Michée 3 - Ma Zhiklè

A géɗ tsuvomhi Israel

¹ I gaɗa: Kinè tsuvomhi Jacob, kinè mbibihiaʼa te Israel, va-tsenaʼa! Kin sun ma kita ka ɓi ɗè?

² Ta gi shèwa a skwi man amba, ta woy skwi man ambaɓai. Ta zlahama ta bkwi auda a va ndohai, a ta suɗama ta zluèɗ auda a deɓ vatasl.

³ Ta ndi zluèɗ va ndohi ga, ta zlahama ta bkwi auda a va, ta batsa vataslhi ta, ta fiɗèʼa ara zluèɗ, ara zluèɗ te shiɗèf.

⁴ Te deɓaʼa ta da kuɗi a sam Ndo nzi pèc pècèk; aman nengaʼa a da mbeɗa ta a ma azɓai. A pats nasa a da nghédè va a sam ta, a géɗ man ta gu skwi man ambaɓi a sam na.

⁵ Ndo nzi pèc pècèk a ga ta ma a va a géɗ ndohi nhadka ma man ta zlakeda ta ndohi ga, man ta hodko ma gumai a sam ndohi man ta vra ta, a ta ga ta ma a va ndohai, man ta ngatsa skwi a bazlazlam a sam ta ɓai.

⁶ Gar haha kin da nzi te ruva. Kin rka skwi man a ma azɓai, kin ngècè skwi man kin hèdè ma a géɗèʼa azɓai. A sam ndohi nhadka ma haha pats a kèlèhai, pats a ngwoda na a ruva.

⁷ A ndohi nsun skwai ta gi horai, a ndohi nhadka ma ta ngècè hori a dai. Tèlèba ta pi ri a dai, a géɗ man Zhiklè a mʼmbeɗa ta a ma ɓai.

⁸ Aman iyè, i ngots wruɗai, te man Mèzhèɓ Ndo nzi pèc pècèk a nʼndha ndav ga, a ngi-zuraʼa a wuɗi-va, a i njè ta ma mphömè Jacob, a mali Israel.

⁹ Kinè tsuvomhi ndohi Jacob, kinè mbibihiaʼa te Israel, man ma kita ambaha kinè ɓai, a skwi nsaraʼa kin dzaraʼa tèlèba, va-tsena ma haha!

¹⁰ Kin rèm Sion te va man ta keɗa ndo, a Jérusalem te va skwi nzura ka ɓai.

¹¹ Ndohi tengaʼa mbibihiaʼa ta gi kita ara man ndohi ta ruɓ ta. Ndohi mizlinè Zhiklè tengaʼa ta njè ma a géɗ sulai. Ndohi nhadka ma tengaʼa ta hodko ma a gèɗ sulai. A ta pi ndav a Ndo nzi pèc pècèk a ta gaɗa: skwi mwuɗitpa a shkè a géɗ nga azɓai.

¹² A géɗ kinè, Sion a da ndi a gi dau man ta pizhè te pa. Jérusalem a di a da mbéɗ na, a za man gi Zhiklè te pa, a da ndi a sam nhèyè-wof.