Matthew 2 - Ma Zhiklè

Ndohi nɗèl bantai

¹ Aman Yèsu nya te kokwar Bethléhem ma, te Judée, te va man Hérode bai, na haha ndohi nɗèl bantai te man a civèɗ mvèng pats ta shkè Jérusalem,

² a ta gaɗa: Bi ndohi Juif man ta yau, na tema? Nga rka banti nengaʼa te civèɗ mvèng pats, a nga shkè, aman nga slébèrdèʼa.

³ Aman Hérode a ntsena ma haha, a mʼmbeɗa ma na ndav, a nda ndohi kokwar Jérusalem tèlèba.

⁴ A mɓic ta ndohi mvi skwi a Zhiklè mbibihiaʼa, a malamhai, a njunjor te ma tengaʼa: Ta yu Kristi tema?

⁵ Ta gaɗa na: Te Bethléhem, te kokwar Judée, man ndo nhadka ma a mwindo te ɗèlèwèr Zhiklè:

⁶ Ka kokwar Bethléhem, ka nhüɗök genè ka ɓai, aman te ka, bai a di a shkè auda. Nengaʼa a da gi a ndo mɓer ndohi Israel ga.

⁷ A Hérode a mbaha ta ndohi nɗèl bantai a metsar, a njunjor te ma tengaʼa: Kin rka banti a ngèmè?

⁸ A nzlinde ta a Bethléhem, a ngaɗa ta: Vo-do, a kin jhèɗè ma a géɗ kraʼa. Aman kin da ngotso, a i ba a i dè, a i dè slébèrdèʼa.

⁹ Aman ta tsena ma Hérode ma, to do. Na haha, bantai man ta rka te civèɗ mvèng pats, a nde ta, ha a nʼnza a géɗ gai, man kra te pa.

¹⁰ Aman ta rka bantai, ta wuffè a vata.

¹¹ A to do a gai, a ta ngots kraʼa, a Marie mam na, a ta gurɓahai a sam nengaʼa, a ta slubordo, a ta va na skwi mèshèlè: guro, mbar Burdi a myrrhe.

¹² A nshunè a nked ta, a ngaɗa ta, aman ta dè a deɓa a sam bi Hérode azɓai. A to do ta a ngwai, a ta beza a civèɗ ngiɗè.

Nhi ta a kokwar Egypte

¹³ Aman ndohi nɗèl bantai to do ta ma, gol Bi Zhiklè a ngudoko na va a dai a Joseph te nshunè, a ngaɗa na: Slambaɗa, co kra a mam na, a ka hu ngaya a kokwar Egypte, a ka da nza a pa, sèi a di i gaɗa ka; aman Hérode a woy kra, a nkéɗèʼa.

¹⁴ A Joseph a nslambaɗa, a nco kra a mam na, a vaɗ, a to do ta a kokwar Egypte.

¹⁵ A ta nza a pa, ha Hérode a mʼmets na ma; a gu ara ma Zhiklè man a goɗ te ma ndo nhadka ma: I baha na kra ga te kokwar Egypte.

Ta bazl ta wudahi nkèshèhia a

¹⁶ Aman bi Hérode a rkaʼa, ndohi nɗèl bantai ta mbeɗda hai, a ngu ndav a vata, a nzlinde ndohai, aman ta bazl ta wud ngurhai te kokwar Bethléhem, a sam man a kwèrè tèlèba. Wudahi man ta yu tok tok, ha a ngu mvi cèw, a ɗöl te pats man a ntsena te ma ndohi nɗèl bantai.

¹⁷ Gar haha a gu ara man Jérémie, ndo nhadka ma, a gaɗa:

¹⁸ Ta tsena mbèhè te Rama, kuda a wobau mbiaʼa. Rachel a kudi wud na, ndo a slaha a mbidè ɓai, te man wudahi na ta asaɓai.

Mshke ta a deɓa te kokwar Egypte

¹⁹ Te debaʼa, aman Hérode a mʼmets na ma, gol Bi Zhiklè a ngudoko na va a dai a Joseph te nshunè, te kokwar Egypte,

²⁰ a ngaɗa na: Slambaɗa, co kra a mam na, men ngaya a deɓa a kokwar Israel; aman tengahi man ta woy a ta keɗa kra, ta bazl ta ma.

²¹ A Joseph a nslambaɗa, a nco kra a mam na, a ta shkè a kokwar Israel.

²² Aman a tsenaʼa, Archélaus bai te kokwar Judée, te di man a Hérode, bab na, Joseph a ngu zlau, a nda a pa ɓai. A Zhiklè a nʼngreda na te nshunè, aman a dè a kokwar Galilée.

²³ A mdo, a nʼnza a kokwar Nazareth, a gu ara man ndohi nhadka ma ta gaɗa: Ta da baha na ndo Nazareth.