Matthew 23 - Ma Zhiklè

Wobau a géɗ malamhi a pharisiehai

¹ Tedeɓaʼa Yèsu a ngaɗa ta ndohi rèdèdèʼa a golahi nengaʼa:

² Malamhai a ndohi pharisie ta gshè va a njè Moise.

³ Skwi tèlèba man ta gaɗa kinè, va-gau, va-dzodzora! Aman kin gu ara man a tenga ɓai! Tengaʼa ta gèɗèʼa a ma genè, aman ta giaʼa azɓai.

⁴ Ta gi aman ndohi ta zhüɓ skwi m wuɗitpa a gèɗ ta, aman ta woya a ta takaha ta ɓai, ko kèshkata.

⁵ Aman skwi tèlèba ta gi a sam di ndohi genè. Ta ngreda ɗèlèwèr mbiaʼa, man ta tsi ri a vna, a bècècèr maslaka mbiaʼa.

⁶ Ta woya sam nʼnzi mbelaʼa a ma te ngolala. A ta woy a ta nzi a ma te gi njèngè ma Zhiklè.

⁷ Ta woya ndohi ta ga ta mbalai a luma. Ta woya ndohi ta baha ta Rabbi.

⁸ Aman kinè, kin gu arsa ɓai, da baha kinè Rabbi ɓai! Ndo njèngè ma kinè staɗgenè, kin tèlèba kramamhai.

⁹ Ko wawa kin baha na bab kinè ɓai, aman Bab kinè staɗgenè, nengaʼa man a zhè te zhiklè te géɗèʼa.

¹⁰ Lèmèlèmè aman ndohi ta baha kinè ndo mbiaʼa, kin co ɓai! Aman ndo mbiaʼa kinè staɗgenè, Kristi.

¹¹ Ndo man a fena ngiɗè te ndev kinè, da gu a ndo ntakaha kinè.

¹² Ko wawa man a woya a ngrè gèɗ na a ri na, ta da manda na gèɗ a hai. Ko wawa man a manda gèɗ na a hai a ri na, ta da slambaɗda na gèɗ.

¹³ Woba kinè, malamhai a ndohi pharisie! Kinè ndohi nʼngwèdè ndo, aman kin pizlèa kokwar Bi Zhiklè a sam ndohai.

¹⁴ Kinè, kin dè a pa azɓai, a kin gedassa ta civeɗ a ndohi man ta woy ndè a pa.

¹⁵ Woba kinè, malamhai a ndohi pharisie! Kinè ndohi nʼngwèdè ndo! Kin shè-wèlè a géɗ iyam mbiaʼa, a gèɗ herkeda tèlèba, aman kin bidè ko staɗ genè ba a civèɗ kinè. Te deɓaʼa, aman kin ngots ma, kin geda a ndo ambaɓiaʼa a fena kinè, man a dè dè vogwa kita.

¹⁶ Woba kinè, kin ndohi ncè ta ma ndohai, man kin rka di ɓai! Kin gaɗa: Ndo man a mbaɗa a nzlembaɗ gi Zhiklè, mʼmbèdè nengaʼa ambalai. Aman ndo man a mbaɗa a guro te gi Zhiklè, sèi a gi ara mʼmbèɗ na.

¹⁷ Nrzlavahai! Mandazlihai! Nfena mè, guro dè, dè gi Zhiklè man a gi guro a skwi nkezlaʼa dè?

¹⁸ Kin gèɗè zaʼa: Ndo man a mbaɗa a nzlembaɗ sam mvi skwi a Zhiklè, mʼmbèdè nengaʼa ambalai. Aman ndo man a mbaɗa a skwi man ta va na Zhiklè, man a zhè a pa, sèi a gi ara mʼmbèd na.

¹⁹ Mandazlihai! Nfena mè, skwi man ta va na Zhiklè ɗè, ɗè sam mvi skwi a Zhiklè man a gi skwi man ta va na Zhiklè a skwi nkezlaʼa ɗè?

²⁰ Ndo man a mbèɗè a nzlembaɗ sam mvi skwi a Zhiklè, a mbèɗè a nzlembaɗ nengaʼa, a nzlembaɗ skwi tèlèba man a géɗèʼa ba.

²¹ A ndo man a mbèɗè a nzlembaɗ gi Zhiklè, a mbèɗè a nzlembaɗ nengaʼa, a nzlembaɗ skwi man a nʼnza te pa ba.

²² Ndo man a mbèɗè a nzlembaɗ zhiklè, a mbèɗè a nzlembaɗ sam nʼnzi Bi Zhiklè, a nzlembaɗ nengaʼa man a nʼnza a pa ba.

²³ Woba kinè, malamhai a ndohi pharisie! Kinè ndohi nʼngwèdè ndo! Kin vi skwi staâ te va kula, ko te va skwi nkè-shèa; a kin jèkeda ma mbiaʼa te ma kita Zhiklè, ara: kita, nsi ndo te va, ncè a ndav. Aman agassa kin gi skwi haha, a kin jèka ma mbiaʼa te ma kita Zhiklè ɓi ba.

²⁴ Kinè ndohi ncè ta ma ndohai, man kin rka di ɓai! Kin dègèlè skwi nkèshèa auda te va skwi nʼndai, a skwi mbiaʼa man a ndèrè a ndo, kin ndi a hwaɗ.

²⁵ Woba kinè, malamhai a ndohi pharisie, kinè ndohi nʼngwèdè ndo! Kin pènè deb kokwi a gandaf, aman hwaɗ kokwi nʼndha a skwi metsar, a skwi ntétékè.

²⁶ Kinè ndohi pharisie man kin rka di ɓai! Va-pana hwaɗ kokwi a gandaf, ko deɓa ba a pènè.

²⁷ Woba kinè, malamhai a ndohi pharisie, kinè ndohi nʼngwèdè ndo! Kinè lèmèlèmè ara gi dzavai, man slalia a pa. Tʼuda ta rka ara man amba, aman tʼhwadaʼa nʼndha a vatasl nckondo a skwi nlizhèʼa tsaɗ tsaɗ.

²⁸ Kinè lèmèlèmè! A sam di ndohai, a deɓaʼa kinè ara ndohi nzuraʼa. Aman ndav kinè nʼndha a ncèkèlma a mphömè.

²⁹ Woba kinè, malamhai a ndohi pharisie, kinè ndohi nʼngwèdè ndo! Aman kin ri gi dzavi ndohi nhadka ma, a kin til gi dzavi ndohi nzuraʼa mbelembela,

³⁰ kin gaɗa: Man a matsa nga zhè a nda bababhi nga, ar nga mba ma a nda tengaʼa a nga bazl ta ndohi nhadka ma ɓai.

³¹ Gar haha kin ngreda va kinè auda a ri kinè, a kin gaɗa: Nga wudahi ndohi man ta bazl ta ndohi nhadka ma.

³² Anai, va-rufa skwi man babhi kinè ta gau!

³³ Zhüzhokihai! Wud tsebarhai! Kin da hi kinè auda a sam vogwa kita a maya mè?

³⁴ Gar haha i zlinde ta ndohi nhadka ma, a ndohi man ta sun maya, a ndohi man ta sun ɗèlèwèr Zhiklè, a sam kinè. Matrehiaʼa kin da bazl ta, a kin da gezlal ta, matrihiaʼa kin da ndah ta a mènèwèɗ te gi njèngè ma Zhiklè kinè, a kin dzam ta te kokwar te kokwar.

³⁵ Pombaz ndohi nzuraʼa tèlèba na gèɗ kinè, a hinè a sam Pombaz Abel, ndo nzuraʼa, ha ndè a Pombaz Zacharie, kra Barachie, man kin keɗaʼa a ma gi Zhiklè, a sam mvi skwi a Zhiklè.

³⁶ A vava i gaɗa kinè, kita haha tèlèba a di a shkè a géɗ verzi ndohi haha.

Yèsu a kuɗai a géɗ kokwar Jérusalem

³⁷ Jérusalem, Jérusalem, man ka bazl ta ndohi nhadka ma, man ka kal ta ndohi man Zhiklè a nzlinde ta a sam ngaya, a kwa! Sak ngama, man i woy a i ɓic ta wudahi ngaya a sam ga, ara wotsak, man a ɓic ta wudahi na a hwaɗ kelpasl na. Kin woya ɓai.

³⁸ Na haha, ta da jèkede gi kinè a dikai.

³⁹ Aman i gaɗa kinè: Anai kin da rkayè asaɓai, ha pats man kin da gaɗa: Nga slébèrdè nengaʼa man a shkè a nzlembaɗ Bi Zhiklè!