Matthew 7 - Ma Zhiklè

Mbèzlè mali a gèɗ ndo ngiɗè

¹ Kin bazla na mali a gèɗ a ndo ngiɗè ɓai, aman Zhiklè a da bazla kinè mali a gèɗ azɓai.

² Skwi man kin ga ta ndohi ngiɗè, ta da ga kinè lèmèlèmè; a skwi man kin livè a vna, ta da livè a kinè.

³ Ka rka kuza te di kramam ngaya, aman ka rka godozlom wof te di ngaya ɓi èhèmè?

⁴ Ehèmè ka woy a ka gaɗa na kramam ngaya: Kazladai, i woy man a i cko ka kuza auda te di ngaya! – a na haha, godozlom wof te di ngaya a zhè.

⁵ Ka ndo nʼngwèdè ndo! Sèi ka cko godozlom wof auda te di ngaya nshèlèkura dai; te deɓaʼa ka rka tsarayaʼa, a ka cko kuza auda te di kramam ngaya.

⁶ Skwi Zhiklè nkezlaʼa, kin da va ta a ma kdadihi ɓai; ta da ngwoda kinè a gèɗ va a ta cizl kinè. Kin kalda skwi daʼai kinè a ma wodalahi ɓai; ta da mbatsaha a sak.

Vo-dzhoɗo, va-woya, vo-boho a ntamagai!

⁷ Vo-dzhoɗo, ta da va kinè; va-woya, kin da ngècèʼa; vo-boho a ntamagai, ta da winè kinè.

⁸ Ko wawa man a jhèɗèʼa, ta va na; ko wawa man a woyaʼa, a ngècèʼa; ko wawa man a bèhè a ntamagai, ta winè na.

⁹ Ndo te ndev kinè, man kra nengaʼa a jhèɗè movar, a nva na kwa te dia wa?

¹⁰ Aman a jhèɗè klèf, a nva na zhüzhok te dia wa?

¹¹ Ani haha kinè ndohi ambaɓihiaʼa, a kin sun mvi skwi man amba a wudahi kinè. Bab kinè te zhiklè a fenaʼa, aman a va ta skwi man amba a tengaʼa man ta jhèɗè azɓi ɗè?

¹² Gar haha skwi man kin woy ndohi ta ga kinè, va-ga ta tengaʼa lèmèlèmè! Nasa ma kita Zhiklè, a ma ndohi nhadka ma.

Ntamagi nlühaʼa

¹³ Va-beza a ntamagi nlühaʼa! Aman ntamagi mbiaʼa, a civèɗ nzlototoʼa, man a daʼa a sam nzhidè ndo; ndohi kumba man ta bizhè a pa.

¹⁴ A ntamagi nlühaʼa, a civèɗ nlühaʼa, man a daʼa a nshèffè; ndohi man ta ngècèʼa matskata genè.

Nyi wof a ngrédè wofaʼa

¹⁵ Va-gu maya a sam ndohi nhadka ma ncèkèlma; aman ta shkè a sam kinè, ta lèɓèslèʼa ara tambak, aman te ndav ta, ta ara kda dak man a woya a nʼnde kinè a ma.

¹⁶ Séi kin sen ta a sam skwi man ta giaʼa. Nga slaha a nga nʼndi hawan te wof wandar ɗè? Nga slaha a nga nʼndi kslor te nkuɗdzarai dè?

¹⁷ Gar haha wof mbelaʼa staɗ staɗ tèlèba a yi wuda man amba; aman wof ambaɓiaʼa a yi wuda man ambaɓai.

¹⁸ Wof man amba a slaha a nyi wuda man ambaɓai azɓai. Wof man ambaɓai a slaha a nyi wuda man amba azɓai.

¹⁹ Wof staɗ staɗ tèlèba man a yi wuda mbelaʼa azɓai, ta ngeldahai, a ta wusheda a vogwa.

²⁰ Gar haha sèi kin sen ta a sam skwi man ta giaʼa.

I sen kinè ɓai

²¹ Ndohi man ta bahayè: Bai, Bai, ta dè tèlèba a kokwar-Bi-Zhiklè azɓai, sèi ndohi man ta gi skwi man Bab ga te zhiklè a woyaʼa.

²² A pats nasa ndohi kumba man ta da gadayè: Bai, Bai! Nga hodko ma a nzlembaɗ ngaya ka ɓi dè? Nga dzor madzagihi auda a nzlembaɗ ngaya ka ɓi dè? Nga gu nrkedi kumba a nzlembaɗ ngaya ka ɓi dè?

²³ Te deɓaʼa i da gaɗa ta: I sen kinè ɓai. Va-kazlay auda a tsagai, kinè ndohi mphömè!

Verzi-gai cèw

²⁴ Gar haha, ndo man a tsena ma ga haha, a giaʼa, i lèmdè a va ndo maya, man a rèm gi nengaʼa a géɗ pra.

²⁵ Aman iyam a shkè nchè-nchè, a iyam a hèy va hai, a kozlar a gai, a tsi gi tiv-tivaʼa, gai a mbeɗè azɓai, te man na géɗ pra.

²⁶ A ndo man a tsena ma ga haha, a gi azɓai, i lèmdè a va ndo nrzlaʼa, man a rèm gi nengaʼa a géɗ wyak.

²⁷ Aman iyam a shkè nchè-nchè, a iyam a hèy va hai, a kozlar a gai, a tsi gi tiv-tivaʼa, a mbeɗda gi aussa, a nceda ma.

Wuɗi-bi Yèsu

²⁸ Te deɓ ngèɗè Yèsu, nhèyè ndohai ta rzl ta a géɗ njè-ma nengaʼa;

²⁹ aman nengaʼa a nsenda ta ara ndo man a nʼngots wuɗi-bai, ara malamhi tenga ka ɓai.