Matthew 27 - Ma Zhiklè

Yèsu a sam Pilate

¹ A prèk te gai, ndohi mvi skwi a Zhiklè mbibihiaʼa, a ndohi nhalaʼa ta tsomma a géɗ Yèsu, aman ta kéɗèʼa.

² A ta dzawaʼa, a ta daʼa, a ta va na a ri a Pilate Pontius, ngomna.

Mʼmetsi Judas

³ Aman Judas, nengaʼa man a nga na ri a gèɗ, a nrka, ta ga na kita a gèɗ a Yèsu, a nhur mali na, a nhulko Suli gurso 30 a deɓa a sam ndohi mvi skwi a Zhiklè mbibihiaʼa, a ndohi nhalaʼa,

⁴ a ngaɗa: I gu malai, man i ga na ri a gèɗ nshèffè ndo man nʼnga mali ɓai. Aman ta gaɗa na: A nga nga a pa mè? Ma ngaya!

⁵ A nengaʼa a nwushede Suli aussa a gi Zhiklè, a nʼndo na, a nkelawda teɓa a daʼai na, a mʼmets na.

⁶ A ndohi mvi skwi a Zhiklè mbibihiaʼa ta hul sulai, a ta gaɗa: Ambaɓai aman nga feda a sam skwi man nga va na Zhiklè; aman suli haha, suli man pombaz a géɗèʼa.

⁷ A ta tsomma, a ta sum gi dau ndo nrèmè, man ta ri ndohi mbrokihai a pa.

⁸ Gar haha ta baha na gi dau matsa gi dau Pombaz, ha patsna.

⁹ Gar haha a gu ara man Jérémie, ndo nhadka ma, a gaɗa: A gurso 30 (Suli man ndohi Israel ta shum ndo a vna),

¹⁰ ta sum gi dau ndo nrèmè, ara Bi Zhiklè a ngredayè.

Pilate a jhèɗè Yèsu

¹¹ Yèsu nzlatsa a sam ngomna. A ngomna a ndzhoɗo, a ngaɗa: Ka bi ndohi Juif ɗè? Yèsu a ngaɗa na: Ara ngèd ngaya!

¹² Aman ndohi mvi skwi a Zhiklè mbibihiaʼa, a ndohi nhalaʼa, ta pin Yèsu, nengaʼa a mʼmbeɗa ta a ma ɓai.

¹³ A Pilate a ngaɗa na: Ka tsena ma tsaɗ tsaɗ a gèɗ ngaya ɓi dè?

¹⁴ A Yèsu a mʼmbeɗa na a ma ɓai, ko staɗ ba. A ngomna a nhur a vata.

Ta ngela na kita mʼmetsai a gèɗ a Yèsu

¹⁵ A pats ngolala, a pats ngolala, ngomna a mpra ta ndo dangai staɗ a ndohi rèdè-dèa, nengaʼa man ta woyaʼa.

¹⁶ A pats nasa ndo dangai ambaɓiaʼa ngiɗè a zhè, nzlembaɗ na Barabbas.

¹⁷ A Pilate a ngaɗa ta ndohi mɓicaʼa: Kin woy a i pra kinè wa, Barabbas dè, dè Yèsu man ta baha na Kristi dè?

¹⁸ Aman nengaʼa a suna, ta gu srak a géɗèʼa.

¹⁹ Aman Pilate a nʼnza a gèɗ sam nʼnzi kita, ngwoz nengaʼa, a nzlündo ndo a sam na, a ngaɗa na: Skwa da gu te ndev kinè ɓai, nengaʼa ndo nzuraʼa. Nshunè a nkeɗyè a patsna a gèɗ nengaʼa, a ngeday matakwan kumba.

²⁰ Aman ndohi mvi skwi a Zhiklè mbibihiaʼa, a ndohi nhalaʼa, ta poko ta gèɗ auda a ndohi rèdèdèʼa, aman ta jhèɗè Barabbas, a ta kéɗè Yèsu.

²¹ A ngomna a ngaɗa ta: Te ndev ndohi cèw, kin woy a i pra kinè wa? A ta mbeɗa na a ma: Barabbas!

²² A Pilate a ngaɗa ta: Aman i gi a Yèsu mè, man ta baha na Kristi?

²³ Tèlèba ta gaɗa: Sèi ta gezlalaʼa! A ngomna a ngaɗa: A ge mali mè? Tèlèba ta boho holholaʼa: Sèi ta gezlalaʼa!

²⁴ Aman Pilate a nrka, a slaha ta ndohi rèdèdèʼa ɓai, a ta rubai, a nco iyam, a mpana ri nengaʼa a sam di ndohi rèdèdèʼa, a ngaɗa: Ri ga sa! Anai mali ga azɓai a sam mʼmetsi ndo nzura haha. Ma kinè!

²⁵ A ndohi tèlèba ta mbeɗa na a ma: Pombaz nengaʼa da shkè a gèɗ nga, a gèɗ wudahi nga!

²⁶ Te deɓaʼa a mpra ta Barabbas. A ngu aman ta ndèha Yèsu a mènèwèɗ, a mva ta, aman ta gezlalaʼa.

Sojèhi ta ngwossaha Yèsu

²⁷ A sojèhi Pilate ta co Yèsü, a ta daʼa a gala ngomna, a ta ɓic ta ndohi tèlèba a pa.

²⁸ A ta suɗama na maslaka nengaʼa auda a va, a ta va na maslaka vèvèzh a va,

²⁹ a ta paɗa na gèɗ a vatak ntsaffaʼa, a ta va na pandar a ri mandi nengaʼa, a ta kalahai a deɓ sak nengaʼa, a ta ngwossaha, a ta gaɗa: Mbali bi ndohi Juif.

³⁰ A ta jfa na slèslèɓ a dai, a ta co gaɗa, a ta tsau a gèɗ.

³¹ Aman ta ngwossaha ma, ta cèma na maslaka vèvèzh auda a va, a ta va na maslaka na a va, a ta daʼa, aman ta gezlalaʼa.

Ta gezlala Yèsu

³² Aman ta do auda, ta ngots ndo Cyrène ngiɗè, nzlembaɗ na Simon, a ta fa na a gèɗ a wuɗai, aman a zhüɓ wof ngézlèl Yèsu.

³³ Aman ta shkè a sam man ta baha na Golgotha, ara ngèdè ‘vatasl gèɗ’,

³⁴ ta va na barassa a mèdètèr, te pa, aman a nsiaʼa. Aman a ntoro, a woya a nsia ɓai.

³⁵ Aman ta gezlala ma, ta kezla maslaka na, ara man ta gu a jimèr.

³⁶ A ta nza a ta ɓerèʼa a pa.

³⁷ A ta Windo mali nengaʼa a deɓ wof: Nengaʼa Yèsu, bi ndohi Juif.

³⁸ Te deɓaʼa ta gezlala ndohi metsarhi cèw a nda nengaʼa, staɗ te ri mandai, ngiɗè te ri gula.

³⁹ A ndohi man ta beza a pa, ta dérɗèʼa, a ta gidè gèɗ kwotakwotaʼa, a ta gaɗa:

⁴⁰ Ka, man ka mbeɗa gi Zhiklè, a ka rèmè ngiɗè te mʼmèn makar – ar ka – mbela va ngaya a ri ngaya; aman ka, ka kra Zhiklè, sulomkaɗahai a wof ngézlèlè haha!

⁴¹ Lèmèlèmè, ndohi mvi skwi a Zhiklè mbibihiaʼa ta ngwossaha, a malamhai, a ndohi nhalaʼa, a ta gaɗa:

⁴² A mʼmbel ta ndohi ngiɗè, aman va nengaʼa a slaha a mbela ɓai. Aman nengaʼa bi Israel, da sulomkaɗahai a wof ngézlèlè, a nga woya a nga cèʼa a ndav.

⁴³ Nengaʼa a pi ndav a Bi Zhiklè, Bi Zhiklè da mbelaʼa antanta, man a woyaʼa. Aman a ngaɗa: I kra Zhiklè, ar na.

⁴⁴ Gar haha ndohi metsarhai man ta gezlal ta a nda nengaʼa, ta durɗo lèmèlèmè.

Mʼmetsi Yèsu

⁴⁵ Aman a géɗ pats, ruva a ngau a géɗ herkeda tèlèba, ha pats tsafkata.

⁴⁶ A Yèsu a mboho a wuɗai, a ngaɗa: Eli, Eli, lama sabachthani? Ara man a gaɗa: Zhiklè ga, Zhiklè ga, ka jèkyè èhèmè?

⁴⁷ Aman ndohi tsaɗ tsaɗ man ta zlatsa a pa, ta tsenaʼa, ta gaɗa: A baha na Elie!

⁴⁸ Tsam-tsam staɗ te va tengaʼa a mhau, a nco maslaka, a nkalda a iyam mbertéktékaʼa, a mʼmanda a gaɗa, a ntkwo na a ma.

⁴⁹ Ndohi ngiɗè ta gaɗa: Kazladai, nga rka aman Elie a shkè a mbelaʼa!

⁵⁰ A Yèsu a mboho a wuɗi zaʼa, a mva na Mèzhèɓ na a ri a Zhiklè.

⁵¹ Na haha, maslaka mbiaʼa te gi Zhiklè a nkurats na te va, te géɗèʼa a nshkè-hai a godok, a herkeda a ngudzai, a zahi a ta cizl ta,

⁵² a gi dzavihi a ta win ma ta. Te deɓ nslambaɗkaɗauda nengaʼa, ndohi Zhiklè man ta mets ta ma, kumba ta shkè auda te dzavai,

⁵³ a to do a kokwar nkezlaʼa, a ta gudoko ta va a dai a ndohi kumba.

⁵⁴ Aman bi sojè, a ndohi mɓer Yèsu, ta rka, herkeda a gudzai, a skwi man a gau, ta gu zlau a vata, a ta gaɗa: A vava, ndo haha kra Zhiklè!

⁵⁵ Ngwozi ngiɗè kumba, ta a pa, man ta rkoɗi dra. Ta dzodzor Yèsu te Galilée te va nasa, a ta takaha.

⁵⁶ Te va tengaʼa Marie Magdala; a Marie, mam Jacques, a Joseph; a mam wudahi Zébédée.

Ta ra Yèsu

⁵⁷ A dakwaɗ man pats nkala ma, ndo mèshèlè ngiɗè a mshkè te Arimatée, nzlembaɗ na Joseph, nengaʼa ba gol Yèsu.

⁵⁸ Nengaʼa a ndo a sam Pilate, a ndzhoɗo va Yèsu. A Pilate a ngoɗ aman ta va na.

⁵⁹ A Joseph a nco va Yèsu, a mpaɗda a bata mbela,

⁶⁰ a mfeda a gi dzavi na mɓuaʼa, man ta zlüno te za, a ngudumbala na ngezlambar kwa mbiaʼa a ma gi dzavai, a mdo na.

⁶¹ A Marie Magdala, a Marie ngiɗè, ta zhè, ta nza zuraʼa a ma gi dzavai.

Ta ɓer gi dzavai

⁶² Te mangoslèmaʼa, te deɓ pats man ta tül Pâque, ta ɓica va a ndohi mvi skwi a Zhiklè mbibihiaʼa, a ndohi pharisie, a sam Pilate, a ta gaɗa:

⁶³ Bai, ma ndo matsa man a pe ta ndohi a wai, a haka nga gèɗ: A ngaɗa, a pats man a nʼnza a nshèffè dai: Te deɓ mʼmèn makar i da slèmbèɗè auda te mʼmetsai.

⁶⁴ Gar haha goɗ aman ta cèpè gi dzavai, ha pats mamakaraʼa, aman golahi nengaʼa da shkè ɓai, a ta cèʼa, a ta gaɗa ta ndohi tèlèba te deɓaʼa: A nslambaɗkaɗauda te mʼmetsai; a ncèkèlma a nda gi a nholholaʼa, a fena nshè-lèkuraʼa.

⁶⁵ Pilate a ngaɗa ta: Kin ngots ndohi mɓer gai, vo-do a sam tengaʼa, va-ɓüro a maya kinè!

⁶⁶ A tengaʼa to do, a ta tsapa gi dzavai, a ta pu sojèhai, a ta ɓer gi dzavi a nda ta.