Matthew 9 - Ma Zhiklè

Yèsu a mbel ndo vedal te matakwan nengaʼa

¹ Yèsu nte wurom, a ndo a wud woyam ngiɗè, a mshkè a kokwar na.

² Na haha, ta zuɓkoɗi ndo vedal a sam na, mʼmana tʼhai a sam mʼmènè na. Aman Yèsu a rkaʼa, ara man ta co a ndav ta, a ngaɗa na ndo vedal: Kra ga, mana ndav ngaya, malihi ngaya ta pra ma!

³ Malamhai cèwkata ta hur te ndav ta: Nengaʼa a derde Zhiklè!

⁴ Aman Yèsu a sun skwi man ta huro, a ngaɗa ta: Kin hur skwi ambaɓi ar haha èhèmè?

⁵ Mwuɗi a te pa ɓi nangwa: Ngèɗè, malihi ngaya ta pra ma dè, dè, slambaɗa a ko do dè?

⁶ A gèɗ man a kin shinèʼa, wuɗi kra-ndo a zhè, aman a prè malai a gèɗ herkeda, a ngaɗa na ndo vedal: Slambaɗa, co sam mʼmènè ngaya, a ko do ngwai!

⁷ A nengaʼa a nslambaâa, a nde na ngwai.

⁸ Aman ndohi rèdèdèa ta rkaʼa, ta gu zlau, a ta slubordo Zhiklè, man a va ta wuɗi mbiaʼa arsa a ri ndohai.

Yèsu a baha na Matthieu

⁹ Aman Yèsu a do a ma, a nrka ndo ngiɗè, a nʼnza a ma gi duak, nzlembaɗ na Matthieu, a ngaɗa na: Dzadzarkayè! A nengaʼa a nslambaɗa, a ndzodzora.

¹⁰ Te deɓaʼa, aman a nza te gai, a ta ndau skwi nʼndai, ndohi ncèkèlè skwai a ndohi malihai kumba ta nza a nda Yèsu a golahi nengaʼa.

¹¹ Aman ndohi pharisie ta rkaʼa, ta gaɗa ta golahi nengaʼa: Ndo njèngè ma kinè a ndi skwi a ndohi ncèkèlè skwai a ndohi malihai èhèmè?

¹² Aman Yèsu a ntsenaʼa, a ngaɗa ta: Ndohi man skwa a dza ta azɓai, ta dè a sam ndo madzaf azɓai; sei ndohi matakwan.

¹³ Vo-do, va-sun skwi haha: I woy aman ndo a si ndo te va, mvi skwi a Zhiklè ka ɓai. I shkè aman i bèhè ndohi nzuraʼa ka ɓai; i shkè, a i bèhè ndohi malihai.

Njhèɗè ma a géɗ njèkè skwi nʼndal

¹⁴ Te deɓaʼa golahi Jean ta shkè a sam na, a ta gaɗa: Nga a ndohi pharisie nga jèkeda skwi nʼndai pats ngiɗè pats ngiɗè; aman golahi ngaya ta jèkeda skwi nʼndai azɓai èhèmè?

¹⁵ Yèsu a ngaɗa ta: A pats man ntsima a zhè, mandalahi nengaʼa ta slaha a ta kuɗi dè? Sèi pats ngiɗè, man ta ceda ntsim tengaʼa a ma ma, te deɓaʼa ta da jèkeda skwi nʼndai.

¹⁶ Ndo a tsi maslaka mʼmovaʼa a maslaka mɓuaʼa azɓai; man ɓai maslaka mʼmovaʼa a zlaraha ma na, a kurats na, a fena nshèlèkuraʼa.

¹⁷ Ndo a ɓéjè zom mɓeslɓiaʼa a duzlakhi man hwaɗaʼa nʼndaʼa, azɓai; man ɓai duzlakhi ta tuw ta, a zom mɓeslɓiaʼa a mbadahai, cèw cèw ta gedas ta. Aman sèi ta ɓéjè zom mɓeslɓiaʼa a duzlak man hwaɗaʼa a nʼnde ɓai. Ar haha cèw ba ta nzi dai.

Dem Jairus, a ngwoz man a lama na maslaka Yèsu

¹⁸ Aman a ngaɗa ta ma haha, bi ngiɗè te gi-njèngè-ma-Zhiklè a mshkè a gai, a nkalahai a deɓ sak Yèsu, a ngaɗa na: Dem ga mʼmetsa, antanta. Aman Washke, a ka fa na ri ngaya a gèɗ, aman a da nzi a nshèffè.

¹⁹ A Yèsu a nslambaɗa, a ta dzodzora a golahi nengaʼa.

²⁰ Na haha, ngwoz staɗ man hwaɗ a va mvi 12, a mshke te deɓa, a nlama na ma maslaka na,

²¹ aman a hur te ndav na: Ko man i da lama na maslaka genè ha, i mbél ga.

²² A Yèsu a nturɗo va, a nwora. Aman a rkaʼa, a ngaɗa na: Dem ga, mana ndav ngaya, ncè-a-ndav ngaya a mʼmbel ka ma. A nasa nasa ngwoza mbel na.

²³ Aman Yèsu a ndo a gi bi-gi-njèngè-ma-Zhiklè, a nrkaʼa, ndohi ta tsi tolom, a ndohi rèdèdèʼa ta rubai.

²⁴ A nengaʼa a ngaɗa ta: Vo-do kinè, aman dem haha mʼmetsa ɓai, a nzhun genè.

²⁵ A ta ngwossaha. Aman ta dzar ta ndohi rèdèdèʼa auda ma, Yèsu a ndo a gai, a ngso ri demaʼa, a demaʼa a nslambaɗa.

²⁶ A labar ma nengaʼa a zlèzlèmè a kokwar tèlèba.

Mandalahi cèw ta rka dai

²⁷ Aman Yèsu a ndo a ma, ndohi mandazli cèw ta dzodzora, a ta boho a wuɗai, a ta gaɗa: Nga da se ka te va, kra David!

²⁸ Aman Yèsu te gi ma, ndohi mandazli ta shkè a sam na, a Yèsu a ngaɗa ta: Kin co a ndav a kin gaɗa, i slaha a i gi skwi haha dè? Ta gaɗa na: Halau, Bai.

²⁹ Te deɓaʼa a nlama ta di ta, a ngaɗa ta: Ara man kin co a ndav kinè, da gu a sam kinè!

³⁰ A di tengaʼa a mwin na, a Yèsu a mfa ta ma a gèɗ, a ngaɗa ta: Va-gu maya, ndo ngiɗè da sun ɓai!

³¹ Aman tengaʼa to do, a ta ngreda ma haha te kokwar tèlèba.

Ndaɓazlam a gèɗè

³² Aman to do ta ma, na haha, ta cko ndaɓazlam a sam Yèsu, man mèzhèɓ ambaɓiaʼa a ga na.

³³ Aman Yèsu a ndzarda madzagi auda ma, ndaɓazlam a ngoɗ ngèɗè. A ndohi rèdèdèʼa ta rzl ta, a ta gaɗa: Nga rka skwi ar haha te kokwar Israel di ɓai.

³⁴ A ndohi pharisie ta gaɗa: Nengaʼa a jèr madzagihi auda a bi-madzagai.

Ndohi ta si Yèsu te va

³⁵ Yèsu a nsawala te kokwar mbibihiaʼa, te kokwar nkèsh-nkèshèhiaʼa tèlèba, a nsenda ta te gi-njèngè-ma-Zhiklè, a njè ta ma mbelaʼa man a kokwar-Bi-Zhiklè, a mʼmbel ta ndohi te matakwan a skwi ndzi tsaɗ tsaɗ tèlèba.

³⁶ Aman a nrka nhèyè ndo, ta su te va, aman ntulèa keɗta, wuɗi ta azɓai, ta ksar ta ara tambakihai, man ta ngatsa ndo mɓer ta ɓai.

³⁷ Te deɓaʼa a ngaɗa ta golahi nengaʼa: A vava skwi nslaʼa a zhè a vata; aman ndohi mizlinè ta a za vatá ɓai.

³⁸ Va-tsu ri a bi skwi nslaʼa, aman a zlinde ta ndohi mizlinè, a ta ɓicè skwi na.