Matthew 6 - Ma Zhiklè

Njè-ma Yèsu a géɗ mvi skwi a ndo

¹ Va-gu maya a géɗ ngi-zura kinè, aman kin da gu a sam di ndohi ɓai, a ta rka kinè; aman kin da gu arsa, skwi ntul kinè asaɓai a sam Bab kinè te zhiklè.

² Aman ka vi skwai, ka baheda ɓai, ara ndohi nʼngwèdè ndo ta giaʼa te gi-njèn-gè-ma-Zhiklè, a civèɗ, a ta woy a ndohi ta slebarde ta. A vava i gaɗa kinè: Ta ngots skwi ntul ta ma.

³ Aman ka vi skwai, gu aman ri gula ngaya a sun skwi man ri mandi a gia ɓai.

⁴ A woy skwi man ka viaʼa, nʼnghedaʼa; a Bab ngaya man a rka a sam nʼnghedaʼa, a da menda ka a deɓa.

Njè-ma Yèsu a géɗ ntsi rai

⁵ Aman kin tsi rai, kin gu ara ndohi nʼngwèdè ndo ɓai, man ta woy a ta zlècè, a ta tsi ri te gi-njèngè-ma-Zhiklè, a zolom civèɗ, a ta woy a ndohi ngiɗè ta rka ta. A vava i gaɗa kinè: Ta ngots skwi ntul ta ma.

⁶ Aman ka tsi rai, do a gi ngaya ntʼhwaɗaʼa, a ka tsi ri a Bab ngaya, a sam nʼnghedaʼa. A Bab ngaya man a rka a sam nʼnghedaʼa a da va ka skwiaʼa.

⁷ Aman kin tsi rai, kin ndurh ma kumba ɓai, ara ndohi nte deɓa; aman ta hur te ndav, Zhiklè a tsenaʼa, aman ta ndérh ma kumba.

⁸ Gar haha kin gu lèmèlèmè ara tenga ɓai! Ga kin tsi rai, Bab kinè a sun skwi man kin tèkwènèʼa.

⁹ Ani haha sèi kin tsi ri arsa: Bab nga, man ka zhè te zhiklè te géɗèʼa.

¹⁰ A woy ta kezla nzlembaɗ ngaya. Kokwar-Bi ngaya da shkè. Skwi man ka woyaʼa, da gu tʼherkeda lèmèlèmè ara nte zhiklè.

¹¹ Vaka nga skwi nʼndi nga te di mpatsna ba.

¹² Pra nga mali nga, ara man nga pra mali ndohai man ta gu mali a sam nga.

¹³ Ka de nga a sam man a pe nga a wi ɓai, aman ɓer nga te ri nengaʼa man ambaɓai. Aman kokwar-bi a ngaya, a wuɗai, a nʼnjèlè, pèc pècèk a mèdèp ba. Amen.

¹⁴ Aman kin prè mali ndohai, Bab kinè te zhiklè a dè prè mali kinè arsa.

¹⁵ Aman kin prè mali ndohi azɓai, Bab kinè te zhiklè a dè prè mali kinè azɓai arsa.

Njè-ma Yèsu a géɗ njèkè skwi nʼndai

¹⁶ Aman kin jèkeda skwi nʼndai, kin da gursa di ɓai, ara ndohi nʼngwèdè ndo. Tengaʼa ta min dai, aman ndohi ngiɗè ta rkaʼa, ara man ta jèkeda skwi nʼndai. A vava i gaɗa kinè: Ta ngots skwi ntul ta ma.

¹⁷ Aman ka jèkeda skwi nʼndai, pana di ngaya, tila va ngaya,

¹⁸ aman ndohi ngiɗè ta da rka ɓai, ara man ka jèkeda skwi nʼndai, sèi Bab ngaya man a zhè a sam nʼnghedaʼa. A Bab ngaya man a rka a sam nʼnghedaʼa a da va ka skwiaʼa.

Skwi mèshèlè te zhiklè te géɗèʼa

¹⁹ Kin ɓüco skwi mèshèlè tʼherkeda ɓai, a sam man pombok a hezai ta ndiaʼa, a sam man ndohi metsarhai ta zlinèʼa, a ta hilèʼa.

²⁰ Aman va-ɓüco skwi mèshèlè te zhiklè te géɗèʼa, a sam man pombok a hezai ta ndia azɓai, a metsarhai ta zlinèʼa, a ta hilèʼa azɓai.

²¹ A sam man skwi mèshèlè ngaya a pa, ndav ngaya ba a pa.

Skwi nhél sam te va ndo

²² Dai, ara pitirla va. Aman di ngaya amba, va ngaya tèlèba nhelaʼa.

²³ Aman di ngaya di nʼngwèdè ndo, va ngaya tèlèba nara ruva. Aman skwi nhél sam a va ngaya a hél sam azɓai, ruva a ndi a mbiaʼa.

Bi Zhiklè, a mwoy sulai

²⁴ Ɓèl azɓai, man a slaha a ngi mizlinè babgihi cèw. Gar a gi shèwa a nstaɗ, a woy ngiɗè a ndav na, gar a gshè va a nstaɗ, a nkwola ngiɗè. Kin slaha kin gi ɓèl Zhiklè a ɓèl skwi mèshèlè cèw ɓai.

²⁵ Gar haha i gaɗa kinè: Kin hur gèɗ zlau ɓai, a géɗ nshèffè kinè, a géɗ skwi man kin ndiaʼa, a kin siaʼa, a géɗ va kinè, a géɗ skwi man kin fi a va. Nshèffè a nfena skwi nʼndi ɓi dè? Va a nfena skwi nfi a va ɓi dè?

Nhér gèɗ zlau a géɗ nshèffè

²⁶ Va-rka ɗiakihi thwaɗ giɗfèk: ta zleki azɓai, ta ɓicè skwa a wov azɓai, aman Bab kine te zhiklè a va ta skwi nʼndi genè. Kin fen ta mbelembela ɓi de?

²⁷ Te ndev kinè nslaha a nhérdè nshèffè na kèshkata a ma a ri na, wa? Ko a nhér gèɗ.

²⁸ Kin hér gèɗ a géɗ maslaka èhèmè? Va-rka nwurzhè bèmbèzh te gi dau, ara man ta grè, ta grè: ta gi mizlinè azɓai, ta tsi maslaka azɓai.

²⁹ I gaɗa kinè, ko Salomon a nʼnjèl nengaʼa, az ara tengaʼa ɓai, ko staɗ te vaʼa.

³⁰ Aman Zhiklè a va na va a kuza arsa, kuza man a patsna a zhè, angoslèm ta wusheda a vogwa: a sam kinè a gi arsa azɓi de? Kinè ndohi man kin ca a ndav kumba ɓai!

³¹ Gar haha kin hur gèɗ zlau ɓai, a kin gaɗa: Nga da ndi mè, nga da si mè, nga da fi a va mè?

³² Ndohi herkeda ta hér arsa. Aman Bab kinè te zhiklè a sun skwi man kin tèkwènèʼa.

³³ Va-hur kokwar-Bi-Zhiklè a ngi-zura nengaʼa nshèlèkuraʼa, a kin ngècè skwi haha tèlèba a deɓaʼa.

³⁴ Ani haha kin hur gèɗ zlau a géɗ mangoslèm ɓai. Aman pats mangoslèmaʼa, skwi a da til na. A géɗ pats, skwi ntul mpats nstaɗ, dèʼa.