Nahum 2 - Ma Zhiklè

¹ Na haha, sak ndo man a dè a géɗ za, a njè ma mbelaʼa. Juda, gau ngolala ngaya! Gau ara man ka gaɗda hai! Ndo shèwa a da kala ka va te deɓaʼa asaɓai, nʼngedas na ma.

² Ndo ngedassa skwai a shkè, a woya a gedas ka. Ɓür gi ngaya ndakmaʼa! Ngelda di a civèɗ, dzawa va ngaya! Sala va ngaya a wuɗai!

³ Aman Ndo nzi pèc pècèk a til nʼnjèl Jacob zaʼa, lèmèlèmè ara nʼnjèl Israel; te man ndohi nʼndeda skwi a ma te gi lak, ta berzlda ri wof aussa.

Mayamhi Ninive

⁴ Gambar ngul ndohai, ta nduzoa. Ndohi var a maslaka vèvèzh a va. Kiki var tengaʼa a si dai, a pats man ta tilèʼa. Plèshi ta, ta gucè azɓai, ta woy a ta hai.

⁵ Kikihi ta hi a civèɗ, ta hi a dal kokwar, ta lèmèlèmè ara skwi ntiv vogwa, nara ndidiyam.

⁶ Bi Ninive a fi gèɗ a ndohi nengaʼa mbibihiaʼa, aman sak tengaʼa ndzavaɗ na a ta wushahai. Ta hi a sam zlazlar kokwar, ta til va a hai.

⁷ A iyam mwin na, a gi bi a mʼmbeɗ na.

⁸ Ta gseda ngwoz bai a ma a ɓèlè; dalahi mizlinè nengaʼa ta kuɗi heɓek-heɓekaʼa ara nkuɗhom, a ta peɗi rai.

⁹ Ninive ara sam nhèyè-iyam man iyam a hi auda te pa. Va-nza! Va-nza! Aman ta pi di a deɓa azɓai.

¹⁰ Va-gu metsar verzhègenè, va-gu metsar guro! Skwi mèshèlè a ndev ɓai. Kolongwi nengaʼa mbelaʼa a zhè a vata.

¹¹ Ta ceda skwi a ma, ta dumaʼa, ta gedassaʼa. Ndav ndohi mʼmbeɗ na, gudɓi te di sak ta, godor a dzai, medi ndohi tèlèba ndaɗaʼa.

¹² Sam mʼmènè marizhèlè tema, gi wud marizhèlèhi ta tema? Sam man marizhèlè a feda kra na a pa, ndo a mbeberdè azɓai, tema?

¹³ Marizhèlè a ngso skwai, aman wudahi nengaʼa ta ngézhè, a ngso skwai a géɗ mam marizhèlèhai, a nʼndha gi na a skwi man a gso, a skwi man a cizlèʼa a sam mʼmènè na.

Ninive a mbeɗ na

¹⁴ Na haha, i woy a i ga ka kita, Ndo nzi pèc pècèk, Zhiklè bi mbiaʼa, a gaɗa; i fa na vogwa a kiki ngaya, tsakwal a da bazl ta wud marizhèlè ngaya; i gedassa civèɗ metsar ngaya a géɗ herkeda, a ta tsena daʼai ndohi sak ngaya asaɓai.