Matthew 10 - Ma Zhiklè

Yèsu a par ta ndohi 12 mpèrè

¹ Yèsu a mbaha ta golahi nengaʼa 12 a sam na, a mva ta wuɗai a géɗ mèzhèɓhi ambaɓihiaʼa, aman ta dzar ta auda, aman ta mbel ta ndohi te matakwan a skwi ndzi tsaɗ tsaɗ tèlèba.

² Nzlembaɗ ndohi sak 12, ta haha: Nshèlèkuraʼa Simon, man ta baha na Pierre; a André, kramam na; Jacques, kra Zébédée, a Jean, kramam na.

³ Philippe a Barthélemy; Thomas a Matthieu, ndo ncèkèlè skwai; Jacques, kra Alphée; a Thaddée.

⁴ Simon, ndo Cana, a Judas Iscariot, man a nga na ri a gèɗ Yèsu.

Mizlinè Zhiklè ndohi 12

⁵ Ta 12 haha, Yèsu a nzlinde ta, a mfa ta ma a gèɗ, a ngaɗa ta: Kin do a civèɗ ndohi herkeda ɓai! Kin do a kokwar ndohi Samarie ɓai!

⁶ Aman vo-do a sam tambakhi te gi Israel, man ta zlak ta.

⁷ Vo-do, va-njè ta ma Zhiklè, va-gaɗa ta: Kokwar-Bi-Zhiklè a zhè ndul ndul.

⁸ Va-mbel ta ndohi matakwan, va-suɗ ta ndohi hutsoɗ, va-slambaɗde ta ndohi mʼmetsaʼa, va-dzar ta madzagihi auda! Kin ngots ambalai, va-va ta ambali ba.

⁹ Kin helda guro a verzhègenè a Suli a ri ɓai,

¹⁰ kin helda gozhèm a ri ɓai, kin hul maslaka cèw ɓai, kotokoroh ka ɓai, a gaɗa ka ɓai. Aman ndo mizlinè sèi a ngècè skwi nʼndi na.

¹¹ Aman te kokwar mbiaʼa, te kokwar nkèshèʼa, ko ahngwa ahngwa man kin dè a pa, vo-dzhoɗo ndo nlèɓèslèʼa, a kin nzi a sam na, ha pats man kin jèkeda zaʼa, a kin dè a ma ma.

¹² Aman kin dè a gai, vaga na mbali dai.

¹³ Aman ndo nlèɓèslèʼa, gumi kinè a dè a gi sa. Aman ndo nlèɓèslè ɓai, gumi kinè a shkè a deɓa a gèɗ kine.

¹⁴ Aman ta ce kinè azɓai, a ta tsena ma kinè ɓai, vo-do kinè, va-tassa lokotor a sak kinè.

¹⁵ I gaɗa kinè a vava: a pats kita, kita kokwar haha a da fena kita Sodome a Gomorrhe.

Ta da paraha ta ndohi Zhiklè

¹⁶ Na haha i zlinde kinè ara tambakihai a ndev kdadidakhai. Gar haha va-gu maya ara zhüzhokihai, va-lèɓèslè ara nkuɗhomhai.

¹⁷ Va-gu maya a géɗ kinè a sam ndohai. Ta da va kinè a sam ncèmma, ta da ndah kinè te gi-njèngè-ma tengaʼa.

¹⁸ Ta de kinè a sam bihi mbibihiaʼa, a sam bihi nkèshèhiaʼa, a géɗ ga, aman kin gi a ndohi malwuɗihi a sam tengaʼa, a sam ndohi herkeda.

¹⁹ Aman ta de kinè a sam kita, kin hur gèɗ ɓai a géɗ ma man kin da gaɗa ta. Aman kin da ngècè ma man kin gèɗèʼa, a samaʼa.

²⁰ Aman kinè, a ndè gèɗè ka ɓai, aman Mèzhèɓ Bab kinè man a gèɗè te ndav kinè.

²¹ Ndohi ta da vi kramamhi ta a naʼmetsai; bab a da vi kra na, a wudahi ta da slèmbèɗè a gèɗ a bab ta a mam ta, a ta da bazl ta.

²² Tèlèba ta da gi shèwa a kinè, a géɗ nzlembaɗ ga. Aman nengaʼa man a dè a ma ma a slagama, ha skwi a ndev na, a mbel na.

²³ Aman ta da paraha kinè te kokwar staɗ, va-hu kinè a kokwar ngiɗè. Aman i gaɗa kinè a vava, kin ndikeda kokwar Israel tèlèba azɓai, ha kra-ndo a mshkè ma.

²⁴ Ndo nslebi skwai a fena ndo nʼngra na azɓai; ɓèlè ba a fena babgi nengaʼa azɓai.

²⁵ A slra aman ndo nslebi skwai a gi lèmèlèmè ara ndo nʼngra na, a ɓèlè ara babgi na. Aman ta baha na babgi a nzlembaɗ Béelzébul, holholaʼa ndohi gi nengaʼa arsa.

Nga gi zlau ngè?

²⁶ Kin gu zlau tengaʼa ɓai! Skwi nʼnghedaʼa azɓai, man a di a ngrédè auda azɓai; skwi man ta gu a metsar azɓai, man ndo a di a shinè azɓai.

²⁷ Skwi man i gaɗa kinè te ruva, va-goɗa a di pats! Skwi man kin tsena a zlembaɗ kinè, va-ngreda auda a dala!

²⁸ Kin gu zlau tengaʼa man ta keɗa va kinè ɓai; aman ta slaha ta zede nshèffè kinè azɓai. Aman va-gu zlau nengaʼa nshèlèkuraʼa, man a slaha a ngé-dèshè nshèffè a va kinè cèw ba a sam vogwa kita.

²⁹ Ta prè shishihi cèw a Suli staɗ ka ɓi dè? Aman ko staɗ a kèlèhi a herkeda azɓai, aman Bab kinè a sun ɓai.

³⁰ Ko gwots gèɗ kinè nʼngraʼa tèlèba.

³¹ Ani haha kin gu zlau ɓai; kin fena shishihi kumba.

Nʼngredè Yèsu auda a sam ndohai

³² Ko wawa man a ngredyè auda a sam ndohai, i ngrédè nengaʼa a sam bab ga, man a zhè te zhiklè.

³³ Aman ko wawa man a gi ara man a senyè ɓai a sam ndohai, i ba i gi ara man i sun nengaʼa ɓai a sam Bab ga, man a zhè te zhiklè.

Gumi ka ɓai, aman kafahi gwèsh

³⁴ Kin hur a kin gaɗa, i shkè aman i ckoɗi gumi a herkeda ɓai. I shkè aman i ckoɗi gumi ka ɓai; i shkè, aman i ckoɗi kafahi gwèsh.

³⁵ I shkè, aman i kezli gèɗ a nda kra a bab na, demaʼa a mam na, ngwoz kra a mam baki na,

³⁶ ndohi gi na, mayamhi na.

³⁷ Ndo man a woy bab na a mam na, a fena iyè, nengaʼa ndo ga ka ɓai. Ndo man a woy kra na a dem na, a fena iyè, nengaʼa ndo ga ka ɓai.

³⁸ Ndo man a zhüɓ wof ngézlèl na azɓai, a ndzadzarkayè, nengaʼa ndo ga ka ɓai.

³⁹ Ndo man a mbel nshèffè na a ri na, nshèffè nengaʼa a zi na. Ndo man a zede nshèffè na a géɗ ga, a ngècèʼa te deɓaʼa. (Marc 9, 41)

Skwi ntul nga

⁴⁰ Ndo man a ce kinè, a cyè; ndo man a cyè, a ce nengaʼa man a zlindekayè.

⁴¹ Ndo man a ce ndo nhadka ma a géɗ man nengaʼa ndo nhadka ma, a ngècè skwi ntul ndo nhadka ma. Ndo man a cè ndo nzuraʼa a géɗ man nengaʼa ndo nzuraʼa, a ngècè skwi ntul ndo nzuraʼa.

⁴² Ko wawa man a ɓala na iyam nkéɗècèʼa a ndo nkèshèa staɗ haha, a géɗ man nengaʼa gol Yèsu, a vava i gaɗa kinè, skwi ntul nengaʼa a zi azɓai.