Matthew 17 - Ma Zhiklè

Nʼngwèdè va Yésu a géɗ za

¹ Te deɓ mʼmèn mokwa, Yèsu a nco Pierre a nda Jacques a nda Jean, kramam Jacques, a nde ta a géɗ za mbiaʼa, ta a géɗ ta.

² A Yèsu a nʼngwoda ta va a dai. Medi nengaʼa a si di ara pats, maslaka nengaʼa nday-ndayaʼa ara skwi nhél sam.

³ Na haha, nda Moise a Elie ta gudoko ta va a dai, a ta goɗ a Yèsu.

⁴ Pierre a ngaɗa na: Bai, amba aman nga zhè a haha. Man ka woyaʼa, i gi gihi makar a haha; staɗ a ngaya, staɗ a Moise, staɗ a Elie.

⁵ Ngèdè ma nengaʼa, na haha vani nslekaɗa a mshkè, a mva ta mèzhèɓ a gèɗ. Na haha, ta tsena ngèdè staɗ te va vanai: Nengaʼa kra ga, man i woyaʼa a ndav ga. Ndav ga a wuffè kumba a géɗ nengaʼa. Va-tsun ma na!

⁶ Aman golahi Yèsu ta tsena ngèdè haha, ta kalahi a medai, a ta gu zlau a vata.

⁷ A Yèsu a nherda ta va, a nlama ta, a ngaɗa: Va-slambaɗa, kin gu zlau ɓai!

⁸ Aman ta pu di a zhiklè, ta rka ndo ngiɗè ɓai, sèi Yèsu staɗgenè.

⁹ Aman ta shkèhai te za, Yèsu a nfa ta ma a gèɗ: Skwi man a rka kinè a di haha, kin da ngreda na ndo ngiɗè ɓai, ha pats man kra-ndo a nslambaɗkaɗauda te ndev ndohi mʼmetsa ma.

¹⁰ A golahi nengaʼa ta dzhoɗo: Malamhai ta gaɗa: Sèi Elie a shkè nshèlèkura di kè?

¹¹ A Yèsu a mʼmbeɗa ta a ma: A vava, sèi Elie a shkè, a til skwi tèlèba.

¹² Aman i gaɗa kinè: Elie a mshkè ma, a ta sun nengaʼa ɓai, aman ta gu a sam na, ara ndav tengaʼa man a woyaʼa. Gar haha pats ngiɗè ta da geda na matakwan a kra-ndo lèmèlèmè.

¹³ A golahi nengaʼa ta suna, a goɗ a géɗ Jean Baptiste.

Yèsu a dzama mèzhèɓ ambaɓiaʼa auda te va kra

¹⁴ Aman ta shkè a sam ndohi rèdèdèa, ndo ngiɗè a mshkè a sam na, a ngurɓahai, a ngaɗa:

¹⁵ Bai, kra ga da se ka te va! Zluèʼd a ga na, skwa a dza na a vata. Pats ngiɗè a kèlè a vogwa, a kèlè a iyam.

¹⁶ I ckoɗa sam golahi ngaya ha, ta slaha ta mbela ɓai.

¹⁷ A Yèsu a mʼmbeɗa ta a ma: Kinè ndohi man ambaɓai, man kin ca a ndav ɓai! I da nzi a sam kinè genè de? I da nzi a sam kinè, aman i takaha kinè genè de? Va-ckoɗa a sam ga!

¹⁸ A Yèsu a nguvo madzagai, a nengaʼa a nhu na auda te va kra. A nasa nasa kra nguraʼa mʼmbel na.

¹⁹ Golahi Yèsu ta shkè a sam Yèsu, ta a géɗ ta, a ta gaɗa na: Nga slaha nga dzama bi èhèmè?

²⁰ Yèsu a ngaɗa ta: A géɗ man ncè-a-ndav kinè az a vata ɓai. A vava i gaɗa kinè, aman agassa ncè-a-ndav kinè a zhè kèshkata, ara tser gevda nkütè-kütèʼa, kin da gaɗa na za haha: Ca va ngaya a haha, do ahngata! A dè a pa.

²¹ A skwi man kin da slaha ɓi ba, azɓai.

Yèsu a hodko mʼmetsi nengaʼa zaʼa

²² Aman ta sawala te kokwar Galilée, Yèsu a ngaɗa ta: Ta da vi kra-ndo a ri a ndohai,

²³ a ta da keɗaʼa. Aman a pats mamakaraʼa, a da slambaɗkaɗauda. A ndav golahi Yèsu a mʼmbeɗ na.

Mpi Suli gi Zhiklè

²⁴ Aman ta shkè a kokwar Capernaum, ndohi ncèkèl budu ta shkè a sam Pierre, a ta gaɗa: Ndo njèngè ma kinè a pi Suli gi Zhiklè azɓi ɗè? A ngaɗa na: A pia ɓiha!

²⁵ Aman a mshkè a gai, Yèsu a ndzhoɗo tsam-tsam: Simon, ka hur kè? Bihi a gèɗ herkeda ta jhèɗè duak a budu te ri ngè? Te ri wudahi ngwi tenga dè, dè te ri ndohi mbrokihi dè?

²⁶ Pierre a ngaɗa na: Te ri ndohi mbrokihai.

²⁷ Yèsu a ngaɗa na: Gar haha wudahi ngwai, ndohi mpraʼa. Aman a géɗ man nga da slafadama ta sak azɓai, do a ma woyam, wusheda jir, a ka por klèf! Winèma na ma, a nshèlèkuraʼa, ka da ngècè gurso te pa. Co a ka da va ta, te di man a ga a ka.