Matthew 21 - Ma Zhiklè

Yèsu a dè a kokwar Jérusalem ara Bai

¹ Aman ta ndikè ndul ndul a Jérusalem, te Bethphagé te man a za oliviers, Yèsu a nzlinde ta cèw te va golahi na,

² a ngaɗa ta: Vo-do a kokwar a ma kinè, kin da ngècè mam kɗèh langa, mʼmanaʼa a gol kɗèh a tsagiaʼa.

³ Va-prokoɗai, a kin hulkoyè! Aman ndo ngiɗè a dzhaɗ kinè, va-gaɗa na: Bai a woyaʼa. A da jèka kinè langa.

⁴ Ma haha tèlèba a gu ara man ndo nhadka ma a gaɗa:

⁵ Va-gaɗa na kokwar Sion: Na haha Bi ngaya a shkè a sam ngaya, a ndav amba, a deɓ kɗèh, man a zhüɓ skwai, gol kɗèh.

⁶ Aman golahi Yèsu to do ma, a ta gu ara man Yèsu a gaɗa ta,

⁷ ta hulkoɗi nda mam kɗèh a gol kɗèh, a ta pa na maslaka a deɓa, a Yèsu a nʼnza a pa.

⁸ A ndohi rèdèdèʼa a vata ta wuzheda maslaka tengaʼa a civèɗ, a tengahi ngiɗè ta berzlko vah te wof, a ta wusheda a civèɗ.

⁹ Ndohi nhayaʼa to do a ma, ndohi nhayaʼa ta dzodzor te deɓa, a ta boho a wuɗai: Va-nzala kra David! Nga slébèrdè nengaʼa man a shkè haha, a nzlembaɗ Bi Zhiklè. Nʼnjèlè te zhiklè te géɗèʼa!

¹⁰ Aman Yèsu a mdo a kokwar Jérusalem ma, ndohi tèlèba ta slambaɗa, a ta gaɗa: Nengaʼa wa?

¹¹ A ndohi rèdèdèʼa ta gaɗa: nengaʼa Yèsu, ndo nhadka ma, ndo Nazareth te kokwar Galilée.

Yèsu a tila gi Zhiklè

¹² Yèsu a ndo a gi Zhiklè, a ndzam ta ndohi gani tèlèba auda, tengahi man ta shum skwai, a tengahi man ta prè skwai te gi Zhiklè. A nzukde table ndohi nhumbèɗè sulai, a sam nʼnzi ndohi man ta prè nkuɗhom,

¹³ a ngaɗa ta: Ta Windo te ɗèlèwèr Zhiklè: Ta baha na gi ga, gi ntsi rai. Aman kinè, kin ndeda a gi ndohi metsar.

¹⁴ A ndohi mandazlai, a ndohi vedal ngiɗè te gi Zhiklè ta shkè a sam na, a nengaʼa a mʼmbel ta.

¹⁵ Aman ndohi mvi skwi a Zhiklè mbibihiaʼa, a malamhai, ta rka nrkedi man a gau, a wudahi man ta boho a wuɗai te gi Zhiklè: Va-nzala kra David! Ta gu ndav, a ta gaɗa na:

¹⁶ Ka tsena ma man ta gèɗè ɗè? Yèsu a ngaɗa ta: Halau, kin jongo di ɓi ɗè? Ka gu, a wudahi man ta gra di ɓai, a wudahi man a wa, ta slébèrdè ka.

¹⁷ A Yèsu a njèke ta, a njèkede kokwar a ndo Béthanie, a mʼmana a pa.

Yèsu a phomde wof kslor

¹⁸ A prèk a mʼmen na a deɓa a kokwar, a mi a nkeɗaʼa.

¹⁹ A nrka wof kslor a civèɗ, a ndo a samaʼa, a nʼngatsa vaha genè. A Yèsu a ngaɗa na: anai, ka da yi wuda asaɓai a mèdèp. A nasa nasa wof kslor a ngwor na.

²⁰ Aman golahi Yèsu ta rkaʼa, ta rzl ta, a ta gaɗa: Wof kslor a gwor na tsam-tsam ar haha èhèmè?

²¹ Yèsu a mʼmbeɗa ta a ma: A vava, i gaɗa kinè: Aman kin ce a ndav, a kin pi gèɗ cèw azɓai, kin da gi nrkedi kslor genè ka ɓai; aman kin gaɗa na za haha: Ca na va ngaya auda a ka kal ngaya a iyam mbiaʼa! A gi arsa.

²² Ko mèmè kin jhèɗè tèlè a ntsi ri kinè, a kin co a ndav, kin da ngècèʼa.

Ta jhèɗè wuɗi-Bi Yèsu

²³ Aman Yèsu a ndo a gi Zhiklè, a nsenda ta ndohai, ndohi mvi skwi a Zhiklè mbibihiaʼa a ndohi nhalaʼa ta shkè a sam na, a ta gaɗa: Ka gi skwi haha a wuɗi-bi ngè? Mva ka wuɗi-bi wa?

²⁴ Yèsu a mʼmbeɗa ta a ma: I ba dzhaɗ kinè ma ngiɗè staɗ, va-mendayè! Te deɓaʼa i da gaɗa kinè, a wuɗi-bi ngè man i gi skwi haha.

²⁵ Jean a ngu baptême a wuɗi-bi ngè, a wuɗi Zhiklè dè, dè a wuɗi ndohi dè? A tengaʼa ta hur te ndav ta: Aman nga gaɗa na: a Zhiklè— a da gaɗa nga: kin co a ndav ɓi èhèmè?

²⁶ Aman nga gaɗa na: a ndohai, — nga gi zlau ndohi rèdèdèʼa, aman tèlèba ta huro, Jean ndo nhadka ma.

²⁷ A ta gaɗa na Yèsu: Nga sun ɓai. A Yèsu a ngaɗa ta: I ba i ngreda kinè azɓai, a wuɗi-bi ngè man i gi skwi haha.

Ngèlègèɗ ma wudahi cèw

²⁸ Kin hér mè? Ndo ngiɗè a nʼngots wudahi cèw. A mdo a sam tsuvomaʼa, a ngaɗa na: Kra ga, a patsna, do a ka gu mizlinè te gi dau ga!

²⁹ A nengaʼa a mʼmbeɗa na a ma: Bai, i dè! Aman nʼnda ɓai.

³⁰ A ndo matsa a mdo a sam mbegéɗèʼa, a ngaɗa na lèmèlèmè: A nengaʼa a mʼmbeɗa na a ma: I woya ɓai. Aman a hur te deɓaʼa, a nʼndo.

³¹ Te va wudahi ncèw a haha, a ngu skwi man bab tengaʼa a woyaʼa, wa? Ta gaɗa na: Macecèwaʼa. A Yèsu a ngaɗa ta: A vava i gaɗa kinè: Ndohi ncèkèlè skwai, a ngwozi man ta gi baki a dala, ta dè a kokwar Bi Zhiklè, ta da ngelka kinè a deɓa.

³² Aman Jean a mshkè a sam kinè, a civèɗ ngi-zuraʼa, kin ca a ndav ɓai. Ndohi ncèkèlè skwai a ngwozi man ta gi baki a dala, ta co a ndav ta. Aman kinè, ko kin rka ta, kin kuda a gèɗ mali kinè ɓai, a kin ca a ndav azɓai.

Ngèlègèɗ ma a gèɗ gi lak a ndohi mizlinè nengaʼa

³³ Va-tsena ngèlègèɗ ma ngiɗè! Ndo ngiɗè a zhè, a nʼngu gi wof barassa, a nʼngalda pa a zlazlar, a ntila sam ndèc barassa, a nrom gi mɓer gi wof barassa, a mva na gi wof a ri a ndohi mizlinè nengaʼa, a ndo na nshèwèlè.

³⁴ A pats man skwi nʼndha, a nzlinde ta ɓèlèlihi na a sam ndohi mizlinè te gi wof, da da hulkona nyi wof na.

³⁵ A ndohi mizlinè ta pat ta ɓèlèlihi nengaʼa. Ta tsau ngiɗè, ngiɗè ta keɗaʼa, ngiɗè ta kola a kwa.

³⁶ Te deɓaʼa a nzlinde ta ɓèlèlihi ngiɗè, mba tengaʼa a nshèlèkuraʼa. A ta ga ta arsa genè.

³⁷ Te deɓaʼa a nzlündo kra nengaʼa a sam ta, a ngaɗa: Ta da gi hori kra ga!

³⁸ Aman ndohi mizlinè ta rka kra, ta goɗ a va ta: nengaʼa kra nʼndi gai. Vo-washkè, nga-kuɗokoya, a nga da ndi di giaʼa.

³⁹ A ta gso, a ta kaldaussa a ta keɗaʼa a dal gi wof barassa.

⁴⁰ Aman bab gi wof barassa a shke, a da ga ta ndohi mizlinè sa kè?

⁴¹ Ta gaɗa na: A da bazl ta ndohi ambaɓihiaʼa, a da va ta gi wof nengaʼa a ri a ndohi mizlinè ngiɗè, man ta woy a ta va na skwi na, a pats man skwi nʼngaʼa.

⁴² Yèsu a ngaɗa ta: Kin jongo te ɗèlèwèr Zhiklè bi dè? Kwa man ndohi ndizlè gai ta kwolaʼa, a nge na a kwa nte verziaʼa. Bi-Zhiklè a ngu arsa, a nga rzl nga a pa.

⁴³ Gar haha i gaɗa kinè: Ta da cè ko-kwar-Bi-Zhiklè te ri kinè, a ta da va ta ndohi verzi ngiɗè, aman ta va na skwi na.

⁴⁴ Ndo man a kèlèhai a géɗ kwa haha, a pèsl na. A ndo man kwa a nkala na a gèɗ, a hasleda pa.

⁴⁵ Aman ndohi mvi skwi a Zhiklè mbibihiaʼa a ndohi pharisie ta tsena ngèlègèɗ ma haha, ta suna, a goɗ a géɗ tengaʼa;

⁴⁶ a ta woya a ta gshèʼa. Aman ta gu zlau ndohi rèdèdèa. Tengaʼa ta rkaʼa, ara ndo nhadka ma.