Matthew 5 - Ma Zhiklè

Nhinè njè-ma a géɗ za ( Mt. 5—7 )

¹ Mrke nhèyè ndo, a nteva a géɗ za, a nʼnzahai, a golahi nengaʼa ta herde va a sam na.

² Te deɓaʼa a nhüno man a slebda ta, a ngaɗa:

Mwuffè

³ Mwuffè a sam tengaʼa man ndohi ngiɗè ta sla ta ndohi ntawassaʼa te maya.

⁴ Mwuffe a sam ndohi man ta kuɗi te ndav ta; aman Zhiklè a da bid ta.

⁵ Mwuffè a sam ndohi man ndav lübekwaʼa; aman ta da gi a ndohi-nʼndi-herkeda.

⁶ Mwuffè a sam ndohi man ngi-zuraʼa a zle ta, ara skwi nʼndai, ara iyam nsai; aman sèi ta da ngézhèʼa.

⁷ Mwuffè a sam ndohi man ndo a se ta te va; aman tengaʼa ta da si Bi Zhiklè te va.

⁸ Mwuffè a sam ndohi man ndav ta mpana; aman ta da rka Bi Zhiklè.

⁹ Mwuffè a sam ndohi man ta tsi gumai; aman ta da baha ta wud Bi Zhiklè.

¹⁰ Mwuffè a sam ndohi man ta paraha ta a géɗ ngi-zuraʼa; aman kokwar-Bi-Zhiklè a tengaʼa.

¹¹ Mwuffè a sam kinè, aman ta ga kinè ma a va, a ta paraha kinè, a ta cèkèlma ambaɓi tsaɗ tsaɗ a géɗ kinè, a géɗ ga.

¹² Va-wuffa, va-gu langlangaʼa, aman skwi ntul kinè a gi a mbiaʼa te zhiklè, te géɗèʼa. Aman ta paraha ta ndohi nhadka ma halaʼa lèmèlèmè.

Boma a skwi nhél sam

¹³ Kinè boma herkeda. Boma man a jèn bai wurzk-wurzkaʼa, ta da gi a wotataʼa a mè? Ta gi skwa a vna asaɓai, sèi ta wushedaussa, a ndohi ta mbècè a pa a sak.

¹⁴ Kinè skwi nhél sam herkeda. Kokwar mbiaʼa a géɗ za a nghédè azɓai.

¹⁵ Ta vècè vogwa pitirla, aman ta fi a hwaɗ gadagar azɓai; aman ta fia a géɗèʼa, a sam nfi pitirla, te deɓaʼa a hela ta sam a ndohi lèlè man ta te gai.

¹⁶ Gar haha va-gu aman skwi nhél sam kinè a hél sam a sam di ndohai, aman ta rka mizlinè kinè man amba, a ta slébèrdè bab kinè te zhiklè.

Njè-ma Yèsu a géɗ ma kita Zhiklè

¹⁷ Kin hur a kin gaɗa, i shkè a ngédéshé ma kita Zhiklè, a ma ndohi nhadka ma, ka ɓai. I shkè a ngédéshé ka ɓai, aman i a nrufaʼa.

¹⁸ I gaɗa kinè a vava: Ha gidfèk a herkeda ta ndev ta, ko lamba staɗ, ko skwi nvèlèhèʼa staɗ te ma kita Zhiklè, a zi azɓai, sèi tèlèba nʼngaʼa.

¹⁹ Ko wawa man a jèkèda staɗ te va ma kita Zhiklè, ko ma nkèshèʼa genè, a slebda ta ndohi ngiɗè arsa, ta da baha na nkèshèʼa te kokwar-Bi-Zhiklè. Aman ndo man a da fi gèɗèʼa, a slebda ta ndohi ngiɗè a ta fi gèɗèʼa arsa, ta da baha na ndo mbiaʼa te kokwar-Bi-Zhiklè.

²⁰ Aman iyè i gaɗa kinè: Sèi ngi-zura kinè a fena ngi-zura malamhaì a ndohi pharisie mbelembela, man ɓai kin dè a kokwar-Bi-Zhiklè azbai.

Njè-ma Yèsu a géɗ ndzoan

²¹ Kin tsenaʼa, ara man ta gaɗa ta baba-babhi kinè: Ka kuɗ ndo ɓai! Ndo man a kéɗè ndo, a kèlè a kita.

²² Aman iyè, i gaɗa kinè: Ndo man a gi ndav a géɗ kramam nengaʼa, a kèlè a kita. Aman ndo man a gaɗa na kramam nengaʼa ‘medekam ndo’, a ngu malai, aman ta cèmma a géɗèʼa. A ndo man a gaɗa: Ka, skwa a ga ka! A ngu malai, aman a dè a vogwa kita.

²³ Gar haha, aman ka vi skwi ngaya a sam mvi skwi a Zhiklè, a pa ka hérèʼa, ara man ma a zhè te ndav kramam ngaya a géɗ ngaya,

²⁴ jèkeda skwi man ka woy a ka va na Zhiklè a sam mvi skwi a Zhiklè; a ko do nshèlèkuraʼa, a kin menda gumi a hai a kramam ngaya, ga ka shkè, a ka da vi skwi ngaya.

²⁵ Aman mayam ngaya a pin ka, va-lèmda ma kinè a civèɗ dai, man bai a de ka a sam ndo kita, a ndo kita a da va ka a ri a soje, a ta fe ka a gi dangai.

²⁶ I gaɗa ka a vava: Ka shkè auda te pa ambalai azɓai, sèi ka pi Suli tèlèba, ko sissi a pcè a deɓa azɓai.

Njè-ma Yèsu a géɗ mphömè ngwoz

²⁷ Kin tsenaʼa, ara man ta gaɗa: Ka gu mphömè ngwoz ɓai!

²⁸ Aman iyè, i gaɗa kinè: Ndo man a cèkè di a ngwoz, a ngu mphömè a vna te ndav na ma.

²⁹ Aman di ngaya nte civèɗ ri mandai a kalde ka a malai, vedotkoɗauda, a ka kaldaussa. Dara nfèfèn va ngaya staɗ a gedas na, a géɗ va ngaya tèlèba man ta kalda a vogwa kita.

³⁰ Aman ri mandi ngaya a kalde ka a malai, ngela na auda, a ka kaldaussa. Dara nfèfèn va ngaya staɗ a gedas na, a géɗ va ngaya tèlè man ta kalda a vogwa kita.

Njè-ma Yèsu a géɗ njèkè ngwoz

³¹ Ta gaɗa nga a vaʼa: Ndo man a kwola ngwoz na, sèi a va na ɗèlèwèr njèkè ngwoz.

³² Aman iyè, i gaɗa kinè: Ndo man a kwola ngwoz na, a géɗ mphömè ka ɓai, a kalde ngwoz a mphömè. A ndo man a cè ngwoz man ndo ngiɗè a njèke-da, a gi mphömè.

Njè-ma Yèsu a géɗ ma-mbèɗè

³³ Kin tsena a vaʼa, ara man ta gaɗa ta babababhi kinè: Ka mbaɗa ambali ɓai! Aman sèi ka gi ara ma man ka gaɗa na hi a Bi Zhiklè.

³⁴ Aman iyè, i gaɗa kinè: Kin mboɗ ɓi fèt ba! Kin mbaɗa a nzlembaɗ giɗfèk bai, aman nengaʼa sam nʼnzi Bi Zhiklè.

³⁵ Kin mbaɗa a nzlembaɗ herkeda ɓai, aman nengaʼa sam nfi sak Bi Zhiklè. Kin mbaɗa a nzlembaɗ kokwar Jérusalem ɓai, amsn nengaʼa kokwar Bi mbiaʼa.

³⁶ Ka mbaɗa a géɗ va ngaya ɓai, aman ka slaha a ka slekaɗa a ka madza gwots gèɗ ngaya azɓai, ko staɗ ba.

³⁷ Va-gu aman halau kinè, a gi a halau; a aʼai kinè, a gi a aʼai; skwi man kin gèɗè a vaʼa, ambaɓai.

Njè-ma Yèsu a géɗ mʼmindè ma a deɓa

³⁸ Kin tsenaʼa, ara man ta gaɗa: Dai te di man a dai; zlèʼèn te di man a zlèʼèn.

³⁹ Aman iyè, i gaɗa kinè, aman kin Sala va, man ta ga kinè skwi ambaɓiaʼa ɓai. Man ndo a tsama ka bazlazlam ri mandi ngaya, ka ngwoda na civèɗ ngiɗè.

⁴⁰ Ndo man a woy ma a ka, a ncèma ka maslaka ntʼhwaɗaʼa, va na dawar a vaʼa.

⁴¹ Ndo man a tsa ka rai, a ka feda na ma, ngelka na di cèw!

⁴² Va na ndo man a dzhaɗ ka, ka kalda ma a ndo man a dzhaɗ ka ɓai.

Mwoy mayamhai

⁴³ Kin tsenaʼa, ara man ta gaɗa: Woy nslamagi ngaya, gu shèwa a ndo mayam ngaya!

⁴⁴ Aman iyè, i gaɗa kinè: Va-woy ndohi mayamhi kinè! Va-tsu ri a géɗ ndohi man ta paraha kinè! Va-ga ta skwi man amba a ndohi man ta ga kinè shèwa,

⁴⁵ aman kin ndi a wudahi Bab kinè te zhiklè. Nengaʼa a gi aman pats a vèngè a géɗ ndohi ambaɓihiaʼa, a géɗ ndohi man amba, a gi aman iyam a shkèhai a géɗ ndohi nzuraʼa, a géɗ ndohi nzura ka ɓai, cèw ba.

⁴⁶ Aman kin woy ndohi man ta woy kinè genè, kin ngècè mè? ncèkèlè skwai ta gi arsa azɓi ɗè?

⁴⁷ Aman kin ga ta mbalai a kramamhi kinè genè, kin fen ta a mè? Ndohi nte deɓa ta gi arsa azɓi dè?

⁴⁸ Gar haha sèi kin ndikè a sam jèlèlèʼa, ara Bab kinè te zhiklè, jèlèlèʼa.