Matthew 25 - Ma Zhiklè

Ngèlègèɗ ma a géɗ dalahi kula

¹ Te deɓaʼa kokwar-Bi Zhiklè lèmèlèmè ara dalahi kula. Ta hul pitirla ta, aman ta dè zli gèɗ a ntsim ta.

² Aman ta zlam te va tengaʼa, maya ta azɓai. Nzlama ngiɗè, maya ta a zhè.

³ Dalahi man maya ta azɓai, ta hul pitirla ta, aman ta ca mbar a ri ɓai.

⁴ Dalahi mʼmaya te gèɗ, ta ceda mbar ta a ri te gatsak, a nda pitirla ta.

⁵ A ntsima a ngu ndudoh, a dalahi tèlèba ta zhingètè, a ta nzhun ta.

⁶ A géɗ vaɗ ta tsena nhèzlèwè mbiaʼa: Na haha ntsima a shkè! Vo-washkè a kin dè zli gèɗ a nda nengaʼa!

⁷ A dalahi tèlèba ta slambaɗa, a ta til pitirla ta.

⁸ Dalahi man maya ta azɓai, ta gaɗa ta dalahi mʼmaya te gèɗ: Va-ɓedza nga mbar kinè kètè, pitirla nga ta mbèc ta.

⁹ Aman dalahi mʼmaya te gèɗ ta mbeɗa ta a ma: Aʼai! Mbar a gu dèʼa man a nga, dèʼa man a kinè ɓai. Aman vo-do a luma, a kin sum mbar kinè!

¹⁰ A to do, aman ta shum mbar, a ntsima a mshkè. A tengahi man ta tila ma, to do a sam ngolala a nda nengaʼa. Te deɓaʼa a mpizla ntamagai.

¹¹ Dalahi man maya ta azɓai, ta shkè, a ta gaɗa: Bai, bai, winè nga!

¹² Aman nengaʼa a mʼmbeɗa ta a ma: A vava, i gaɗa kinè: I sen kinè ɓai!

¹³ Ani haha va-nza a dai, aman kin sun patsaʼa a samaʼa ɓai.

Ngèlègèɗ ma a géɗ gozhèm gozhèm man ta pa ta a ri a ndohai

¹⁴ Ndo ngiɗè a ndo a nshèwèlè. A mbaha ta golahi nengaʼa, a mva ta skwi nengaʼa, aman ta ɓereʼa.

¹⁵ A mpa na gozhèm zlam a ndo staɗ, a mpa na gozhèm cèw a ngiɗè, a gozhèm staɗ a ndo mamakaraʼa. A mva na ndo staɗ, staɗ, ara wuɗi na. Te deɓaʼa a mdo na.

¹⁶ A ndo man a ngots gozhèm zlam, a nʼndo, a ngu mizlinè a vna, a nʼngots gozhèm zlam a vaʼa.

¹⁷ Lèmèlèmè nengaʼa man a ngots go-zhèm cèw, a nʼngots cèw a vaʼa.

¹⁸ Aman ndo man a ngots staɗ, a nʼndo, a nʼnghede Suli bi na a vèvèɗ.

¹⁹ Te deɓaʼa bi tengaʼa a mshkè ngwai, a mbaha ta ɓèlèlihi nengaʼa, aman ta menda na Suli nengaʼa a deɓa.

²⁰ A ndo man a ngots gozhèm zlam a mshkè, a mpa na gozhèm zlam a vaʼa, a ngaɗa: Bai, ka pay gozhèm zlam, na haha, i gu mizlinè a vna, a i ngots go-zhèm zlam a vaʼa.

²¹ Bi na a ngaɗa na: Ka gu amba, ɓèl ga nlèɓèslèʼa, man amba. Ka lèɓèsla a géɗ skwi nkèshèʼa. Anai i da ge ka a ndo mɓer skwi mbiaʼa. Do a sam mwuffe bi ngaya!

²² A nengaʼa man a ngots gozhèm cèw a mshkè, a ngaɗa: Bai, ka pay gozhem cèw, na haha i ngots gozhem cèw ngiɗè a vna.

²³ Bi na a ngaɗa na: Ka gu amba, ka ɓèl ga nlèɓèslèʼa man amba. Ka lèɓèsla a géɗ skwi nkèshèʼa. I da ga ka a ndo mɓer skwi mbiaʼa. Do a sam mwuffè bi ngaya!

²⁴ Ndo man a ngots gozhèm staɗ, a mshkè a ngaɗa: Bai, i suna, ka ndo mwuɗitpa. Ka tsi dau a sam man ka zleka a pa ɓai. Ka ɓicè skwai a sam man ka ga a pa ɓai.

²⁵ I gu zlau, a i do man i nghede Suli ngaya a vèvèɗ. Skwi ngaya anai!

²⁶ Bi na a mʼmbeɗa na a ma: Ka ɓèl ambaɓiaʼa, ka ndo wudar, ka suna, i tsi dau a sam man i zleka a pa ɓai, i ɓicè skwi a sam man i ga a pa ɓai.

²⁷ Ka va ta Suli ga a ri a ndohi nhumbèdè Suli ɓi èhèmè, a i shkè, a i ngècè skwi ga a mpataka te vaʼa!

²⁸ Anai, vo-co gozhèm te ri nengaʼa, a kin va na a vaʼa a ndo man a ngots gozhèm kula.

²⁹ Ndo man a ngots skwai, ta va na a vaʼa, a skwi nengaʼa, a ngeza na, a njèkèɗiaʼa zhè. Ndo man a ngatsa skwa ɓai, ta cèma na skwi man a ngotso.

³⁰ Ɓèl ambalai, va-gso, va-kalda a ruva! Te pa ta kuɗai a ta peɗi zlèʼèn.

Kita ndohi herkeda

³¹ Aman kra-ndo a shkè a nʼnjèl na, a nda golahi Zhiklè tèlèba, a da nzi a géɗ sam nʼnzi bi nʼnjèl na.

³² A da ɓic ta ndohi herkeda tèlèba a sam nengaʼa. A nengaʼa a da ngel ta, lèmèlèmè ara ndo mɓer skwai a nkezla tambakai a ɓokwai.

³³ Tambakai, a da pe ta a civèɗ ri mandai, ɓokwai a civèɗ ri gula.

³⁴ A bai a da gaɗa ta tengahi nte civèɗ ri mandi na: Vo-washkè, kinè ndohi man Bab ga a pshè kinè ma. Va-ndau kokwar-Bi nengaʼa, man ntila a géɗ kinè te nhinkaɗ herkeda.

³⁵ A pats man mi a keɗyè, kin vay skwi nʼndai. Iyam a dzayè, kin vay iyam nsai. I ndo mbrok, kin fiyè a gai.

³⁶ Iyè adai, kin vay maslaka a va. I mbelakaɓai, kin ndzarahayè. I te dangai, kin ngelay dai.

³⁷ A ndohi nzuraʼa ta dɗ gaɗa na: Bai, nga rka ka, man mi a keɗe ka, a nga va ka skwi nʼndai, a ngèmè? Iyam a dza ka, a nga va ka iyam nsai a ngèmè?

³⁸ Nga rka ka ara ndo mbrok, a nga fe ka a gi a ngèmè? Ka adai, a nga va ka maslaka a va a ngèmè?

³⁹ Nga reka ka, ka m mbela ka ɓai, man ɓiy ka te dangai a nga wara ka day, a ngeme?

⁴⁰ Bai a ngaɗa ta: A vava i gaɗa kinè, aman kin gu arsa a sam mbelaw ndo staɗ te ndev kramamhi ga haha, kin gay a iyè.

⁴¹ Te deɓaʼa a da gaɗa ta tengahi ba man ta te civèɗ ri gula: Kinè ndohi mphomdaʼa, vo-do vogwa, man ntila a gèɗ bi-madzagai a golahi na, man a mbècè azɓai a mèdèp.

⁴² Aman mi a keɗyè, kin vay skwi nʼndi ɓai. Iyam a dzayè, kin vay iyam nsi ɓai.

⁴³ I ndo mbrok, kin fiyè a gi ɓai. Iyè adai, kin vay maslaka a va ɓai. I mbelakaɓai, i te gi dangai, kin ndzarahayè ɓai.

⁴⁴ Te deɓaʼa tengaʼa ba ta da gaɗa na: Bai, nga rka ka, man mi a keɗe ka, man iyam a dza ka, man ka ndo mbrok, man ka adai, man ka mbelakaɓai, man ka te gi dangai, a nga takaha ka ɓai, a ngèmè?

⁴⁵ Te deɓaʼa a da gaɗa ta: A vava i gaɗa kinè, aman kin ga arsa ɓai a sam mbelaw ndo staɗ haha, kin gay a iyè ɓi ba.

⁴⁶ A tengaʼa ta dè matakwan man a ndivè azɓai. Aman ndohi nzuraʼa ta dè a nshèffè mbiaʼa man a ndivè azɓai a mèdèp.