Néhémie 11 - Ma Zhiklè

Ndohi man ta nzi te Jérusalem

¹ Tsuvom ndohai ta nza te Jérusalem. Njèkè ndohai man jimèr nkala a gèɗ tengaʼa, staɗ te va 10 a mshkè aman a nzi a kokwar Jérusalem, kokwar nkezlaʼa. Njèkèɗia 9 ta te kokwar ngiɗè.

² Ndohi ta shüd gèɗ a géɗ ndohi man ta huro, aman ta nzi a kokwar Jérusalem.

³ Tsuvomhi kokwar ta nza te Jérusalem. Aman te kokwar Juda ngiɗè, Israel, ndohi mvi skwi a Zhiklè, ndohi Lévi, ndohi ntil gi Zhiklè, a wudahi ɓèlèlihi Salomon, staɗ staɗ tèlèba a nʼnza te gi dau na, te kokwar na.

⁴ Ndohi man ta nza te Jérusalem: wudahi Juda a wudahi Benjamin. Te va wudahi Juda: Athaja, kra Ozias, te verzi Zacharie, te verzi Amaria, te verzi Shaphathia, te verzi Mahalaleel, te verzi Pérets,

⁵ te verzi Maaséja, te verzi Baruc, te verzi Col-Hozé, te verzi Hazaja, te verzi Adaja, te verzi Jojarib, te verzi Zacharie, te verzi Shiloni.

⁶ Wudahi Pérets tèlèba man ta nza te Jérusalem, ndohi var 468.

⁷ Te va wudahi Benjamin: Sallu, te verzi Meshullam, te verzi Joed, te verzi Pedaja, te verzi Kolaja, te verzi Maaséja, te verzi Ithiel, te verzi Esaie.

⁸ A kramamhi nengaʼa, Gabbai a Sallai, tèlèba 928.

⁹ Joel, kra Zicra, bi tengaʼa. Juda, kra Senua, slaslam kokwar.

¹⁰ Te va ndohi mvi skwi a Zhiklè: Jedaeja, kra Jojarib, te verzi Jakin, te verzi Seraja, te verzi Hilkija,

¹¹ te verzi Meshullam, te verzi Tsadok, te verzi Merajoth, te verzi Achithub, kra bai te gi Zhiklè.

¹² Kramamhi ta man ta gu mizlinè te gi Zhiklè, 822. Adaja, te verzi Jerocham, te verzi Pelalia, te verzi Amtsi, te verzi Zacharie, te verzi Pashur, te verzi Malkija,

¹³ a kramamhi na, tsuvom ndohai 242. A Amashsai, te verzi Azareel, te verzi Achzai, te verzi Meshillémoth, te verzi Immer, a kramamhi ta,

¹⁴ ndohi var 128. A Zabdiel, te verzi Tuedolim, bi tengaʼa.

¹⁵ Te va ndohi Lévi: Shemaeja, kra Hashub, te verzi Azrikam, te verzi Hashabia, te verzi Bunni;

¹⁶ a Shabbethai a Jozabad, te va tsuvomhi Lévi, man ta gu mizlinè a dalmagi gi Zhiklè.

¹⁷ Matthania, te verzi Michée, te verzi Zabdi, te verzi Asaph, man a nfu dimèsh nshid géɗ a sam ntsi rai. Bakbukia, kramam nengaʼa macecèwaʼa, a Abda, te verzi Shammua,

¹⁸ te verzi Galal, te verzi Jeduthun. Ndohi Lévi tèlèba man ta nza te kokwar nkezlaʼa, 284.

¹⁹ A ndohi mɓer ntamagai: Akkub, Thalmon a kramamhi ta, ndohi nʼnza a ntamagai, 172.

²⁰ Njèkèɗi ndohi Israel, ndohi mvi skwi a Zhiklè, ndohi Lévi, te kokwar Juda tèlèba, staɗ staɗ tèlèba te skwi nʼndi gi na.

²¹ Ndohi ntil gi Zhiklè ta nza te Ophel. Tsicha a Guishpa tsuvomhi ndohi ntil gi Zhiklè.

²² Tsuvom ndohi Lévi te Jérusalem: Uzzi, kra Bani, te verzi Hashabia, te verzi Matthania, te verzi Michée, te va wudahi Asaph, staɗ te va ndohi nfi dimèsh man a gi mizlinè te gi Zhiklè.

²³ Bai a ntila mizlinè tengaʼa a ɗèlèwèr ndè mizlinè ndohi nfi dimèsh pèc pècèk.

²⁴ Te va wudahi Zérach, Pethachja ndo sak bai a géɗ ma ndohi tèlèba; nengaʼa te verzi Meshé-zabeel, te verzi Juda.

A dal kokwar Jérusalem

²⁵ Te kokwar, te gi dau ta: wudahi Juda ta nza te Kiijath-Arba a kokwarhi man a tsagai, te Dibon a kokwarhi man a tsagai, te Jekabtseel a kokwarhi man a tsagai,

²⁶ te Jeshua, te Molada, te Beth-Paleth, te Hatsar-Shual,

²⁷ te Beer-Shéba a kokwarhi man a tsagai,

²⁸ te Tsiklag, te Mecona a kokwarhi man a tsagai,

²⁹ te En-Rimmon, te Tsorea, te Jarmuth,

³⁰ te Zanoach, te Adullam a kokwarhi man a tsagai, te Lakis a kokwarhi nengaʼa, te Azéka a kokwarhi man a tsagai. Ta nzahai te Beer-Shéba, ha ndè a nkulgodok Hinnom.

³¹ Wudahi Benjamin ta nza te Guéba, te Micmash, te Ajja, te Bethel a kokwarhi man a tsagai,

³² te Anathoth, te Nob, te Hanania,

³³ te Hatsor, te Rama, te Guittaim,

³⁴ te Hadid, te Tseboim, te Heballath,

³⁵ te Lod, te Ono, slrats ndohi mizlinè.

³⁶ Te va ndohi Lévi matrhiaʼa ta shkè a kokwar Benjamin, ko ta te va Juda.