Michée 7 - Ma Zhiklè

Ndohi ta si Zhiklè te va

¹ Wobayè! Iyè ara ndo man ta ɓica-ma na skwi auda a ma: wondar azɓai, ko dil vanda ba azɓai, rua azɓai, man ndav ga a woyaʼa.

² Ndohi nlèɓèslèa ta ndev ta tʼherkeda. Ndo nzuraʼa a te va ndohi ɓai. Tèlè ta woy ta keɗa ndo, ngiɗè a nʼnga na ɓali a hi a kramam na.

³ Ri tengaʼa mwosla a ta gi skwi man ambaɓai. Ndo mbiaʼa a jhèɗè skwai. Ko ndo kita ba a ndi ndo. Ndo mbiaʼa a gi ara man a woyaʼa, ta terɗè kita.

⁴ Mwoy-ndo man ta woy ndo a vna, nara ncèkncèkè sulom. Ngi-zuraʼa tengaʼa nara zlazlar vatak. Pats man ta da war ka, a ta ga ka kita, kalka ma. Antanta ta gi zlau ma.

⁵ Kin fu gèɗ a ma nslamagi kinè ɓai! Kin gso va a mandalahi kinè ɓai! Ɓür tapiɗaf ma ngaya a sam ngwoz man ka humbateda a ndav!

⁶ Aman kra a dirɗè bab na. Demaʼa a slambaɗa na va a mam na, ngwoz kra a mam baki na. Ndohi gi kinè ta ndi a mayam kinè.

⁷ Aman iyè i woy a i pi di a Ndo nzi pèc pècèk, a i zhèr Zhiklè man a mbelyè. Zhiklè ga a da tsena ma ga.

⁸ Ka wuffa a géɗ ga ɓai, a mayam ga! Aman i kalahai, i da slèmbèɗè zaʼa. Aman i te ruva, Ndo nzi pèc pècèk skwi nhél sam ga.

⁹ I woy a i cè ndzoan Ndo nzi pèc pècèk, te man i gu mali a sam na, ha pats man a nckay auda te kita, a ndiyè a sam skwi nhél sam, a i rka ngi-zuraʼa nengaʼa.

¹⁰ Mayam ga da rkaʼa, da ngots hori a dai, nengaʼa man a gaɗayè: Ndo nzi pèc pècèk, Zhiklè ngaya, tema? Di ga a da wuffè a géɗ nengaʼa, man ta mbatsaha a sak ara koskosi a civèɗ.

¹¹ A pats ngiɗè ta da rèm zlazlar gi ngaya zaʼa, a ta herdaha kuma ngaya a deɓa a pats nasa.

¹² A pats sa ta da shkè a sam ngaya dra, te Assyrie, te kokwar Egypte, a hinè te Egypte, ha ndè a ma woyam mbiaʼa, a ma iyam mbiaʼa ngiɗè a ndè a ma iyam mbiaʼa ngiɗè, te za ngiɗè a ndè a za ngiɗè.

¹³ A herkeda a da ndi na a hèshèkèɗ, a géɗ skwi man ambaɓai man ndohi nengaʼa ta gau.

Ntsi rai

¹⁴ Ɓür ndohi ngaya a gada mɓer skwi ngaya! Ara rèwè skwi ngaya, man ta nza a géɗ ta te za Carmel. Sèi ka lè ta a sam mbelaʼa te Basan, te Galaad, ara nzlèzlèʼa!

¹⁵ Ngra nga nrkedi ara man a pats man ka shkè auda te kokwar Egypte.

¹⁶ Ndohi herkeda ta da rkaʼa, a ta ngècè hori a dai a géɗ wuɗi tenga tèlèba. Ta rzl ta, ta winè ma asaɓai, zlembaɗ tengaʼa ndèʼa.

¹⁷ Ta da nèkèɗè lokotor ara zhüzhok, ara skwi nda a hwaɗhai. Ta da shkè auda te gi tengaʼa ndakmaʼa a ngudzai. Ta herda na va a Ndo nzi pèc pècèk a ngudzai, ta gi zlauaʼa.

¹⁸ Zhiklè, ngar ka wa? Man a keɗa na gèɗ dai a mphömè, a pra ta mali a ndohi nʼndi gi na, a gi ndav a mèdèp azɓai, aman a wuffè a mvi pombai.

¹⁹ Nga da sia te va zaʼa, a da kerɗda mali nga a hwaɗ sak na. Ka da wusheda mali nga tèlèba a drav iyam mbiaʼa.

²⁰ Ka lèɓèslè a sam Jacob, ka va na pombai a Abraham, ara man ka pasla ta ri a babhi nga zlè-zlèzlèʼa.