Matthew 19 - Ma Zhiklè

Njè-ma Yèsu a géɗ njèkè ngwoz

¹ Te deɓaʼa, aman Yèsu a ndeva ma haha ma, a nslambaɗa te kokwar Galilée, a ndo a ma kokwar Judée, te wud woyam Jourdain.

² A ndohi rèdè-dèa ta dzodzora, a Yésu a mʼmbel ta te pa te matakwan.

³ Ndohi pharisie ta shkè a sam na, a ta jkedaʼa, a ta gaɗa na: Amba aman ndo a kwola ngwoz na a géɗ ma tsaɗ tsaɗ dè?

⁴ Yèsu a mʼmbeɗa ta a ma: Kin jènga ɓi dè? Nengaʼa man a nge ta, tʼhinèkaɗna, a ngu nguraʼa a ngwoz.

⁵ Gar haha ndo a di a jèkeda bab na a mam na, a ta nzi a ngwoz na, a ta cèw ta ara ndo staɗ,

⁶ aman ta az cèw ɓai, ta nstaɗ. Gar haha skwi man Zhiklè a humda, ndo da kezla ɓai!

⁷ Ta gaɗa na: Moise a gaɗa, ta windè ɗèlèwèr njèkè ngwoz, a ta kwolaʼa, èhèmè?

⁸ Yèsu a ngaɗa ta: Moise a mva kinè civèɗ, aman kin jèkeda ngwoz kinè, a géɗ man ndav kinè nsassaya. Aman tʼhinèkadna, nʼnga ar haha ɓai.

⁹ Aman i gaɗa kinè: Ko wawa man a jèkeda ngwoz na, a géɗ mphömè ka ɓai, a cè ngwoz ngiɗè, a gi mphömè. (Ko wawa man a cè ngwoz, man baki ngiɗè a njèkeda, a gi mphömè.)

¹⁰ Golahi nengaʼa ta gaɗa na: Aman ma nguraʼa a ngwoz a zhè arsa, dara ta cè ngwoz azɓai, dara ta dè ngwoz azɓai!

¹¹ Aman Yèsu a ngaɗa ta: Ma haha ndohi ta cè tèlè azɓai, sèi tengahia man Zhi-klè a nʼngra ta.

¹² Ndohi ngiɗè kiɓèt te nyeka ta. Mathriaʼa ngiɗè, ndo a ntsuɓ ta. Mathriaʼa ta zhè, ta tsuɓa va ta a ri ta, a géɗ kokwar-Bi-Zhiklè. Aman ndo a slaha man a cinèʼa, da tsenaʼa!

Yèsu a pshè ta ma wudahai

¹³ Te deɓaʼa ta hulkoɗi wudahi a sam na, aman a nfa ta ri a gèɗ, a ntsi rai. A golahi nengaʼa ta ga ta ndzoan.

¹⁴ Aman Yèsu a gaɗa: Va-jèk ta wudahi aman ta shkè a sam ga. Kin gedassa civèɗ tengaʼa ɓai! Aman kokwar-Bi-Zhiklè a ndohi ara tengaʼa.

¹⁵ A Yèsu a nfa ta ri a gèɗ, a njèkeda samaʼa.

Ndo mèshèlè

¹⁶ Te deɓaʼa ndo ngiɗè a mshkè a sam na, a ngaɗa na: Ndo njèngè ma, i da gi skwi man amba be mè, aman i ngècè nshèffè a mèdèp ba?

¹⁷ Yèsu a ngaɗa na: Ka dzhaɗyè a géɗ skwi man amba èhèmè? Man amba, na staɗ genè. Aman ka woy a ka dè a nshèffè, dzodzor ma nkwèr Zhi-klè!

¹⁸ Nengaʼa a ngaɗa na: Ma mè? Yèsu a ngaɗa na: Ma a haha: Ka kuɗ ndo ɓai, ka gu mphömè ɓai, ka gu metsar ɓai, ka gu malwuɗi ncèkèlma ɓai,

¹⁹ slubordo bab ngaya a mam ngaya, woy ndo, ara man ka woy nshèffè ngaya!

²⁰ A gol matsa a ngaɗa na: Skwi haha tè-lèba i giaʼa; za njèkèɗi a sam ga mè?

²¹ A Yèsu a ngaɗa na: Man ka woy a ka ndikè a sam man ka gi a njèlèlèʼa, do a ka preda skwi ngaya tèlèba a ma, a ka va ta ndohi ntawassaʼa. Ka da ngècè skwi mèshèlè te zhiklè te géɗèʼa. A ka shkè, dzadzar-kayè!

²² Aman gol matsa a ntsena ma haha, a ndo na, ndav na a mbeɗè, aman skwi nengaʼa a zhè a vata.

²³ A Yèsu a ngaɗa ta golahi nengaʼa: A vava, i gaɗa kinè: Wuɗitpa a ndo mèshèlè a ndè a ko-kwar-Bi-Zhiklè.

²⁴ I gaɗa kinè zaʼa: Dara zlugumai man a bizhè a vèvèɗ lèpèr, a gèɗ ndo mèshèlè man a dè a kokwar-Bi-Zhiklè.

²⁵ Aman golahi Yèsu ta tsenaʼa, ta rzl ta kurzlaʼa, a ta gaɗa: Nslaha a mbel wa?

²⁶ Yèsu a mpa ta dai a ngaɗa ta: Ndo a slaha ɓai, sèi Zhiklèʼa slaha skwi tèlèba.

²⁷ Pierre a mʼmbeɗa na a ma: Ani haha, nga jèkeda skwi tèlèba ma, a nga dzadzar ka. Nga da ngècè mè?

²⁸ Yèsu a ngaɗa ta: A vava, i gaɗa kinè: Kinè, aman kin dzadzarkayè: a pats man herkeda a gi a mɓuaʼa, aman kra-ndo a nzi a géɗ sam nʼnzi bi nʼnjèl na, kinè ba kin da nzi a géɗ sam nʼnzi bi 12, a kin da ga ta kita a verzi ndohi Israel 12.

²⁹ Ko wawa man a jèkeda kramamhi na, man demamhi na, man bab na, a mam na, man ngwoz na, man wud na, man gi dauhi na, man gihi na, a géɗ nzlembaɗ ga, a ngècèʼa a vaʼa kumba. A ta ngècè nshèffè mbiaʼa man a ndiv azɓai a mèdèp.

³⁰ Aman ndohi kumba, te va ndohi nshèlèkurhiaʼa ta da ndi a nʼndikèma ndohai. A nʼndikèma ndohai ta da ndi a ndohi nshèlèkurhiaʼa.