Michée 4 - Ma Zhiklè

Gumai

¹ Aman a pats nʼndikè-ma skwai, za man gi Zhiklè a nza a géɗèʼa, a nzi taraʼa, ngür nengaʼa a fena zahi ngiɗè, a ndohi herkeda kumba ta hi a pa.

² Ndohi nte deɓa ta shkè dra a ta gaɗa: Vo-wash-kè, ngo-dokoya a géɗ za Ndo nzi pèc pècèk, a gi Zhiklè Jacob, aman a senda nga civèɗ nengaʼa, a nga dè a civèɗ nengaʼa. Ma kita a da shkè te Sion. Ma Ndo nzi pèc pècèk a shkè te Jérusalem.

³ A da gi kita ndohi kumba, a da ngatsa ta maya a kokwar-bihi man wuɗi ta a zhè, ko man ta dra. A ta da viɗè tsakwal ta a devar, a zhèngèzhè ta a gwodza. Kokwar-bi ngiɗè a gidè tsakwal a kokwar-bi ngiɗè asaɓai, a ta slebi ngi var asaɓai.

⁴ Staɗ staɗ tèlèba a nza te gi dau na, te verzi wof na, a skwi ngiɗè a pa ta zlau a gèɗ asaɓai, Ndo nzi pèc pècèk Zhiklè bi mbiaʼa a ngoɗ te ma na.

⁵ Ndohi herkeda tèlèba ta jèjèr zhi-klèhi ta. Aman nga, nga jèjèr Ndo nzi pèc pècèk a mèdèp.

⁶ A pats nasa, Ndo nzi pèc pècèk a gaɗa, i da ɓic ta ndohi vedal, a i ɓic ta tenga man ta venda gèɗ ta, a tenga man i ga ta matakwan.

⁷ Ndohi vedal i ge ta a tser ndohai, a ndohi man ta venda gèɗ ta ta ndi a kokwar-bi mbiaʼa. Ndo nzi pèc pècèk a gi bi tengaʼa a géɗ za Sion, a hinè antanta a ma ma a mèdèp.

⁸ Ka, kuɗom skwai, za dem Sion, ka da ngècè bi zaʼa ara halaʼa, bi a géɗ ndohi gi Israel.

Te ɓèlè

⁹ Antanta ka kuɗi mè? Bi az a sam ngaya ɓi ɗè? Ndo nʼnjè ka azɓi ɗè? A ka ɗish va ara ngwoz man a yi kra, kè!

¹⁰ Dem Sion, ngoy va, ɗüsh va, ara ngwoz man a yi kra! Aman antanta ka da shkè auda te kokwar a ka nzi a dak, ka da dè a kokwar Babel. Te pa ka da mbél ngaya. Te pa Ndo nzi pèc pècèk a da preka ka auda te ri mayamhi ngaya.

¹¹ Anai ndohi herkeda kumba ta ɓica ka va a géɗ, ta gaɗa: Sèi da gedas na! A nga wuffè a géɗ Sion!

¹² Aman tengaʼa ta sun skwi man Ndo nzi pèc pècèk a hèra ɓai, ta sun verzi skwi man a da gia dai, ta sun ɓai; a nda ɓic ta ara dau man ta tsamda a hedak, ta sun ɓai.

¹³ Slambaɗa, dem Sion, kuzlo dau! I va ka mbelau züdo a rai, a i va ka kotokoroh züdo a sak, a ka kerɗ ta ndohi herkeda kumba a sak. Skwi ndumè ka da va na Ndo nzi pèc pècèk, skwi mèshèlè tengaʼa ka va na bi a géɗ ndohi herkeda tèlèba.

¹⁴ Antanta ma, ɓica ndohi ngaya, dem nhèyè-va ndohai! Ta pa nga va a hai. Ta tsi bazlazlam ndo mbèzl kita Israel a gada.