Michée 2 - Ma Zhiklè

Kita a géɗ skwi nzura ka bai

¹ Wobau a géɗ ndohi man ta hér mali a sam mʼmèn ta. Ga sam nciɗè, ta gia ara man ta huro, aman ta slaha.

² Ta zeɓi gi dau a ta cèʼa a wuɗai. Ta ngél di a gai a ta cèʼa; ta kala na va a babgiaʼa a skwi gi nengaʼa.

³ Gar haha Ndo nzi pèc pècèk a gaɗa: I ba i hér skwi man ambaɓai a géɗ tengaʼa. Kin slaha kin suɗkoɗauda te daʼai kinè ɓai. Kin zlècèdè gèɗ azɓai.

⁴ A pats nasa ta da gèɗè ngèlègèɗ ma a géɗ kinè, a ta tsi nguzlah: Ta dum nga ma, nga gedassa. Ndohi nga ta pe ta a ri a ndohi ngiɗè, a nga ngècè a deɓa asaɓai. Ta ngela sam dak nga a ri a ndohi man ta dum nga.

⁵ Gar haha ndo azɓai te va mpi ndohi Zhiklè, man a liva ka gi dau a teɓa.

⁶ Ta gaɗa: Kin nju ma ɓai! Njè-ma a zhè, aman a géɗ skwi ve na a haha ka ɓai. Ndohi malihai ta hérdè va a deɓa azɓai.

Mandal ndo nzuraʼa

⁷ Ndohi gi Jacob ta ngècè hori a di azɓai. Ndo nzi pèc pècèk a zhèrè di azɓi dè? A gi skwi aranta ɗè? A gaɗa na Israel ma mbelaʼa ka ɓi ɗè?

⁸ Kinè man kin gi mayam ndohi ga! Ndo man a beza a civèɗ, a sun ɓai, a nhera ma shèwa te ndav na ɓai, kin ngezlama na dawar auda a va a kin jèka na ntʼhwaɗaʼa.

⁹ Ngwozi ndohi ga kin dzam ta auda te gai a sam wudahi man ta woy ta. Kin helama ta wuɗi ta, kin cèma ta nʼnjèl ga a wudahi ta a mèdèp.

¹⁰ Va-slambaɗa, vo-do! A haha sam nshèk va ka ɓai. A géɗ mali kinè, skwi ngedas kinè a da shkè a ngedas kinè.

¹¹ Aman ndo ngiɗè a shkè a ma ambalai flak-flakaʼa, a cèkèlma, a gaɗa: i hodko ma a géɗ zom a barassa! – Nasa ndo nʼnjè ma man ambaha ta ndohi ambaɓihiaʼa haha!

Mpèsl rai; Zhiklè a da til Jacob zaʼa

¹² Jacob, i da ɓic kinè tèlèba; i da ɓic ta njèkèɗi ndohi Israel; i da ɓic ta a sam staɗ ara tambakihi a kuɗom, ara rèwè tambak te zlazlar; ndohi rèdèdèʼa man ta hèzlèwè kumba.

¹³ Ndo mwin civèɗ a shkè a ma tengaʼa, a ta nguzlko gèɗ ta auda. Ntamagi a zhè, a ta ndeɗatska va auda. Bi tengaʼa a dè a ma tengaʼa. Ndo nzi pèc pècèk a lè ta.