Matthew 22 - Ma Zhiklè

Ngèlègèɗ ma a géɗ ngolala nfi ngwoz a gai

¹ Yèsu a ngaɗa ta ngèlègèɗ ma ngiɗè zaʼa:

² Kokwar Bi Zhiklè lèmèlèmè ara bi ngiɗè, man a tu skwi nʼndi ngolala nfi ngwoz kra na a gai.

³ A nzlinde ta ɓèlèlihi nengaʼa, a ta baha ta mandalahi nengaʼa a sam ngolala. Aman ta woya ta shkè ɓai.

⁴ Te deɓaʼa a nzlinde ta ɓèlèlihi ngiɗè zaʼa, a ngaɗa: Va-gaɗa ta ndohi man nga baha ta a sam ngolala: Na haha, i tila skwi nʼndi ga ma! Nga bazla zlèhi ngrahiaʼa a skwi kuɗomhi ma. Tèlèba ntila. Vo-washkè a ngolala nfi ngwoz a gai!

⁵ Aman tengaʼa ta tsena ɓai, a to do ta, ngiɗè a gi dau na, ngiɗè a ngi gani na.

⁶ Njèkèdiaʼa ta por ɓèlèlihi nengaʼa, ta ga ta skwi ambaɓi tsaɗ tsaɗ, a ta bazl ta.

⁷ A bai a ngu ndav, a nzlinde ta sojèhi nengaʼa, a ta bazl ta ndohi nkeɗe ndo matsa, a ta fa na vogwa a kokwar tengaʼa.

⁸ Te deɓaʼa a ngaɗa ta ɓèlèlihi nengaʼa: Ngolala nfi ngwoz a gai ntila ma. Aman ndohi man ta baha ta a ngolala, ta ambaɓai.

⁹ Anai vo-do a dal kokwar, a civèɗ, a kin baha na ko wawa man kin ngècèʼa, a ngolala nfi ngwoz a gai.

¹⁰ A ɓèlèlihi matsa to do a civèɗ, a ta ɓic ta tèlèba, man ta ngotso, ndohi ambaɓihia ba, a ndohi mbelaʼa ba, cèw ba. Gi nʼndha a ndohi ngolala.

¹¹ Aman bai a mdo a gai, man a rka ta ndohi ngolala nengaʼa, a nrka ndo ngiɗè te pa, maslaka ngolala az a va ɓai.

¹² Bai a ngaɗa na: Masli ga, ka bezkaɗa gi haha a nangwa? Man ka ngatsa maslaka ngolala ɓai. A nengaʼa a nʼnza tètè.

¹³ A bai a ngaɗa ta ndohi mizlinè nengaʼa: Va-dzawama na ri a sak, a kin kaldaussa a va ruva. Te pa ta kuɗai a ta peɗi zlèʼèn.

¹⁴ Aman ndohi kumba man ta baha ta, aman ndohi man ta ngotso, kèshkata genè.

Mpi budu a Bai

¹⁵ Ndohi pharisie to do a ta tsomma, aman ta gshèʼa a géɗ ma na.

¹⁶ A ta zlinde ta golahi tengaʼa a nda ndohi Hérode a sam na, a ta gaɗa na: Ndo njèngè ma, nga suna, ka ndo nzuraʼa, a ka njè civèɗ Zhiklè zuraʼa. Ka gi zlau ndo azɓai, ka ɗèl ndo te di ka ɓai.

¹⁷ Ka hur kè? Amba aman ta pa na budu a bi dè, dè ambaɓi dè?

¹⁸ Aman Yèsu a sun maya shèwa tengaʼa, a ngaɗa: Kin piyè a wi èhèmè?

¹⁹ Va-ngray Suli budu! A ta va na gurso.

²⁰ A Yèsu a ngaɗa tai Gèɗ ngè man ta vèhèda pa?

²¹ Ta gaɗa na: A bai. A Yèsu a ngaɗa ta: Ani haha, va-va na skwi bai a bai, a skwi Bi Zhiklè a Bi Zhiklè.

²² Aman ta tsena ma haha, ta rzl ta, a ta jèkeda Yèsu a pa, a to do ta.

Njhèɗ-ma a géɗ nslambaɗkaɗauda te mʼmetsai

²³ A pats nasa ndohi sadducée ta shkè a sam na. Tengaʼa ta gaɗa, nslambaɗkaɗauda te mʼmetsai, azɓai. A ta dzhoɗo, a ta gaɗa:

²⁴ Ndo njèngè ma, Moise a ngaɗa: Man ndo ngiɗè a mʼmets na, wuda na azɓai, kramam nengaʼa da co ngwoz nengaʼa, aman a nyia na kra a kramam na.

²⁵ Aman kramamhi tsaraɗ ta zhè a sam nga. Tsuvomaʼa a nco ngwoz, a mʼmets na, a nʼngatsa kra ɓai, a njèka na ngwoz a kramam na.

²⁶ Lèmèlèmè a ngu a sam mbegéɗèhiaʼa, ha matsaraɗaʼa.

²⁷ Te deɓ tengaʼa tèlèba, ngwoz a mʼmets na.

²⁸ A pats nslambaɗkaɗauda a nda cè a ngwoz te va ntsaraɗ haha wa? Aman ta geda a va tèlèba.

²⁹ Yèsu a mʼmbeɗa ta a ma: Kin pèkèt kinè, te man kin sun ɗèlèwèr Zhiklè ɓai, a kin sun wuɗi Zhiklè ɓai.

³⁰ Aman a sam nslambaɗkaɗauda, ta cè ngwoz azɓai, ta dè ngwoz azɓai, aman ta ara golahi Zhiklè te zhiklè te géɗèʼa.

³¹ A géɗ nslambaɗkaɗauda te ndev ndohi mʼmetsaʼa, kin jongo ma man Zhiklè a gaɗa kinè ɓi dè?

³² Iyè, i Zhiklè Abraham, Zhiklè Isaac, Zhiklè Jacob? Nengaʼa Zhiklè ndohi mʼmetsa ka ɓai, aman Zhiklè ndohi a nshèffè.

³³ Aman ndohi rèdèdèa ta tsenaʼa, ta rzl ta a géɗ njè ma nengaʼa.

Ma nkwèr Zhiklè mbiaʼa tema kita Zhiklè

³⁴ Aman ndohi pharisie ta tsenaʼa, a mpizlèma ta ma a ndohi sadducée, ta ɓica va.

³⁵ Ndo njèngè ma kita staɗ te va tengaʼa a nkjudo, a ndzhoɗo:

³⁶ Ndo njèngè ma, ma kita Zhiklè mbiaʼa nangwa?

³⁷ Yèsu a ngaɗa na: Woy Bi Zhiklè ngaya a ndav ngaya tèlèba, a nshèffè ngaya tèlèba, a nhér gèɗ ngaya tèlèba.

³⁸ Na haha mbia te vaʼa, man a fena ngiɗè.

³⁹ Mace-cèwaʼa lèmèlèmè: Woy ndo ara man ka woya nshèffè ngaya!

⁴⁰ Ma kita tèlèba a ma ndohi nhadka ma, nte ma ncèw a haha.

Njhèɗ-ma a géɗ kra David

⁴¹ Aman ndohi pharisie ta ɓica va ma, Yèsu a ndzhad ta, a ngaɗa:

⁴² Kin hur kè, a géɗ Kristi? Nengaʼa verzi ngè? Ta gaɗa na: Verzi David.

⁴³ A ngaɗa ta: Ehèmè David a ri na a baha na te Mèzhèɓ Zhiklè:

⁴⁴ Bai a ngaɗa na Bi ga, nzahai a civèɗ ri mandi ga, ha i pe ta mayamhi ngaya a hwaɗ sak ngaya.

⁴⁵ Aman David a ri na a baha na Bai, kos verzi na kè?

⁴⁶ Ko staɗ a slaha a mʼmbeɗa na a pa ɓai. A pats nasa ndohi ta gu zlau, aman ta jhèɗè ma ngiɗè a vaʼa.