Matthew 12 - Ma Zhiklè

Golahi Yèsu ta pèslè dau a pats nshèk va

¹ A pats nasa Yèsu a mbeza a ndev gi dau, a pats nshèk va. Ami a nked ta golahi nengaʼa. A ta hüno a ta pèsl dau, a ta ndiaʼa.

² Aman ndohi pharisie ta rkaʼa, ta gaɗa na Yèsu: Na haha, golahi ngaya ta gi skwi ambaɓiaʼa a pats nshèk va.

³ Yèsu a ngaɗa ta: Kin jènga ɓi de, skwi man David a gau, man mi a nkedaʼa, a tengahia ha man ta zhè a sam na?

⁴ A nʼndo a gi Zhiklè, a nʼndau movar nkezlaʼa, movar man sèi ndohi mvi skwi a Zhiklè ta ndia genè, David a ndohi nenga ka ɓai.

⁵ Kin jènga te ma kita Zhiklè ɓi dè, aman ndohi mvi skwi a Zhiklè ta gi skwi ta a pats nshèk va, mali a sam Zhiklè ka ɓai.

⁶ Aman i gaɗa kinè: Na haha skwi a zhè man a fena gi Zhiklè.

⁷ Aman agassa kin sun verzi ma haha: Nsi ndo te va a fena mvi skwi a Zhiklè, ar kin fa ta mali a gèɗ a ndohi man mali ta azɓi ɓai.

⁸ Aman kra-ndo, bai, a géɗ pats nshèk va ha.

Ndo man ri na ngwora

⁹ Aman Yèsu a nʼndo a ma, a nʼndo a ginjèngè-ma-Zhiklè tengaʼa.

¹⁰ Na haha, ndo staɗ a zhè te pa, ri nengaʼa ngwora. A ta dzhoɗo Yèsu, a ta gaɗa na: Amba aman ta mbel ndo a pats nshèk va dè? Ta hèsh maya, a ta gi ma a géɗ Yèsu.

¹¹ A Yèsu a ngaɗa ta: Te ndev kinè, man tambak nengaʼa staɗgenè, a pats nshèk va a nkal na a vèvèɗ, nckoɗauda azɓi wa?

¹² Aman ndo a fena tambak azɓi dè? Ani haha amba aman a pats nshèk va ta gi skwi mbelaʼa.

¹³ Te deɓaʼa a ngaɗa na ndo matsa: Pelaha ri ngaya! A mpelaha rai, a ntila, a nʼnge na ara ri ngiɗè.

¹⁴ A ndohi pharisie to do auda, a ta vhè ma a géɗèʼa, a ta woya aman ta kéɗèʼa.

Yèsu, ɗèl Zhiklè

¹⁵ Aman Yèsu a sun skwi haha, a njèke-da samaʼa. A ndohi rèdèdèa ta dzodzora, a nengaʼa a mʼmbel ta tèlèba te matakwan.

¹⁶ A Yèsu a mfa ta ma a gèɗ, da ngreda ɓai,

¹⁷ aman a gi ara ma Esaie, ndo nhadka ma, man a gaɗa:

¹⁸ Na haha, ɓèl ga man i ngotskoɗauda. Ndo man i woya a ndav ga; ndav ga a wuffè kumba a géɗ nengaʼa.

¹⁹ I da vi Mèzhèɓ ga a gèɗ na, a nengaʼa a da njè ta kita ga a ndohi herkeda. Nengaʼa a da virsl ma a ndo azɓai, a bèhè a wuɗi azɓai, a ndo a cinè daʼai nengaʼa a dal kokwar azɓai.

²⁰ A pèslè pandar ngurɓaʼa azɓai, a mbècè vogwa ndüzhèa azɓai, ha skwi nzuraʼa a gi a ngulaʼa.

²¹ A ndohi herkeda ta da zhèr skwi tèlè a nzlembaɗ nengaʼa.

Yèsu a madzagai

²² Te deɓaʼa ta cko ndo madzagai a sam na, ndoʼa mandazlai ndaɓazlam. A Yèsu a mʼmbelaʼa, a gèɗè, a rka dai.

²³ A ndohi rèdèdèa tèlèba ta rzl ta, a ta gaɗa: nengaʼa kra David ka ɓi dè?

²⁴ Ndohi pharisie, aman ta tsenaʼa, ta gaɗa: nengaʼa a jèr madzagihi auda a Béelzébul, bi-madzagai.

²⁵ Aman Yèsu a sun skwi man ta hur te ndav ta, a ngaɗa ta: Kokwar-bi man nkezla te va, a gédèsh na. Te kokwar-bi staɗ staɗ tèlèba, te gi staɗ staɗ tèlèba, man gèɗ ndohi nkezla, ta nzi azɓai.

²⁶ Aman Sadan a jèr Sadan auda, a ngi gèɗ a va na. A kokwar-bi nengaʼa a slaha man a nzi ɗè?

²⁷ Aman i jèr madzagihi auda a Béelzébul, ndohi kinè ta dzar ta a mè? Gar haha tengaʼa ta gi a ndohi kita kinè.

²⁸ Aman i jèr madzagihi auda a Mèzhèɓ Zhiklè, nasa kokwar-Bi-Zhiklè nshkè a sam kinè ma.

²⁹ Ndo a slaha a ndè a gi ndo wuɗai, aman a gi metsar te pa, sèi a ndzawa ndo wuɗi nshèlèkuraʼa ka ɓi dè? Sèi a dzawa ndo wuɗi nshèlèkuraʼa dai, te deɓaʼa a dè a gi metsar te gi nengaʼa.

³⁰ Ndo man nga a vna ka ɓai, nengaʼa mayam ga. Ndo man nga ɓicè skwi a vna ka ɓai, a ksarda skwi aussa.

³¹ Gar haha i gaɗa kinè: Mali tèlèba, ma ndérdè ndo tèlèba, Zhiklè a da pra ta ndohai. Aman ndo man a dérdè Mèzhèɓ Zhiklè nkezlaʼa, mali nengaʼa a prè azɓai.

³² Ko wawa man a gi ma a géɗ kra-ndo, mali na a prè; aman ko wawa man a gi ma a géɗ Mèzhèɓ Zhiklè nkezlaʼa, mali nengaʼa a prè azɓai, ko tʼherkeda antanta, ko pats ngiɗè.

Wof a nyi nengaʼa

³³ Kin gaɗa: Wof man amba a da yi wuda man amba. Aman wof ambaɓiaʼa a da yi wuda ambaɓiaʼa. Aman te nyi wof ta shin wofaʼa.

³⁴ Wud tsebarhai! Kinè ambaɓai, kin slaha kin gèɗè ma man amba dè? Aman te skwi nʼndha te ndav, ma a gèɗèʼa.

³⁵ Ndo man amba a cko skwi man amba auda te ndav nengaʼa man amba. Ndo man ambaɓai a cko skwi man ambaɓai auda te ndav nengaʼa man ambaɓai.

³⁶ Aman i gaɗa kinè: a géɗ ma ambali staɗ staɗ tèlèba, man ndo a gèɗèʼa, ta da jhèɗè maʼa a pats kita.

³⁷ A géɗ ma nengaʼa ta da gi kita, gar amba, gar ambaɓai.

³⁸ Te deɓaʼa ndohi pharisie a malamhai cèwkata, ta gaɗa na: Ndo njèngè ma, nga woy a nga rka skwi malwuɗi a sam ngaya.

³⁹ Yèsu a mʼmbeɗa ta a ma: Ndohi ambaɓihiaʼa, a ndohi mphomaʼa ta jhèɗè skwi malwudai. Aman ta ngècè skwi malwuɗi ngiɗè azɓai, sèi skwi malwuɗi Jonas, ndo nhadka ma.

⁴⁰ Aman lèmèlèmè ara Jonas a nʼnza a hwaɗ klèf mbiaʼa pats makar, vaɗ makar, lèmèlèmè kra-ndo a da nzi thwaɗ herkeda, pats makar, vaɗ makar.

⁴¹ Ndohi te kokwar Ninive ta da slèmbèɗè a sam kita a nda ndohi haha, a ta da fa ta mali a gèɗ; aman tengaʼa ta ngwoda ndav ta, a géɗ ma Zhi-klè man Jonas a nje ta. Na haha, ndo a zhè man a fena Jonas.

⁴² A bai man ngwozaʼa te tsagai a da slèmbèɗè a sam kita a nda ndohi haha, a nengaʼa a da fa ta mali a gèɗ; aman nengaʼa a mshkè te verzi herkeda, aman a cinè ma maya Salomon. Na haha, ndo a zhè man a fena Salomon.

Mèzhèɓ ambaɓiaʼa a shke a deɓa

⁴³ Aman mèzhèɓ ambaɓiaʼa a ndo auda te ndo, a dè nshèwèlè a ɓala, a woya a nshèk va, aman a ngècè nshèk va azɓai.

⁴⁴ Te deɓaʼa a gaɗa: I woy a i dè a deɓa a gi ga, man i slambaɗka te pa. Aman a shkè, a ngècè gai, skwa a te pa ɓai, ngatsa, ntila.

⁴⁵ Te deɓaʼa a dè, a hil mèzhèɓhi ambaɓihiaʼa tsaraɗ a nda nengaʼa, ta ambaɓai, ta fena nengaʼa, a ta dè a pa, a ta nzi a pa. Te deɓaʼa ndo haha wuɗitpa holholaʼa, a fena matsa. A gi lèmèlèmè a sam ndohi ambaɓihiaʼa tʼherkeda haha.

Mam a kramamhi Yèsu

⁴⁶ Te va man a gèɗè a ndohi rèdèdèʼa, na haha mam na a kramamhi na ta zlatsa tʼuda, a ta woy a ta gaɗa na.

⁴⁷ A ndo ngiɗè a ngaɗa na Yèsu: Na haha, nda mam ngaya a kramamhi ngaya ta zlatsa tʼuda, a ta woy a ta gaɗa ka.

⁴⁸ A Yèsu a mʼmbeɗa na a ma a ndo ngaɗa na: Mam ga wa, kramamhi ga wa?

⁴⁹ A ngeda ri a gèɗ golahi nengaʼa tèlèba, a ngaɗa: Na haha, mam ga a kramamhi ga.

⁵⁰ Aman ko wawa man a gi skwi man Bab ga te zhiklè a woyaʼa, nengaʼa kramam ga, demam ga, mam ga.