Matthew 8 - Ma Zhiklè

Yèsu a suɗa ndo hutsoɗ

¹ Aman Yèsu a nshkèhi te za ma, ndohi rèdèdèa ta dzodzora.

² Na haha, ndo hutsoɗ a mshkè a sam nengaʼa, a nkalahi a deɓ sak nengaʼa, a ngaɗa na: Bai, man ka woyaʼa, ka slaha ka suâyè!

³ A Yèsu a ngeda rai, a nlama na, a ngaɗa: I woyaʼa, suɗ ngaya! A nasa nasa a nsuɗ na.

⁴ Yèsu a ngaɗa na: Gu maya, ka da gaɗa na ndo ngiɗè ɓai! Do a ka ngreda na va ngaya a ndo mvi skwi a Zhiklè, a ka va na skwi a Zhiklè ara man Moise a gaɗa, a gi a skwi malwudai a sam tengaʼa.

Yèsu a mbela ɓèl bi soje te matakwan

⁵ Aman a nshkè a kokwar Capernaum, bi sojè staɗ a mshkè a sam na, a ngaɗa na:

⁶ Bai, gol ga a mʼmana tʼhai te ngwai, a slèmbèɗè azɓai, skwa a dza na a vata.

⁷ Yèsu a ngaɗa na: I woy man a i dè a i da mbelaʼa.

⁸ A bi sojè a mʼmbeɗa na a ma: I ndo man a ka shkè a gi ga ka ɓai. Sèi ka gèɗè ma ngaya staɗ, a gol ga a mʼmbel na.

⁹ Aman iyè ba, wuɗi ndo ngiɗè a zhè a géɗ ga. Sojèhi ga ta zhè man i kwor ta. Aman i gaɗa na staɗ te va tengaʼa: Do! – a dè. Aman i gaɗa na ngiɗè: Washkè! – a shkè. Aman i gaɗa na ɓèl ga: Gu arsa! – a giaʼa.

¹⁰ Aman Yèsu a ntsena ma haha, a nrzl na, a ngaɗa ta ndohi man ta dzodzora: I gaɗa kinè a vava, ko te kokwar Israel i ngots ndo man a nco a ndav a vata ar haha ɓai.

¹¹ Aman i gaɗa kinè: Ndohi kumba ta da shkè te civèɗ mvèng pats, te civèɗ nkèl pats, a ta da nzi a nda Abraham, a Isaac, a Jacob te kokwar-Bi-Zhi-klè.

¹² Aman man a matsa ta ndohi kokwar-Bai, ta da kalde ta auda a ruva; te pa ta kuɗai a ta peɗi zlèʼèn.

¹³ A Yèsu a ngaɗa na bi sojè: A gi a sam ngaya, ara man ka co a ndav. A nasa nasa gol nengaʼa a mʼmbel na.

Yèsu a mbela skwar Pierre te matakwan

¹⁴ Aman Yèsu a mshkè a gi Pierre, a nrka skwar Pierre, mʼmana tʼhai, vogwa a va.

¹⁵ A Yèsu a ngso ri nengaʼa, a vogwa a ndal na. A ngwoz a nslambaɗa, a ntakaha.

A dakwaɗ Yèsu a mbel ta ndohi matakwan kumba

¹⁶ A dakwaɗ, man pats nkala ma, ta hulkoɗi ndohi tsaɗ tsaɗ, man mèzhèɓ ambaɓiaʼa a ga ta, a sam na. A ndzorkoɗi mèzhèɓhi ambaɓihiaʼa auda a ma nengaʼa staɗ, a mʼmbel ta ndohi matakwan,

¹⁷ a gu ara ma Zhiklè, man Esaie, ndo nhadka ma, a gaɗa: Nengaʼa a nco matakwan nga a géɗ va na, a nzuɓ skwi ndzi nga.

Ndohi njèjèr Yèsu mberzlalahaʼa

¹⁸ Aman Yèsu a rka, ndohi rèdèdèʼa ta tèuda a pa, a mfa ta ma a gèɗ, aman ta dè a wud woyam, a dzah ngiɗè.

¹⁹ A malam staɗ a nherda na va, a ngaɗa na: Ndo njèngè ma, i woy man a i dzadzar ka a sam tèlèba man ka dè a pa.

²⁰ Yèsu a ngaɗa na: Barkdadihai ta ngots vèvèɗ ta, ɗiakihai thwaɗ giɗfèk ta ngots gi ta, aman kra-ndo a nʼngatsa sam na ɓai, aman a fi gèɗ a pa.

²¹ Staɗ te va golahi nengaʼa a ngaɗa na: Bai, jèkyè man i dè a i reko bab ga dai!

²² Aman Yèsu a ngaɗa na: Dzadzarkayè, sèi ndohi mʼmetsaʼa ta ri ndohi tengaʼa mʼmetsaʼa!

Woyam mbiaʼa a nzi géɓitèʼa a géɗ ma Yèsu

²³ Aman Yèsu a mdo a wurom ma, golahi nengaʼa ba to do.

²⁴ Na haha, kozlar mbiaʼa a nslambaɗa a géɗ iyam, a iyam a ngu tsuvoɗoh-tsuvoɗohaʼa, a wurom a woy a ndhè a iyam. Aman Yèsu a nzhuna.

²⁵ A golahi nengaʼa ta herda na va, a ta piɗèkwuda, a ta gaɗa na: Mbel nga, Bai! Ngazl nga!

²⁶ Yèsu a ngaɗa ta: Kinè ndohi man kin co a ndav a vata ɓai! Kin gi zlau kata èhèmè?

²⁷ Te deɓaʼa a nslambaâa, a nguv kozlar a woyam mbiaʼa, a iyam a nʼnza géɓitèʼa. A ndohi ta rzl ta, a ta gaɗa: Ndo haha wa, aman ko kozlar, ko iyam mbiaʼa ta fi gèɗ a ma nengaʼa!

Yèsu a dzar ta mèzhèɓhi ambaɓihiaʼa auda te Gadara

²⁸ Aman ta ndika a wud dzah ngiɗè, te kokwar Gadara, ta zlü gèɗ a ndohi cèw man madzagai a ga ta. Ta shkè auda a sam gi dzavai, a ta guv ndo, a ta pra ta zlau a va ndohi man ta beza a civèɗèʼa.

²⁹ A ta tsu lalau, a ta gaɗa: Nga gakaɗa a ka mè, a kra Zhiklè? Ka shkè a ka ga nga matakwan, ko a ndika a sama di bi ɗè?

³⁰ Dra kètè wodalahai ta zhè a pa kumba, a ta ndi mandai.

³¹ A madzagihai ta tsu rai, a ta gaɗa na Yèsu: Man ka dzar nga auda, pre nga, a nga dè a va rèwè wodalahai!

³² Yèsu a ngaɗa ta: Vo-do! A to do auda, a to do a va rèwè wodalahai. A na haha, rèwè wodalahai ta wush ta a drav iyam, a ta bazl ta te iyam mbiaʼa.

³³ Ndohi mɓer ta, ta hu ta, a to do a kokwar, a ta ngreda ta ma ndohi madzagi a ndohi tèlèba.

³⁴ A kokwar tèlèba a mdo auda, aman ta zli gèɗ a nda Yèsu. Aman ta rkaʼa, ta dzhoɗo aman a jèka ta kuma ta.