Michée 6 - Ma Zhiklè

Mali Israel

¹ Va-tsena ma man Ndo nzi pèc pècèk a gaɗa! Slambaɗa, nju ma a sam zahai, a ngègèɗhai, a ta tsena daʼai ngaya!

² Zahai, va-tsena mversl ma Ndo nzi pèc pècèk, verzi herkeda, fu zlembaɗ! Aman Ndo nzi pèc pècèk a virslè a ndohi na, a gi kita ndohi Israel.

³ Ndohi ga, i ga kinè mè? I ngezla kinè a gèɗ èhèmè? Va-mbeɗkay a ma!

⁴ I helka kinè auda te kokwar Egypte, i preka kinè auda te gi ɓèlè, a i zlinda Moise, Aaron a Miriam a sam kinè.

⁵ Ndohi ga, va-hur skwi man Balak, bi Moab, a woy a nʼnga kinè, a ma man Balaam, kra Beor, a mʼmbeɗa na a ma, daga Sittim, ha ndè Guilgal; aman a ka shin ngi-zuraʼa Ndo nzi pèc pècèk!

⁶ I zlècè a sam Ndo nzi pèc pècèk a mè, i gurɓahi a sam Zhiklè te géɗèʼa a mè? I da ndara na skwi ɗè, kra zlè ɗè?

⁷ Ndo nzi pèc pècèk a wuffè a géɗ drokhi 1.000, 1.000 ɗè? A géɗ mbar man a hi ara iyam ɗè? I va na tsuvom ga a géɗ mphömè ga ɗè, kra man i yau a skwi mpil gèɗ mali ga ɗè?

⁸ Ndo, ta ngra ka skwi man amba, a skwi man Ndo nzi pèc pècèk a jhèɗèʼa a sam ngaya: Sèi ka gi skwi zuraʼa; ka woy ndo; a ka manda gèɗ a hi a sam Zhiklè ngaya!

⁹ Ndo nzi pèc pècèk a bèhè te kokwar. Ndo man a gi zlau nzlembaɗ na, maya na zhè. Va-tsenaʼa, kinè ndohi mɓicaʼa te dak a ndohi te kokwar!

¹⁰ Te gi ndo ambaɓiaʼa, skwi man a büco a shèwa, a skwi man a büco a ngi rai, a pcay a gèɗ ɗè?

¹¹ I ga na kita a gèɗèʼa azɓi ɗè, a ndo man a gu ri te nlivè skwai, a ta livè skwi a kilo nʼngwèdè ndo?

¹² Ndohi mèshèlè te kokwar ta ɓica skwi a wuɗai, a ndohi kokwar ta cèkèlma, nèʼèn tengaʼa a ngwèdè ndo.

¹³ Gar haha i hüno a i tse ka, a i gedas ka a géɗ mali ngaya.

¹⁴ Ka ndi skwai, a ngeza ka a hwaɗ azɓai, mi a keɗ ka genè. Ka da feda skwi a hai, ka slaha ka nghédè azɓai. Skwi man ka mbeldaha, i da heldama te var.

¹⁵ Ka zlekai, aman ka ɓicè skwi azɓai. Ka kèl mbar, aman ka feɗè a va ngaya azɓai. Ka ti zom, aman ka nsia ka ɓai.

¹⁶ Ka dzodzor ma nkwèr Omri, a maya ambaɓiaʼa man a ndohi Achab. Ka gu ara man ta ngra ka, a i da gedas ka, a ta ngwossaha ta ndohi kokwar ngaya. Aranta sèi kin ɗishèʼa, aman ndohi herkeda ta paraha kinè.