a kézhèwè, i gaɗa ta, aman ta pizlè ntamagi kokwar Jérusalem, a ta winè azɓai, ha pats nshèk va klèng. I baha ta golahi ga ngiɗè, aman ta nza a ntamagi kokwar, a ndohi ta slaha ta nderhè skwi a kokwar a pats nshèk va azɓai.

²⁰ Ndohi nsum skwai, a ndohi mprè skwai tsaɗ tsaɗ tèlèba ta gu mana a dala, mana a dala, a ntamagi kokwar Jérusalem, a gi sak cèw ba.

²¹ I ngatsa ta maya, a i gaɗa ta: Kin mana auda a deɓ zlazlar èhèmè? Aman kin da gi arsa zaʼa, i da ndah kinè! Te deɓaʼa ta jèkeda, a ta shkè a deɓa a pats nshèk va asaɓai.

²² A i gaɗa ta ndohi Lévi, aman ta tila ndav ta, a ta shkè, aman ta ɓer ntamagai, a ta rka pats nshèk va ara pats nkezlaʼa. Zhiklè ga, ko te skwi haha ba, heryè, vay pombai, i da se ka te va!

A géɗ ncè ngwoz man verzi na tsaɗ

²³ Te ndev nasa, i rka ndohi Juif man ta co ngwoz Asdod, Ammon, Moab.

²⁴ Rèta wudahi tengaʼa ta goɗ daʼai Asdod, daʼai kokwar mam ta; daʼai Juif ta sun ɓai.

²⁵ I ga ta ndzoan, a i phomde ta: I ndah ta tengahiaʼa ngiɗè – i ptsoma ta gwots auda te gèɗ. A i dzhoɗo, aman ta mbèɗè a nzlembaɗ Zhiklè: Kin venu ngwoz a va a nda tengaʼa ɓai!

²⁶ Aranta Salomon, bi Israel, a gu mali ka ɓi ɗè? Te va ndohi tèlèba, bi ngiɗè gar nengaʼa azɓai. Zhiklè a woyaʼa. Zhiklè a nfu a bi a géɗ Israel tèlèba. Nengaʼa ba, ngwozi man verzi ta tsaɗ, ta peda a wai a ngi malai.

²⁷ Skwi man kin gu haha, ambaɓai; kin gu mali mbiaʼa, kin gu skwi ambaɓiaʼa a sam Zhiklè nga, aman kin co ngwoz man verzi na tsaɗ.

²⁸ Kra Jojada ngiɗè, te verzi Eliashib, bi ndohi mvi skwi a Zhiklè, mèsh Sanballat, ndo Horon, man a gu arsa, i dzamdauda a sam ga a géɗ nengaʼa.

²⁹ Zhiklè ga, skwi man ta gau, da pca ka a gèɗ ɓai, te man ta lizhè mizlinè nkezlaʼa, a nder-zlè-ma ndohi mvi skwi a Zhiklè a ndohi Lévi.

³⁰ Aranta i til ta, a i hulko na skwi man verzi tsaɗ tsaɗ tsaɗ tèlèba auda. I til mizlinè ndohi mvi skwi a Zhiklè a ndohi Lévi, a i va ta ma nde ta, staɗ staɗ tèlèba a sam mizlinè na;

³¹ a géɗ shègwa man ta viaʼa, pats ngiɗè, pats ngiɗè, a géɗ tsuvom skwai. Zhiklè ga, heryè, a ka gay skwi man amba!