Matthew 14 - Ma Zhiklè

Mʼmetsi Jean Baptiste

¹ A pats nasa, Hérode, bi Galilée, a ntsena labar ma Yèsu,

² a ngaɗa ta ndohi nengaʼa: Ndo haha Jean Baptiste. Nengaʼa a nslambaɗkaɗna auda te va ndohi mʼmetsaʼa. Gar haha a gi skwi mbiaʼà arsa.

³ Aman te va nasa Hérode a ngso Jean, a ndzawaʼa, a mfeda a gi dangai, a géɗ Hérodias, ngwoz Philippe, kramam na,

⁴ aman Jean a ngaɗa na: Ambaɓai aman ko co ngwoz haha!

⁵ A woya a nkeɗaʼa, aman a gi zlau ndohi rèdèdèʼa. Tengaʼa ta rka Jean ara ndo nhadka ma.

⁶ A pats nhér nyi Hérode, a dem Hérodias a ngu wai a sam tengaʼa. Ambaha Hérode.

⁷ A Hérode a ngaɗa na, a mʼmbaɗa, a da va na skwi ko mèmè man a jhèɗèʼa.

⁸ A nengaʼa a ndzhoɗo, ara mam nengaʼa a ngaɗa na: Vay gèɗ Jean Baptiste a kèlèhèr.

⁹ A ndav bai a mʼmbeɗ na. Aman a géɗ mʼmbèɗ na, a géɗ ndohi man ta nza a sam na, a ngoɗo, da va na arsa.

¹⁰ A nzlündo ndo, aman a nguzlkoɗi gèɗ Jean Baptiste te gi dangai.

¹¹ A ta foko gèɗ nengaʼa a kèlèhèr, a ta va na dem matsa, a nengaʼa a mva na mam na.

¹² A golahi Jean ta shkè, a ta zuɓ nckondo nengaʼa, a ta raʼa. A to do a ta ngreda na maʼa a Yèsu.

Ndohi 5.000 ta ngècè skwi nʼndai

¹³ Yèsu a ntsena maʼa, a nʼndo na a wurom, a woy a ndè, aman a nzi a géɗ na. Aman ndohi rèdèdèa ta tsenaʼa, ta dzodzora a sak, te kokwarhi tsaɗ tsaɗ.

¹⁴ Ndè na auda, a nrka ndohi rèdèdèʼa, a ta sia te va, a mʼmbel ta ndohi matakwan.

¹⁵ A dakwaɗ, golahi Yèsu ta shkè a sam na, a ta gaɗa na: Na haha hèshèkèɗ, pats dakwaɗ ma. Gaɗa ta ndohi rèdèdèʼa, aman ta dè a kokwar, a ta shum skwi nʼndi ta.

¹⁶ Aman Yèsu a ngaɗa ta: Ko man ta dè ta azɓai: va-va ta skwi nʼndi te ri kinè! Aman tengaʼa ta gaɗa na:

¹⁷ Nga ngatsa skwa a haha ɓai, sèi movar zlam a klèf cèw.

¹⁸ A Yèsu a ngaɗa: Va-hulkoɗa a sam ga!

¹⁹ A ngaɗa ta ndohi rèdèdèʼa, aman ta nzahai a kuza. A mco movar zlam a klèf cèw, a mpu di a zhiklè, a mpshè na ma, a ntsaka movar, a mva ta golahi nengaʼa, a golahi ta va ta ndohi rèdèdèʼa.

²⁰ A ta ndau tèlèba, a ta ngezaʼa. A ta hul njèkèɗi movar, gadagar 12, nʼndhaʼa.

²¹ Ndohi man ta ndau, ngurhi 5.000, ngwozi a wudahi ta te va ɓai.

Yèsu a dè a géɗ iyam mbiaʼa

²² Tsam-tsam Yèsu a mvas ta golahi nengaʼa a wurom, aman ta dè a ma nengaʼa a wud woyam. A njèke ta ndohi rèdèdèʼa.

²³ Aman a njèke ta ndohi ma, a ndo na za, a géɗ na, aman a tsi rai. A dakwaɗ man pats nkala ma, nengaʼa a zhè a géɗ za.

²⁴ Wurom a zhè te ndev iyam mbiaʼa, a iyam a ngeda na matakwan a wurom, a kozlar a erɗeka ta a deɓa.

²⁵ Aman a prèk vaɗ, a mdo a sam tengaʼa, a mdo a géɗ iyam.

²⁶ Aman golahi nengaʼa ta rkaʼa, a dè a géɗ iyam, ta gu zlau, a ta gaɗa: Mèzhèɓ skwi ngiɗè! A ta tsu lalau.

²⁷ Tsam-tsam Yèsu a ngaɗa ta: Va-mana ndav kinè, iyè, kin gu zlau ɓai!

²⁸ A Pierre a mʼmbeɗa na a ma: Bai, man ka gokwèn, bahayè, a i dè a sam ngaya a géɗ iyam.

²⁹ Yèsu a ngaɗa na: Washkè! A Pierre a njèkeda wurom, a ndo a géɗ iyam, aman a dè a sam Yèsu.

³⁰ Aman a mpu di a kozlar mbiaʼa, a ngu zlau, a nhüno ndè a va iyam, a ntsu lalau, a ngaɗa: Bai, mbelyè!

³¹ A Yèsu a ntor ri tsam-tsam, a ngso, a ngaɗa na: Ka ndo man ka co a ndav kèshkata genè, ka pu gèɗ cèw èhèmè?

³² Aman to do a wurom ma, kozlar a njèkeda.

³³ A tengahi te wurom ta shkè, a ta kalahi a deɓ sak nengaʼa, a ta gaɗa: A vava, ka, kra Zhiklè!

Yèsu a mbél ndo matakwan te Génésareth

³⁴ A ta ndikè a wud woyam mbiaʼa te kokwar Génésareth.

³⁵ Aman ndohi te kokwar sa ta sun Yèsu, a ta baha ta ndohi kokwar a ndohi a tsagi kokwar tèlèba, a ta hulkoɗi ndohi matakwan tèlèba a sam na.

³⁶ A ta tsu riaʼa, ta woy a ta lama na ko ma maslaka genè ba. Ko wawa man a lama na, a mʼmbel na dzaf dzafaʼa.