Matthew 11 - Ma Zhiklè

Ndohi sak Jean Baptiste

¹ Aman Yèsu a nʼndeva ma nengaʼa haha a sam golahi na ma, a ndo na, a nsenda ta ma, a njè ta ma Zhi-klè te kokwarhi tengaʼa.

² Aman Jean te gi dangai a ntsena ma a géɗ mizlinè Kristi, a nzlinde ta golahi nengaʼa, man ta gaɗa na:

³ Ka nengaʼa man ta gaɗa a da shkè ɗè, ɗè nga zhèr ndo ngiɗè di ɗè?

⁴ Yèsu a mʼmbeɗa ta a ma: Vo-do a kin menda na Jean skwi man kin tsenaʼa a kin rkaʼa:

⁵ mandazlihi ta rka dai, ndohi vedal ta dè a sak ta, ndohi hutsoɗ ta suɗ ta, ndaɓazlamhai ta tsena zlembaɗ, ndohi mʼmetsaʼa ta slambaɗ ta. Ma mbelaʼa, ta njè a sam ndohi ntawassaʼa.

⁶ Mwuffe a sam ndo man sak nengaʼa a slèfèdè azbai a géɗ ga!

⁷ Aman to do ta ma, Yèsu a nhüno a ngaɗa ta ndohi rèdèdèa ma a géɗ Jean: Kin do a hèshèkèɗ, a kin da war mè? Pandar man kozlar a gidè dè?

⁸ Kos kin do a kin da war mè? Ndo man maslaka mbelaʼa a va dè? Na haha, ndohi man ta feda maslaka mbelaʼa a va, ta te gi bihai.

⁹ Kin do, a kin da war mè? Ndo nhadka ma dè? I gaɗa kinè: nengaʼa a fena ndo nhadka ma.

¹⁰ Nengaʼa ndo man ta windeda ɗèlèwèr Zhiklè: Na haha, i zlindè gol ga a ma ngaya, a ntil civèɗ a ma ngaya.

¹¹ I gaɗa kinè a vava: te va ndohi man ngwozi ta yau, ndo nfena Jean Baptiste azɓai. Aman ndo man ta sla na ndo nkè-shèa te kokwar-Bi-Zhiklè, mba nengaʼa a Jean.

¹² A hüno te Jean Baptiste, ha patsna, ta woy kokwar-bi-Zhiklè a wuɗai, a ndohi wuɗai ta woya nʼngèzlèʼa.

¹³ Ko ndohi nhadka ma, ko ma kita, ta hodko ma, ha nshkè Jean.

¹⁴ Aman kin woy a kin cèʼa, nengaʼa Elie man ta gaɗa a di a shkè.

¹⁵ Ndo man zlembaɗ na a zhè, da tsenaʼa!

¹⁶ I lèmdè ndohi a géɗ herkeda haha a mè? Ta lèmèlèmè ara wudahai man ta nza a luma, a ta baha ta mandalahi tengaʼa, a ta gaɗa:

¹⁷ Nga voɗ shingelèk, a kin gatsa ɓai. Nga tsu nguzlah, a kin ga wobu ɓai.

¹⁸ Jean a mshkè, a nʼnda skwa ɓai, a nsa skwa ɓai, a ta gaɗa: madzagi a ga na.

¹⁹ Kra-ndo a mshkè, a ndi skwai, a si skwai, a kin gaɗa: Na haha, ndo nʼndi skwi hamhamaʼa, ndo zom, mandal ndohi ncèkèlè skwai, a ndohi malihai! Maya a ngrédè auda te skwi man maya a giaʼa.

Wobau a géɗ kokwar man a woya nʼngwèdè ndav ɓai

²⁰ Te deɓaʼa a nhüno man a gi ndzoan a géɗ kokwarhi mbibihiaʼa, man a gu nrkedi holholaʼa te pa, aman ndohi ta ngwoda ndav ɓai.

²¹ Woba ka, kokwar Chorazin! Woba ka, kokwar Bethsaida! Aman agassa ta gu nrkedihi te kokwar Tyr a Sidon, ara man ta gu a sam ngaya, ar ndohi te pa, ta ngwoda ndav ta te mèrwèc nʼnzi a zhè ma.

²² Aman i gaɗa kinè: Kokwar Tyr a Sidon, dara tengaʼa a kinè a pats kita.

²³ Ka Capernaum, ka da grè ta zhiklè dè? Aʼai! Ta da kalde ka a vogwa kita. Aman agassa ta gu nrkedihi te kokwar Sodome, ara man ta gu a sam ngaya, ar kokwar Sodome a nzi dai, ha nshkè na ma mpatsna.

²⁴ Aman i gaɗa kinè: Kokwar Sodome dara nengaʼa a kinè a pats kita.

Vo-washkè a sam ga, a kin ngècè nshèk va!

²⁵ A pats nasa Yèsu a nhüno a ngaɗa: I shida ka gèɗ, Bab ga, Bi zhiklè a Bi herkeda, aman ka nghede skwi haha a sam ndohi maya, a ndohi man ta sun skwi te gèɗ; ka nzedkoɗauda a sam ndohi man ta gre di ɓai.

²⁶ Halau, Bab ga, aman arsa ambaha ka.

²⁷ Skwi tèlèba Bab ga a mvay a rai. Ndo ngiɗè a sun kra ɓai, sèi Bab kra a suna a vava. Ndo ngiɗè a sun bab kra ɓai, sèi kra a suna a vava, a ndohi man kra a ngreda ta.

²⁸ Vo-washkè a sam ga, kin tèlèba man ntulè a keɗ kinè, man skwi mwuɗitpa a ga kinè, a i da va kinè nshèk va.

²⁹ Va-kelawda wof nte daʼai ga a daʼai kinè, va-slebau a sam ga! Aman iyè, i ndo man ndav lüɓekwaʼa, a i manda gèɗ ga a hi a sam tèlèba; a ndav kinè a ngècè nshèk va.

³⁰ Aman wof nte daʼai ga, wuɗi a te pa ɓai; a skwi ga man kin zhüɓaʼa, a nzala kinè azɓai.