Néhémie 1 - Ma Zhiklè

Néhémie a tsi ri a géɗ Jérusalem

¹ Ma Néhémie, kra Hacalia. A ki Kislev, te mvi 20aʼa, i zhe te Suse, te kokwar bai.

² Hanani, kramam ga, a ndohi ngiɗè kètè ta shkè te Juda, a i dzhaɗ ta a géɗ ndohi Juif man ta men ta a deɓa te ɓèlè. Ndohi Juif ta gi mè? A i dzhaɗ ta a géɗ kokwar Jérusalem.

³ A ta gaɗayè: Njèkèɗi ndohi man ta shkè a deɓa te ɓèlè, skwi mwuɗitpa a ga ta, hori a dza ta. Zlazlar Jérusalem mʼmbeɗ na. Ntamagi kokwar, vogwa a nʼndeda ma.

⁴ Aman i tsena ma haha, a i nzahai, a i kuɗai, a i lèyè mʼmèn kumba. Te deɓaʼa i jèkeda skwi nʼndai, a i tsu ri a sam Zhiklè te zhiklè te géɗèʼa.

⁵ I gaɗa: Ka Ndo nzi pèc pècèk, Zhiklè te zhiklè te géɗèʼa, Zhiklè mbiaʼa, mwuɗitpa, man ka prè nderzlè-ma te pombai a nda ndohi man ta woya a ta jèjèr ma nkwèr ngaya, azɓai.

⁶ Foko zlembaɗ, poko dai, tsena ntsi ri ɓèl ngaya, man i tsi ri a ka a pats a vaɗ a géɗ ndohi Israel, ɓèlèlihi ngaya, a i njè ma mali ndohi Israel. Nga gu mali a sam ngaya. Ko i ba a ndohi gi bab ga, nga gu malai.

⁷ A vava nga gu skwi man ambaɓi kumba a sam ngaya, nga dzadzara ma nkwèr ngaya ɓai, ma kita, ma nde nga man ka va na Moise, ɓél ngaya.

⁸ Hur ma man ka gaɗa na Moise, ɓèl ngaya: Aman kin gi mali a sam ga, i venda kinè a va ndohi herkeda.

⁹ Aman kin da menkada deɓa a sam ga, a kin jèjèr ma nkwèr ga zuraʼa, ko kin venda gèɗ a verzi herkeda, i da ɓicka kinè a deɓa, a i de kinè a sam man i ngotskoɗauda, a nzlembaɗ ga da nza a pa.

¹⁰ Tengaʼa ta ɓèlèlihi ngaya, ndohi ngaya, man ka preka ta auda a wuɗi ngaya mbiaʼa, a ri ngaya man wuɗi na zhè.

¹¹ Wa Ndo nzi pèc pècèk, foko zlembaɗ a ntsi ri ɓèl ngaya, a ntsi ri ɓèlèlihi ngaya man ta woy a ta gi zlau nzlembaɗ ngaya! Halau, takaha ɓèl ngaya a patsna, i da su bi ga te va! Te ndev nasa i ndo ngsa na zom a bai.