Matthew 24 - Ma Zhiklè

Yèsu a hodko ma a géɗ ngédèshè gi Zhiklè

¹ Yèsu a mshkè auda te gi Zhiklè. A golahi nengaʼa ta shkè a sam na, aman ta ngra na gihi nʼngelaʼa tsaɗ tsaɗ te gi Zhiklè.

² A Yèsu a ngaɗa ta: Kin rka skwi haha tèlèba ka ɓi ɗè? A vava i gaɗa kinè: Ko kwa staɗ a da nzi a géɗ ngiɗè azɓai, ta da mbeɗ ta tèlèba.

Nhinè matakwan

³ Aman a nza a géɗ za oliviers, golahi nengaʼa ta shkè a sam na, ta a gèɗ ta, a ta gaɗa: Gaɗa nga, kos skwi haha a da gi a ngèmè? Nda ngreda nga mshkè ngaya, a ndikèma skwi mè?

⁴ Yèsu a mʼmbeɗa ta a ma: Va-gu maya, aman ndo a pèkètède kinè azɓai!

⁵ Aman ta kumba ta da shkè a nzlembaɗ ga, a ta gaɗa: I Kristi! A ta pètè ta ndohi kumba.

⁶ Kin da tsena ma var, a nguzli var. Na haha, kin da gu zlau ɓai, aman skwi haha a da gi ndèzl. Aman skwi haha ndikèma skwi di ka bai.

⁷ Ndohi herkeda ngiɗè ta da slambaɗa ta va a ndohi herkeda ngiɗè. Kokwar-bi ngiɗè a da slambaɗa na va a kokwar-bi ngiɗè. Mi a di a shke, a herkeda a di a gudzai a sam tsaɗ tsaɗ.

⁸ Nasa tèlèba nhin matakwan di genè.

⁹ Te deɓaʼa ta da pe kinè a ri a skwi mwuɗitpa, ta da bazl kinè, a ndohi herkeda tèlèba ta da gi shèwa a kinè, a géɗ nzlembaɗ ga.

¹⁰ Te deɓaʼa skwi a slafadama ta sak a ndohi kumba. Ngidè a da ngrè ngiɗè, ngiɗè a da gi shèwa a ngiɗè.

¹¹ A ndohi nhadka ma ncèkèlma kumba ta da slèmbèɗè, a ta da pèkètède ta ndohi kumba.

¹² Te deɓaʼa a géɗ man mphömè a dè a ma ma, mwoy ndo a dè pkwe na te ndav ndohi kumba.

¹³ Aman ndo man a dè a ma ma a slagama, ha skwa a nʼndev na, a mbél na.

¹⁴ Ma mbelaʼa haha man a kokwar-Bi-Zhiklè, ta da njèʼa a géɗ herkeda tèlèba, a gi a skwi malwuɗi a sam ndohi herkeda tèlèba. Te deɓaʼa ndikèma skwai a shkè.

Matakwan mbiaʼa

¹⁵ Aman kin rka skwi ngedassa haha, man a ndèrè a ndo, a zhè a sam nkezlaʼa ara man Daniel a hodko ma (aman ndo man a jèngèʼa da huro!) –

¹⁶ ndohi te Judée, sèi ta hi ta a za,

¹⁷ a ndo man a nza a géɗ gai, da shkèhi ɓai, aman a hil skwi te gai.

¹⁸ Ndo man a zhè te gi dau, da shkè a deɓa ɓai, a nda cè maslaka na.

¹⁹ Woba ngwozi man ta a hwaɗ, a ngwozi man wuda a rai a pats sa!

²⁰ Va-tsu rai, nhi kinè da ga kinè a gèɗ a via ɓai, a pats nshèk va ka ɓai.

²¹ Aman matakwan mbiaʼa a zhè, te nhinkaɗ herkeda nʼngaʼa arsa ɓai, ha patsna, a pats ngiɗè ba a da gi arsa azɓai.

²² Aman Zhiklè nda takossa patshi sa ɓai, ar ndo a mbélè azɓai. Aman a géɗ ndohi man Zhiklè a mpar ta, a da tokossa patshi sa.

²³ Te deɓaʼa, man ndo ngiɗè a gaɗa kinè: Kristi a haha, Kristi ahngata! Kin co ma nengaʼa ɓai!

²⁴ Aman kristihi ncèkèlma, a ndohi nhadka ma ncèkèlma ta da slèmbèɗè, a ta ngreda skwi malwuɗi mbiaʼa, a nrkedai, aman ta pèkètède ta ndohi mparahiaʼa ba, man ta slaha.

²⁵ Na haha, i gaɗa kinè skwi tèlèba a hi ma.

²⁶ Aman ta da gaɗa kinè: Na ahngata, na zhè tʼhèshèkèɗ! Na haha, na zhè te gai! Kin co ma tengaʼa ɓai!

²⁷ Lèmèlèmè ara ndidiyam man a ndoko te verzi gai, kalkaɗai a géɗèʼa, a da gi lèmèlèmè a mshkè kra-ndo.

²⁸ Aman a sam zluèɗ nhuslaʼa, mohodokihai ta haya a pa.

Mshkè kra-ndo a deɓa

²⁹ Te deɓ matakwan sa, a nasa nasa pats a dè na zhiklè, a kia a hel sam asaɓai, a bantihai ta wush ta hai, a wuɗi te zhiklè te géɗèʼa a wurɗeko va.

³⁰ Te deɓaʼa skwi nʼngrédè kra-ndo a ngrèdè auda te giɗfèk, a gerzi ndohi herkeda tèlèba ta tsi lalau, a ta rka kra-ndo man a shkè te va vanai, a wuɗai, a nʼnjel na mbiaʼa.

³¹ A nengaʼa a di a zlinde ta golahi nengaʼa, a ta tsi tolom mbiaʼa, a ta ɓic ta ndohi mparahiaʼa, te tsagi herkeda faɗ, te verzi gai, ndè a verzi gi ngiɗè.

Va-ɗöl te wof tèngètè!

³² Va-ɗöl te wof tèngètè! Aman ri wof nengaʼa a gi kilɓakilɓaʼa, a vahaʼa a gi rutsutsutsaʼa a dai, via ndul ndul ma.

³³ Lèmèlèmè kinè ba, aman kin rka skwi haha, va-suna, kra-ndo a zhè ndul ndul a ntamagai.

³⁴ A vava i gaɗa kinè, ndohi man a géɗ herkeda antanta, ta da ndiv azɓai, sèi skwi haha a gi dai.

³⁵ Gidfèk a herkeda ta da ndiv ta. Aman ma ga a da ndiv azɓai.

Ndo a sun patsaʼa ɓai

³⁶ Aman patsaʼa, ndo a sun ɓai, ko golahi Zhiklè te zhiklè, ko kra Zhiklè, sèi Bab Zhiklè staɗ genè.

³⁷ Aman lèmèlèmè ara man ta gu a pats Noé, lèmèlèmè ta da gi a pats man kra-ndo a da shkè.

³⁸ Lèmèlèmè ara man ta gu a pats iyam mbiaʼa: ta ndau a ta sau, ta co ngwoz, to do ngwoz, ha pats man Noé a nʼndo a wurom,

³⁹ a ta hur skwi ngiɗè ɓai, ha pats man iyam mbiaʼa kalkaɗai, a nhel ta ma tèlèba. Lèmèlèmè mshkè kra-ndo.

⁴⁰ Te deɓaʼa ndohi cèw ta zhè te gi dau, staɗ ta cèʼa, staɗ ta jèke-da.

⁴¹ Ngwozi cèw ta shidè a vova, staɗ ta cèʼa, staɗ ta jèkeda.

⁴² Gar haha vo-zhoro, aman kin sun pats man Bi kinè a shkè, ɓai. Aman skwi haha va-suna:

⁴³ Aman babgi a suna, sam tèkè metsar a shkè, ar a nzhuna azɓai, a va na civèɗ azɓai, aman a zlinè gi nengaʼa.

⁴⁴ Lèmèlèmè kinè ba, vo-zhoro, aman kra-ndo a shkè a pats man kin hera ɓai.

Ɓèl nlèɓèslèa a ɓèl nlèɓèslɓiaʼa

⁴⁵ Ɓèl nlèɓèslèa, man a sun maya, wa, man bi a mvau a ndo mɓer ndohi mizlinè nengaʼa, aman a va ta skwi nʼndi ta tiɗè sama zuraʼa?

⁴⁶ Mwuffè a sam ɓèl sa, aman bi nengaʼa a shkè a deɓa, a ngè-cèʼa, a gi arsa.

⁴⁷ A vava, i gaɗa kinè, a da fi a bai a géɗ skwi nengaʼa tèlèba.

⁴⁸ Aman ɓèl ambaɓiaʼa a hérè te ndav na: Bi ga a gi ndudoh, a shkè di azɓai,

⁴⁹ a hinè man a tsi ndohi mizlinè nengaʼa, a ndi skwai, a si skwai a nda ndohi zom,

⁵⁰ bi ɓèl matsa a shkè a pats man ɓèl nengaʼa a nhera ɓai, sam tèkè a sun ɓai,

⁵¹ a kéɗèʼa, a va na skwi ara man a va ta ndohi nʼngwèdè ndo. Te pa ta kuɗai a ta peɗi zlèʼèn.