Matthew 20 - Ma Zhiklè

Ndohi mzilinè te gi dau

¹ Kokwar-Bi-Zhiklè lèmèlèmè ara ndo ngiɗè, man a wurkoɗauda te gi a prèk, a woy ndohi mizlinè a gi dau na.

² Aman ta lèmdè ma ta a pa, nvèk staɗ a gi gurso 1, a nzlinde ta a gi dau na.

³ A pats wushèr a ndo auda, a nrka ta ndohi ngiɗè, ta nza a gi luma ambalai.

⁴ A ngaɗa ta: Kinè ba, vo-do a gi dau ga, a i da pela kinè zuraʼa.

⁵ A tengaʼa to do. Te deɓaʼa a ndo auda za a a géɗ pats,

⁶ a ndo auda zaʼa a pats nlaɓasla, a ndo auda zaʼa a pats tsafkata, a nʼngots ndohi ngiɗè, a ngaɗa ta: Kin vak a pa ambali èhèmè?

⁷ Ta gaɗa na: Ndo a mva nga mizlinè ɓai. A nengaʼa a ngaɗa ta: Kinè ba, vo-do a gi dau ga!

⁸ A dakwaɗ man pats nkala ma, bab gi dau a ngaɗa na bigol nengaʼa: Baha ta ndohi mizlinè, va ta skwi ntul tengaʼa, a hinè a sam ndohi man ta shkè a deɓa, a ndè a sam ndohi nshèlèkurhiaʼa.

⁹ Aman tengaʼa man a baha ta a mizlinè a dakwaɗ, ta shkè, ta ngots gurso staɗ staɗ tèlèba.

¹⁰ Aman ndohi nshèlèkurhiaʼa ta shkè, ta huro, ta ngècè skwi a vaʼa. Aman tengaʼa ba ta ngots gurso staɗ staɗ tèlèba.

¹¹ Aman ta ngotso, ta gu ma numnumaʼa a sam bab gi dau.

¹² Ta gaɗa: Ndohi haha man ta shkè a deɓa, ta gu mizlinè kèshkata genè, a ka va ta lèmèlèmè ara nga, man nga vak a mizlinè, a vazaza a va.

¹³ Nengaʼa a mʼmbeɗa na a ma a ndo staɗ te va tengaʼa: Masli ga, i ga ri a sam ngay ɓai! Nga lèmdè ma nga a géɗ gurso 1 ka ɓi ɗè?

¹⁴ Co Suli ngaya, a ko do ngaya! Aman i woy a i va na ndo man a shkè a deɓa haha lèmèlèmè ara man i va ka, ambaɓi dè? Skwi ga, a i gi a vna ara man i woya ka ɓi de?

¹⁵ Aman i gu skwi man amba, ka gi srak a vna dè?

¹⁶ Gar haha ndikèma ndohai ta da ndi a ndohi nshèlèkurhiaʼa. A ndohi nshèlèkurhiaʼa ta da gi a ndikèma ndohai.

Yèsu a hodko mʼmetsi nengaʼa, sak mamakaraʼa

¹⁷ Aman Yèsu a ndo a kokwar Jérusalem, a mbezl ta golahi na 12 a zlawa kètè, a ngaɗa ta:

¹⁸ Anai nga dè a kokwar Jérusalem, a ta da vi kra-ndo a ri a ndohi mvi skwi a Zhiklè mbibihiaʼa, a malamhai, a ta da ngela na kita mʼmetsai a gèɗ,

¹⁹ a ta da va na a ri a ndohi herkeda, aman ta da ngwossaha kiɗè-kiɗèʼa; ta da ndèhèʼa a mènèwèɗ, a ta da gezlalaʼa. Aman a pats mamakaraʼa a da slambaɗkaɗauda.

Njhèɗè ma Jacques a Jean

²⁰ Te deɓaʼa mam wuda Zébédée a mshkè a sam na, a nda wudahi nengaʼa, a nkalahi a deɓ sak nengaʼa, a ndzhoɗo.

²¹ Yèsu a ngaɗa na: Ka war mè? A nengaʼa a ngaɗa na: Goɗo, a woy wudahi ga cèw haha ta nzi te kokwar-Bi ngaya, staɗ te civèɗ ri mandai, staɗ te civèɗ ri gula ngaya.

²² Yèsu a mʼmbeɗa na a ma: Kin sun skwi man kin jhèɗè ɓai. Kin slaha kin si a kokwi man i da sia te pa dè? Ta gaɗa na: Nga slaha.

²³ Yèsu a ngaɗa ta: A vava kin da si a kokwi ga. Aman sam nʼnzi te civèɗ ri mandi ga, te civèɗ ri gula ga, nasa ma ga ka ɓai. Sam nʼnzi sa sèi a tengaʼa man Bab ga a tila ta a tengaʼa.

²⁴ Aman njèkèdia kula ta tsenaʼa, ta gu ndav a géɗ kramamhi tengaʼa ncèw.

²⁵ Yèsu a mbaha ta a sam na, a ngaɗa: Kin suna, bihi ndohi herkeda ta kwor ta ndohi herkeda, a ndohi mbibihiaʼa ta ga ta wuɗai.

²⁶ Te ndev kinè az arsa ɓai. Aman ko wawa man a woya a ngi a mbiaʼa te ndev kinè, da gu a ndo ntakaha kinè.

²⁷ A nengaʼa man a woya a ngi a tusuvomaʼa te ndev kinè, da gu a ɗèl kinè.

²⁸ Lèmèlèmè kra-ndo a mshkè aman ndohi ta takaha ka ɓai; a mshkè, aman a takaha ta ndohai, a vi nshèffè nengaʼa a skwi mpil gèɗ a géɗ ndohi kumba.

Mandazlai cèw ta rka dai

²⁹ Aman ta jèkeda kokwar Jéricho, ndohi rèdèdèʼa ta dzodzora.

³⁰ Na haha mandazlihi cèw, man ta nza a civèɗ, a ta tsena Yèsu a mbeza a tsagi ta, ta boho: Nga da se ka te va, Bai, kra David!

³¹ A ndohi rèdèdèʼa ta ga ta ndzoan, aman a ta nzi tètè. Aman ta boho a wuɗi holholaʼa: Nga da se ka te va, Bai, kra David!

³² A Yèsu a nzlatsahai, a mbaha ta, a ngaɗa: Kin woy a i ga kinè mè?

³³ Ta gaɗa na: Bai, gu aman a nga rka dai.

³⁴ A ta su Yèsu te va, a nlama ta di ta, a nasa nasa di ta a mwin na. A ta dzodzora.