Michée 1 - Ma Zhiklè

Ndzoan Zhiklè a géɗ Israel a Juda

¹ Ma man Ndo nzi pèc pècèk a ngaɗa na Michée te Morésheth, te va man Jotham, Achaz a Ezéchias bihi Juda; skwi man a di a shkè a géɗ Samarie a Jérusalem.

² Kinè ndohi tèlèba, va-tsenaʼa! Herkeda a skwi tèlèba te pa, va-fu zlembaɗ! Bi Zhiklè, Ndo nzi pèc pècèk, da gu malwuɗi a géɗ kinè; Bi Zhiklè da gu malwuɗai te gi nengaʼa nkezlaʼa!

³ Na haha Ndo nzi pèc pècèk a shkè auda a sam nengaʼa nkezlaʼa, a shkèhai a dè a géɗ za.

⁴ Za a mbeɗ na tʼhwaɗ sak na, a ndi na a slrats, ara ɗaftèlèsh vongwom man vogwa a wyamdaussa, ara iyam man a hakaɗi a der za.

⁵ Skwi haha tèlèba a gi a géɗ mphömè, a géɗ mali Israel. Mphömè Jacob a shkè tema? Te Samarie ka ɓi ɗè? Sam mvi skwi a zhiklè man a Juda a géɗ za tema? Te Jérusalem ka ɓi ɗè?

⁶ I da ndeda Samarie a dikai, a ta pizhè te pa. I da ndeda kwa nengaʼa a hi a nkulgodok, a verzi gi nengaʼa a nzi a dala.

⁷ Vrihi tengaʼa tèlèba i batsedaussa, a burdi man ta ndara ta zhiklèhi tèlèba i fa na vogwa a i gedassaʼa; a mʼmbèh skwi tèlèba i da gedassaʼa; ta ɓüco a skwi ntul fali ngwozai, sèi ta ndi a skwi ntul fali ngwozi zaʼa.

⁸ Gar haha i kuɗai a i gi wobau, i dè a daf sak, a verzi a dala, i kuɗi ara nvalaval, man mi a keɗaʼa, a i kuɗi ara wuzhèm.

⁹ Aman mblè Samarie a kala a sam mʼmetsai, ha ndè Juda, ha ndè a ntamagi ndohi ga te Jérusalem.

¹⁰ Kin njè ta te Gath ɓai! Kin kuɗau te Acco ɓai! Va-nza a mèrwèc te Beth-Leaphra!

¹¹ Vo-do, ndohi Shapir, a verzi a dala, a hori a dai! Ndohi Tsaanan ta shkè auda te kokwar azɓai, ta gi zlau. Woba Beth-Haétsel nkalkaɗa gèɗ kinè.

¹² Ndohi Maroth ta zhèr skwi mʼmbèl ta, ambalai. Skwi mwuɗitpa a shkè te ri Ndo nzi pèc pècèk ha ndè a ntamagi Jérusalem.

¹³ Va-manda kiki a verzi plèsh, kinè ndohi Lakish! Mali dem Sion a hüno a sam ngaya; Israel a ngu mphömè a sam ngaya!

¹⁴ A géɗ nengaʼa, ka Moréchet-Gath, ka nzi azɓai. Gihi Aczib ta da ngwod ta bihi Israel.

¹⁵ Kinè ndohi kokwar Marécha, i da cko, kinè ndo ndum kinè, nʼnjèl Israel a da ndikè a kokwar Adullam.

¹⁶ Sha gèɗ ngaya, a gèɗ wudahi ngaya man ka woy ta. Nza a gèɗ ndoy-ndoyaʼa ara mohodok; aman ta da jèke ka, ta da hel ta a ɓèlè.