Matthew 4 - Ma Zhiklè

Madzagi a pi Yèsu a wai

¹ Te deɓaʼa Mèzhèɓ Zhiklè a nʼnda Yèsu a hèshèkèɗ, aman bi madzagai a mpi a wai.

² Mʼmèn 40 a nʼnda skwi nʼndi ɓai, a mi a nkeɗaʼa.

³ A ndo-mpe-ndo-a-wai a mshkè a sam na, a ngaɗa: Aman ka, ka kra Zhiklè, gaɗa ta kwahi haha, a ta ngwèdè va ta a movar!

⁴ Yèsu a mʼmbeɗa na a ma: Ta Windo te ɗèlèwèr Zhiklè: Ndo a nzi a nshèffè a géɗ movar genè ka ɓai; aman a géɗ ma staɗ staɗ tèlèba, man a shkè auda te ma Zhiklè.

⁵ A bi madzagai a nʼnda Yèsu a kokwar nkezlaʼa, a géɗ gi Zhiklè,

⁶ a ngaɗa na: Aman ka, ka kra Zhiklè, kalde va ngaya a hai! Aman ta Windo te ɗèlèwèr Zhiklè: Zhiklè a da gaɗa ta golahi nengaʼa, aman a ta ɓer ka, a ta ndaw ka, aman kwa a da tsama ka sak azɓai.

⁷ A Yèsu a ngaɗa na: Ta Windo te dèlèwèr Zhiklè zaʼa: Ka jkeda Bi Zhiklè ngaya ɓai!

⁸ A bi madzagai a nʼnda Yèsu a géɗ za mbiaʼa, a nʼngreda na kokwar-bihi-herkeda tèlèba, a nʼnjèl tengaʼa,

⁹ a ngaɗa na: Skwi haha tèlèba i woy man a i va ka, aman ka kèlèhi a deɓ sak ga, a ka slebar-dyè.

¹⁰ Aman Yèsu a ngaɗa na: Kazla ngay auda a tsagi ga, Sadan! Aman ta Windo te ɗèlèwèr Zhiklè: Sèi ka slébèrdè Bi Zhiklè ngaya staɗ genè, a ka gi mizlinè nengaʼa staɗ genè.

¹¹ Te deɓaʼa bi madzagai a njèkeda Yèsu a pa. Na haha, golahi Zhiklè ta shkè a sam Yèsu, a ta takaha.

Yèsu a hinè mizlinè nengaʼa

¹² Aman Yèsu a ntsenaʼa, ta gso Jean ma, a nʼndo na a kokwar Galilée.

¹³ A njèkeda kokwar Nazareth, a mshkè, a nʼnza te kokwar Capernaum, a ma iyam mbiaʼa, a ma kokwar Zabulon a Nephthali.

¹⁴ Gar haha a ngu ara man Esaie, ndo nhadka ma, a goɗ a géɗ

¹⁵ ndohi Zabulon, a ndohi Nephthali, a ma iyam mbiaʼa, te wud woyam Jourdain, a ndohi herkeda te kokwar Galilée,

¹⁶ ndohi man ta nza te ruva, ta rka skwi nhél sam mbiaʼa; a sam ndohi man ta nza a sam mʼmetsai, te mèzhèɓ mʼmetsai, skwi nhél sam a nhulko gèɗ.

¹⁷ A pats nasa, Yèsu a nhüno man a njè ta ma Zhiklè, a ngaɗa: Va-ngwode ndav kinè, aman kokwar-Bi-Zhiklè a zhè ndul ndul!

Yèsu a baha ta ndohi mpèr klèf faɗ

¹⁸ Aman Yèsu a shèwèlè a ma iyam mbiaʼa te Galilée, a nrka ta ndohi cèw, ta a kramam na. Simon, man ta baha na Pierre, a André, kramam na. A ta kèldè lata a iyam, aman tengaʼa ndohi mpèr klèf.

¹⁹ A Yèsu a ngaɗa ta: Va-dzadzar-kayè, a i ndede kinè a ndohi mpèr ndo!

²⁰ A nasa nasa ta jèkeda latahai, a ta dzodzora.

²¹ Aman Yèsu a nʼndo a ma, a nrka ta ndohi ngìɗè cèw, ta a kramam na: Jacques, kra Zébédée, a Jean, kramam na. Ta te wurom a Zébédée, bab ta, a ta til latahi ta. A Yèsu a mbaha ta.

²² Tsam-tsam ta jèka na wurom a bab ta, a ta dzodzor Yèsu.

Yèsu a njè ta ma a ndohi rèdèdèʼa

²³ Yèsu a nsawala te kokwar Galilée tè-lèba, a nsenda ta te gi-njèngè-ma-Zhiklè, a nʼnjè ta ma mbelaʼa man a kokwar-Bi-Zhiklè, a mʼmbel ta ndohi matakwan te skwi ndzi tsaɗ tsaɗ.

²⁴ A labar ma nengaʼa a zlèzlèmè te kokwar Syrie tèlèba. A ta cko ndohi man skwa a dza ta tèlèba a sam na, a matakwan tsaɗ tsaɗ, a skwi ndzi tsaɗ tsaɗ, ndohi zluèɗ a ndohi man mèzhèɓ ambaɓiaʼa a ga ta, a ndohi man sak mʼmetsa, ri mʼmetsa; a nengaʼa a mʼmbel ta.

²⁵ A ndohi rèdèdèʼa ta dzodzora, te Galilée, te Décapole, te Jérusalem, te Judée, te wud woyam Jourdain.