Matthew 15 - Ma Zhiklè

Skwi man ndohi ta gu halaʼa

¹ Te deɓaʼa malamhai a ndohi pharisie te kokwar Jérusalem ta shkè a sam Yèsu, a ta gaɗa:

² Golahi ngaya ta jèkeda ma bababhi nga èhèmè? Aman ta ndi movar, ta pènè ri azɓai.

³ A Yèsu a mʼmbeɗa ta a ma: Kinè, kin jèkeda ma kita Zhiklè, a kin jéjèr ma bababhi kinè èhèmè?

⁴ Aman Zhiklè a gaɗa: Slubordo bab ngaya a mam ngaya. Ndo man a tsi derngasl a bab na, a mam na, a kèlè a kita mʼmetsai.

⁵ Aman kinè, kin gaɗa: Ndo man a gaɗa na bab na a mam na: Di man i gaɗa i takaha ka a vna, i va na Zhiklè, a takaha bab na a mam na te deɓaʼa asaɓai.

⁶ Ar haha kin fu ma Zhiklè a ma ambalai, a géɗ ma bababhi kinè.

⁷ Ndohi nʼngwèdè ndo! Esaie a nhodko ma a géɗ kinè amba, aman a gaɗa:

⁸ Ndohi haha ta slebardyè a ma; aman ndav tengaʼa dra a sam ga.

⁹ Ta slebardyè ambalai; aman ta senda ta ma ndo a ndohi ngiɗè.

Skwi nlizhè ndo

¹⁰ A nengaʼa a mbaha ta ndohi rèdèdèa, a ngaɗa ta: Va-tsenaʼa, a kin suna!

¹¹ Skwi man a beza a hwaɗ a ma, nasa a lizhè ndo azɓai. Sèi skwi man a bezkaɗ auda te ma, nasa a lizhè ndo.

¹² Te deɓaʼa golahi nengaʼa ta shkè a sam na, a ta gaɗa na: Ka sun dè, aman ndohi pharisie ta tsena ma haha, a ɗawarama ta ndav.

¹³ A Yèsu a mʼmbeɗa ta a ma: Skwi staɗ staɗ tèlèba, man Bab ga te zhiklè a nzleka ɓai, ta da ptsokoɗauda.

¹⁴ Va-jèke ta, tengaʼa ndohi ncè ta ma mandazlihai, man ta rka di ɓai. Aman mandazlai a fidè ma mandazli ngiɗè, cèw, ba ta da wushè a vèvèɗ.

¹⁵ Pierre a mʼmbeɗa na a ma: Ngra nga ngèlègèɗ-ma haha!

¹⁶ A Yèsu a ngaɗa na: Ko kinè ba, kin sun ɓi dè?

¹⁷ Kin tsena ɓi dè? Skwi tèlèba man a beza a ma, a deda hwaɗ genè, a dè na auda a zai.

¹⁸ A skwi man a shkè auda te ma, a shkè auda te ndav, nengaʼa a lizhè ndo.

¹⁹ Te ndav ndo, skwi ambaɓai man a hérèʼa a shkè auda: nked ndo, mphömè, nda ngwoz a nguraʼa ta gi baki a dala, ngi metsar, malwuɗi ncèkèlma, ntsi derngasl.

²⁰ Skwihi haha tèlèba ta lizhè ndo. Aman nʼndi skwai a ri mpanɓiaʼa, a lizhè ndo azɓai.

Ncè-a-ndav ngwoz Cananite

²¹ Yèsu a mdo na a kokwar Tyr a Sidon.

²² Na haha, ngwoz Cananite, man a shkè a kuma ngiɗè, a kuɗai, a ngaɗa: I da se ka te va, Bai, kra David! Madzagai a ga na dem ga a vata.

²³ Yèsu a mʼmbeɗa na a ma ɓai. A golahi nengaʼa ta shkè a sam na, a ta gaɗa na: Jèkeda ngwoz haha, man a dzadzarka nga a mbèhè!

²⁴ A nengaʼa a mʼmbeɗa ta a ma: Ta zlindekayè a géɗ ndo ngiɗè ɓai, sèi a géɗ tambakihi te Israel, man ta zlak ta.

²⁵ Aman ngwoz a mshkè, a nkalahai a deɓ sak nengaʼa, a ngaɗa: Bai, takahayè!

²⁶ A Yèsu a mʼmbeɗa na a ma: Ambaɓai aman ndo a cè movar wudahai, a wusheda na kdadihai.

²⁷ Halau, a bai! Ko kdadihai ta ndi boborɗihiaʼa, man ta wushahai a hwaɗ table bab ta.

²⁸ A Yèsu a mʼmbeɗa na a ma: Ngwoz, ncè-a-ndav ngaya a zhè a vata! A gi a sam ngaya, ara man ka woyaʼa. A nasa nasa dem nengaʼa mʼmbela.

Yèsu a mbel ta ndohi matakwan kumba

²⁹ Yèsu a ndo a ma iyam mbiaʼa te Galilée. Aman a nteva za, a nʼnzahai.

³⁰ A ndohi rèdèdèʼa ta shkè a sam na, a ta hulkoɗi ndohi man sak ta azɓai, a ndohi mandazlai, a ndohi ndaɓazlam, a ndohi vedal, a ndohi ngiɗè tsaɗ tsaɗ, a ta mande ta a sam sak Yèsu, a nengaʼa a mʼmbel ta.

³¹ Aman ndohi rèdèdèʼa ta rzl ta, aman ta rkaʼa, ndohi ndaɓazlam ta gèɗè, ndohi vedal ta mbela, a ndohi man sak ta azɓai, ta dè a sak ta, a ndohi mandazli ta rka dai. A ta slubordo Zhiklè Israel.

Ndohi 4.000 ta ngècè skwi nʼndai

³² Aman Yèsu a mbaha ta golahi nengaʼa a sam na, a ngaɗa ta: Ndohi rèdèdèʼa haha ta syè te va, aman mʼmèn makar ta zhè a sam ga, skwi nʼndi ta azɓai. I woya man a i va ta skwi nʼndai, ga i jèke ta; ta da tiɗ ta a mai a civèɗ.

³³ Aman golahi nengaʼa ta gaɗa na: Nga ngècè movar kumba, aman ndohi rèdèdèʼa ta ngézhè te ndev hèshèkèɗ haha, tema?

³⁴ A Yèsu a ngaɗa ta: Movar te ri kinè ngama? A ta gaɗa na: Tsaraɗ, a wud klèfhi cèwkata.

³⁵ A Yèsu a ngaɗa ta ndohi rèdèdèʼa, aman ta nza a herkeda.

³⁶ A nco movar tsaraɗ a klèfihai, a nshüd gèɗ a ntsakaʼa, a mva ta golahi nengaʼa, a golahi nengaʼa ta va ta ndohi rèdèdèʼa.

³⁷ Ta ndau tèlèba, a ta ngezaʼa, a ta hul njèkèɗi movar, gadagar tsaraɗ nʼndhaʼa.

³⁸ Ndohi man ta ndau, ngurhi 4.000, ngwozi a wudahi ta te va ɓai.

³⁹ Aman a njèke ta ndohi rèdèdèʼa ma, a mdo a wurom, a mdo a kokwar Magadan.