Matthew 3 - Ma Zhiklè

Nje ma Jean Baptiste

¹ A pats nasa, Jean Baptiste a mshkè, a nʼnju ma Zhiklè tʼhèshèkèɗ Judée,

² a ngaɗa: Va-ngwode ndav kinè, aman kokwar-Bi-Zhiklè a zhe ndul ndul.

³ Nasa Jean, man Esaie, ndo nhadka ma, a goɗ a gédèʼa: Ngèdè ndo ngiɗè man a bèhè tʼhèshèkèɗ: Va-tila civèɗ Bi Zhiklè, va-ga civèɗ nengaʼa saraʼa!

⁴ Maslaka Jean, ta tsu a gwots zlugumai, a mʼmana na gèɗ a hi a hutèd. A nʼnda dzarai a vongwom.

⁵ Kokwar Jérusalem, a kokwar Judée, a kokwarhi tèlèba a sam woyam Jourdain, to do a sam na.

⁶ A Jean a nʼnga ta baptême te woyam Jourdain, a ta ngreda mali ta auda.

⁷ Aman a rka ndohi pharisie a ndohi sadducée ta shkè a sam baptême kumba, a ngaɗa ta: Kinè wud tsebarhai, nʼngreda kinè wa, aman kin slaha kin hi kinè a ndzoan Zhiklè man a di a shkè?

⁸ Va-ngre-da auda zuraʼa, ara man kin ngwode ndav kinè!

⁹ Kin hur ɓai, a kin gaɗa, Abraham bab nga! Aman i gaɗa kinè: Zhiklè a slaha a nyoko na wuda a Abraham te kwahi haha.

¹⁰ Antanta dzana te verzi wof, a wof staɗ staɗ tèlèba man a yi wuda zuraʼa azɓai, ta ngélèʼa, a ta kalda a vogwa.

¹¹ Iyè i ga kinè baptême te iyam, te man kin ngwoda ndav kinè. Aman ndo ngiɗè a di a shkè te deɓ ga, man a fena wuɗi ga, i gi huyokokoʼa, i slaha a i gshè kotokoroh nengaʼa a ri ɓai. Nengaʼa a da ga kinè baptême te Mèzhèɓ Zhiklè nkezlaʼa, a vogwa.

¹² Kokwi te ri nengaʼa. A nengaʼa a da pèvè dau a hedak tèlèba. Dau nengaʼa a da ɓicè a wov, aman topok dau a fa na vogwa man a mbècè asaɓai.

Baptême Yèsu

¹³ Te deɓaʼa Yèsu a mshkè te kokwar Galilée a ma woyam Jourdain, a sam Jean, aman Jean a ga na baptême.

¹⁴ Aman Jean a mʼmende va na a deɓa, a ngaɗa: Sèi ka gay baptême ar kal Anai ka, ka shkè a sam ga ɗè?

¹⁵ Aman Yèsu a mʼmbeɗa na a ma: Sèi ka gi ar haha; na haha ambaha nga, aman nga ndeva ngi-zuraʼa tèlèba. A Jean a nco.

¹⁶ Aman Jean a nʼnga na baptême a Yèsu ma, a Yèsu a mshkè auda te iyam, na haha gidfèk a mwin na, a nrka Mèzhèɓ Zhiklè man a shkèhai a gèɗ na, ara nkuɗhom.

¹⁷ Na haha ta tsena ngèɗè te zhiklè te géɗèʼa, man a gaɗa: Nenga kra ga man i woyaʼa a ndav ga. Ndav ga a wuffè kumba a géɗ nengaʼa.