Nahum 3 - Ma Zhiklè

¹ Wobau a géɗ kokwar man ta keɗa ndo te pa, nʼndha a ncèkèlma, a ngi skwi a wuɗai. Metsar a ndev ɓi te pa!

² Mènèwèɗ a cinè te pa, kuɗ kiki var, sak plèsh man a hai, a sak kiki man a nzevi a géɗ kwa.

³ Ndohi a deɓ plèsh ta gujö-koda va, tsakwal a gwèsh ta si dai, aman ta gidèʼa. Ndohi man mblè a va kumbá, ndohi mbazlaʼa a vata, a nckondohai ta ndev ɓai. A slafaɗama ta sak a ndohai.

⁴ Nasa a géɗ mphömè fali-ngwoz, man mbambi a dai, man ndohi ta woya kumba, a pa ta pa a ndav, a zedama ta maya a ndohi herkeda kumba a mʼmbèh skwi nengaʼa.

⁵ Na haha i woy a i ga ka kita, Zhiklè bi mbiaʼa, a gaɗa. I cèma ka maslaka auda a gèɗ, a ndohi herkeda ta rka ka adai, a kokwar-bihai ta rka hori a di ngaya.

⁶ I pa ka koskosi a deɓa, i ngwossede ka hi a sam ndohai.

Ndohi Ninive ta hi ta

⁷ Ko wawa man a da rka ka, a da hi na auda a sam ngaya, a gaɗa: Ninive ngedassa ma! Nda kuɗiaʼa wa? Ndè bidèʼa wa?

⁸ Ka fena No-Amon man a zhè a ma woyam ɗè, man iyam a tèuda a pa, iyam mbiaʼa ara gi nengaʼa ndakmaʼa, iyam zlazlar na.

⁹ Ethiopie a Egypte wuɗi na te va nasa, man kokwar a vata. Puth a Libye ta takaha.

¹⁰ Aman nengaʼa ba ta heldama a ɓèlè. Ko wudahi nengaʼa ba ta bazl ta a zolom civèɗ. Ta gu jimèr a géɗ bigolahi nengaʼa, a ndohi nengaʼa mbibihiaʼa ta dzaw ta a cèlèlèu.

¹¹ Ka ba ta tèuda ka a pa a ta dum ka, a ka hèsh sam nʼnghédé va te ri mayamhai.

¹² Gihi ngaya ndakmaʼa tèlèba nara wof kslor man a yi kslor, ga sam nyiè a shkè. Man ta gegerda, a wushka na ma ndo man a woya a ndiaʼa.

¹³ Ndohi var te ndev ngaya ta ara ngwohai. Vogwa a nʼndeda skwi mɓèr ntamagi ngaya a ma, ntamagi kokwar ngaya mwinè twèng a sam mayamhi ngaya.

¹⁴ Gudz iyam, a géɗ man ta ngala ka ma a pa. Pa ndadeɓ zlazlar ngaya a pats mwuɗitpa. Gots wujèɗ! Doslko lèɓèlèɓè, a ka ga a kwa!

¹⁵ Te pa vogwa a da nde ka a ma, tsakwal a da keɗa ka, ko ka kumba ara hoyok, ko a vata ara dzarai,

¹⁶ ko ndohi gani ngaya kumba ara banti te giɗfèk, hoyok a shüɗ va a hi na.

¹⁷ Ndohi mɓer gi ngaya ta ndev ɓi ara dzarai, ndohi mwindè ɗèlèwèr ngaya kumba ara ndo vongwom, man ta ɓica a ma zlazlar a sam langlangaʼa; aman pats tʼuda ta hi ta, ndo a sun sam man ta dè a pa ɓai.

¹⁸ Bi Assur, ndohi mɓer skwi ngaya ta nzhuna; bihi sojè ngaya ta nzhuna; ndohi ngaya ta ksar ta te za, ndo mɓic ta azɓai.

¹⁹ Skwi ntil sam ngedassaʼa sa a sam ngaya asaɓai. Mblè a va ngaya a kèlè a sam mʼmetsai. Tèlèba man ta tsena ma ngaya, ta tish gèɗ a pa. Ndo man ka ga na shèwa pèc pècèk ɓi wa?