Matthew 18 - Ma Zhiklè

Mbiaʼa man a fena ngiɗè, wa?

¹ A pats nasa golahi Yèsu ta shkè a sam na, a ta gaɗa: Ndo mbiaʼa a mfena ngiɗè te kokwar-Bi-Zhiklè, wa?

² A Yèsu a mbaha na kra nkèshèa staɗ a sam na, a nzlatseda a ndev tengaʼa,

³ a ngaɗa: A vava i gaɗa kinè, aman kin ngwèdè ndav kinè azɓai, a kin ndi ara wudahi ka ɓai, kin dè a kokwar-Bi-Zhi-klè azɓai.

⁴ Gar haha ndo man a manda gèɗ na a hi a ri na, a ndi a nkèshèʼa ara kra haha, nengaʼa mbiaʼa te kokwar-Bi-Zhi-klè.

⁵ Ko wawa man a cè kra nkèshèa aranta a nzlembaɗ ga, a cyè.

⁶ Aman ko wawa man a slafadama na sak a kra nkèshèa haha staɗ, man a cyè a ndav, dara ta mana na vova a daʼai, a ta kalda a drav iyam.

Mali a pe nga a wai

⁷ Woba herkeda a géɗ skwi man a slafadama ta sak a ndohai! Aman skwi man a slafadama ta sak a ndohai sèi a shkè ndèzl. Aman Woba ndo man a slafadama ta sak a ndohai!

⁸ Aman ri ngaya a sak ngaya ta kalde ka a malai, ngeldaussa, a ka wushedaussa! Dara ka dè a sam nshèf-fè ara ndo vedal, a géɗ man ta kalde ka a vogwa kita man a mbècè azɓai a mèdèp, a ri cèw a sak cèw.

⁹ Aman di ngaya a kalde ka a malai, vedotkoɗauda, a ka kaldaussa. Dara ka dè a sam nshèffè a di staɗ, a géɗ man ta kalde ka a vogwa kita a di cèw.

Ngèlègèɗ-ma a géɗ tambak man a zlak na

¹⁰ Va-gu maya aman kin da kwol ta wudahi nkèshèa haha ɓai, ko staɗ! Aman i gaɗa kinè, golahi Zhiklè tengaʼa ta rka Bab ga pèc pècèk te zhiklè.

¹¹ (Aman kra-ndo a mshkè, a mbel ta ndohi man ta zlak ta).

¹² Kin hér mè? Ndo man a ngots tambakihi tèmère, staɗ te va tengaʼa a nzlak na. A njeke ta njèkèɗiaʼa 99 a der za ka ɓi dè, amari a dè a woy nengaʼa man a zlak na?

¹³ Man a nda ngotso, a vava i gaɗa kinè, a wuffè a géɗèʼa holholaʼa, a fena a géɗ tengahia 99 man ta zlak ta ɓai.

¹⁴ Gar haha Bab kinè man a zhè te zhiklè a woya aman ko staɗ te va wudahi nkèshèa haha da ze ɓai!

Kramam nga man a gi malai

¹⁵ Aman kramam ngaya a ngu malai, do ngra na mali na, kinè a vna cèw genè. Aman nengaʼa a ntsun ma ngaya, ka da ngots kramam ngaya ma.

¹⁶ Aman a ntsena ma ngaya ɓai, co ndo ngiɗè staɗ man ɓai cèw, a verzai, a kin gi a ndohi malwuɗihi cèw, man ɓai makar.

¹⁷ Aman a woya a ncinè ma tengaʼa ɓai, gaɗa ta ndohi Zhiklè. Aman a woya ncinè ma mpi ndohi Zhiklè ha azɓai, rka ara ndo nte deɓa, ara ndo ncèkèlè skwai.

Mʼmèn skwai, mprè skwai

¹⁸ A vava i gaɗa kinè: Skwi man kin da mènèʼa a géɗ herkeda, mʼmana te zhiklè. A skwi man kin da prèʼa a géɗ herkeda, mpra te zhiklè.

¹⁹ A vava i gaɗa kinè zaʼa: Aman cèw te ndev kinè ta humda ma ta a géɗ herkeda, skwi ko mèmè man ta tsi rai a géɗèʼa, Bab ga te zhiklè a da va ta.

²⁰ Aman a sam man cèw, man makar, ta ɓica va a nzlembaɗ ga, i zhè te ndev tengaʼa.

Ma ɓèlè man a woya a prè mali ndo ngiɗè azɓai

²¹ Pierre a mshkè a sam Yèsu, a ngaɗa na: Bai, i prè mali kramam ga, man a gu mali a sam ga, a gi sak ngama? Sak tsaraɗ dè?

²² Yèsu a ngaɗa na: I gaɗa ka, tsaraɗ ka ɓai, aman tsaraɗ tsaraɗ, a gi 70.

²³ Gar haha kokwar-Bi-Zhiklè lèmèlèmè ara bi ngiɗè, man a baha ta ɓèlèlihi nengaʼa, aman ta menda na Suli na a deɓa.

²⁴ Ngidè a zhè, godèrè nengaʼa million kula te ri na.

²⁵ Aman a nʼngatsa Suli a mpil godèrè a vna ɓai. A bai a ngaɗa, da preda ma, a ngwoz na ba, a wudahi na ba, a skwi na tèlèba, a mpil godè-rè a vna.

²⁶ A ɓèl nengaʼa a nkalahai a deɓ sak nengaʼa, a ngadá: Bai, keɗay a va dai, i woya man a i pela ka tèlèba.

²⁷ A nengaʼa a nsu bi te va, a bai a njèkeda, a godèrè nengaʼa ba.

²⁸ A ɓèl matsa a ndo auda, a nʼngots masli ngiɗè. Godèrè nengaʼa te ri na, gozhem. A ngsama na daʼai, a ngaɗa na: Pelay godèrè ga!

²⁹ A ɓèl sa a nkalahai a deɓ sak nengaʼa, a ngaɗa na: Keɗay a va dai, i woya man a i pela ka.

³⁰ Aman nengaʼa a woya ɓai, a ndaʼa a gi dangai, ha a mpela godèrè nengaʼa.

³¹ Aman ɓèlèlihi bi matsa ta rkaʼa, a ndza ta a ndav, a ta ngreda na skwi man a gau a bai.

³² A bai a mbaha na a sam na, a ngaɗa na: Ka, ka ndo ka ɓai! Godèrè ngaya tèlèba i pra ka, aman ka tsu ri a sam ga.

³³ Ɓèl ngiɗè a se ka te va azɓi dè, ara man ka syè te va?

³⁴ A bai a ngu ndav a vata, a mva na a ri a ndohi kita, ha a mpela godèrè nengaʼa tèlèba.

³⁵ Bab ga te zhiklè a da gi lèmèlèmè aman staɗ staɗ tèlèba te ndev kinè kin prè mali kramamhi kinè azɓai.